«Мон янгыш ӧвӧл, Татарстанын вордски шуыса…»

Удмурт Дунне
By Удмурт Дунне Ноябрь 20, 2012 15:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Мон янгыш ӧвӧл, Татарстанын вордски шуыса…»

«Чеберай» конкурсын вормиз О. Полатова

18-тӥ ноябре Удмурт театрын «Чеберай» ним понна вожвылъяськизы республикаысьтымы тужгес синмаськымон удмурт нылъёс.

Вормисе потӥз но «Чеберай» ним утӥз Татарстанысь Кукмор ёросысь Олеся Полатова. 2-тӥ интые кылиз, Мусокай луиз Шарканысь Лариса Иванова. 3-тӥ интые потыса, Дыдыкай луиз Дэри ёросысь Дарья Байкова.

1995-тӥ арын таӵе ик «Чеберай» ӵошатсконэ 48 нылаш пыриськиз вал. Соку омыр, зэмен ик, зол-зол ӟырдалляз. Нош туэ куспазы нюръяськизы 10 дыдыос.

Чеберай Олеся Полатова уг оскы нырысетӥ инты басьтэмезлы.
— Вожвылъяськонэ пыриськем нылъёс пӧлын асме ӝыны йырлы ке но вылӥынгес шӧдӥ. Соин ик кудаз ке вормон тубат вылэ одно ик шедё шуыса, тодӥ. Тае нылъёс асьсэос но шӧдылӥзы. Нылъёс ог-огенызы ӧз керетэ, вӧсь кылъёс ӧз вералэ. Ужрад йылпумъяськем бере куд-огез соку ик театрысь гылӟиз. Но лыдъясько: «Чеберай» конкурс одно ик азьланяз но кулэ. Дӥсьёслы, макияжлы уксё туж ик трос кулэ ӧвӧл. Малэсь ке кышкамед потӥз ке, муг одно сюроз. Мон 2 сюрс манетме гинэ быдтӥ. Удмурт дӥсьёсы аслам вал ни. Йырсиме кутыны юрттӥзы эшъёсы. Нош вормонэз туж бадӟым — астэ вылӥгес дунъяны кутскиськод, возьдаськондэ зӥбиськод.
2013-тӥ арын Ижын ортчыны кулэ «Уйпал кизили» фин-угор ӵошатскон. Удмуртилэсь данзэ кин утёз? Та юанэз сэрттон-пертчон вылысь радъямын вал «Чеберай» конкурс.

Туэ сентябрь толэзе гинэ ай та конкурсэ пыриськыны мылкыд карись воксё но 1 гинэ вал. Отӥяз 4 кузя люкаськизы. Озьы ивортылӥз театрлэн кивалтӥсез, «Дэмен» огазеяськонлэн тӧроез Андрей Ураськин. Соин но куалекъян кылдылӥз: ужрад уз куашка-а? Но ёросъёсын чебер нылъёс быриллямтэ. Дас кузя люкаськизы. Зэм, нырысь абдраськиз алнашъёслы: кызьы таос, котькытчы пыриськисьёс, таяз рад конкурслэсь палэнтӥсько ай? Но бератаз лымшорысь дыды но сюриз — Анна Казакова. Анна ассэ ачиз ӵектэм.

Ӵошатсконлэсь азьвыл ик Интернет вотэсысь «ВКонтакте» бамын нылъёс сярысь вакчияк тодматонъёсты шедьтыны луэ ни вал. Кылсярысь, Якшур-Бӧдья ёросысь Любовь Широбокова паймытӥз тазьы вераменыз: «Дасяськыса жади ни! Оло, быдэс толэзь дасяськисько ни. Куараме пуктон понна кырӟанъя ансамбле ветлыны кутски. Дэрем вури! Гын сапег чеберъясько. Конкурс бере пособие гожтыны малпасько: «Кызьы Чебериналы дасяськоно». Пособие гожтон сярысь дӥсьтыса ялэмысьтыз, малпай: таид, дыр, зэмен ик туж зол.

Широбокова понна висё шуыса малпай. Нош кыдёкысь Кукмор ёросысь Олеся Полатова шоры, ачим но валатэк, киме шонтӥ: Кам сьӧрын будэм ныллэн кылыз валантэмгес, дыр, сям-йылолъёссы но асьмелы кыдёкынгес.

***
Тани потӥз мынам Широбоковае сцена вылэ. Ваньмызлэсь азьвыл потыны кышкыт ик, дыр, — куалекъя, кылъёс уг шедьты. Мукетъёс, асэнызы тодматыкузы, кырӟаса-вераса лэзизы ке, таид огшоры кылъёсын асэныз тодматӥз. Шундыӝужан палан улӥсьёслы крезьгурзы чузъяськемъя эктыны кутскиз. Вырыны быгатэ. Но крезьгур быриз ни, нош эктонэз йылпумъяськыса ӧзгес вуы. Ачиз муспотон ке но, вань та чыры-пырыос мылкыдме сӥятӥзы.

Нош Олеся Полатова воксё гуньдытӥз. Шоканме ик вунэтыса, кылзӥ жингрес куараен кырӟамзэ. Мыня, синъёсыныз залын пукисьёсын шудэ — зэмос актриса кадь.  «Ой, малы со ӝытэ мон тонэ пумитай…» шуыса нёжтӥз но малпай: дунъясьёс доры мед васькоз вал таид. Но малпанме со ӧз кылы. Озьы ке но бордысьтыз синъёсты воштыны шуг вал. Удмурт кылын вольыт, валамон но чебер вераське — юнме курдаськем. Сям-йылолэз возьматон понна Вылӥ Шунь гуртысьтыз быдэс «Инвожо» ансамблез ваем. Олеся, ӟус вылэ тэтчыса, сокем мыло-кыдо но зол эктӥз, пулэсь шуккем маке ик пыд улаз куашказ. Нош Олеся тае шќдытэк ик кылиз, кожалод — ялан тапыртэ.

Уг пӧя, Полатова сяна но, паймытъясьёс сюризы. Кылсярысь, Шарканысь Лариса Иванова. Мукет нылъёс пыдес улозязы удмурт дэремъёсын вал. Нош таид удмурт шӧмо кофта но яркыт-вож вакчи шорты, гетры дӥсям. Зэм, «Титаник» киноысь кырӟанэз удмурт кылын гурлакуз, дӥсьсэ воштӥз. Но сцена мышкын киноысь суредъёсын ворекъясь  слайд сюлэмез вандӥз ик — суредъёсты валэктӥсь гожтэмаз — янгышъёс. Буре вайиськом, пе, вуэ «выйэмъёсты». Мукет чураз гожтэмын вал «сюлемъёсты». Мон ачим грамотей ӧвӧл ке но, мылкыд сӧриське ик та «пыӵъёслэсь».

Эгралась Людмила Григорьева сюлэмез бугыртӥз, нуны сюан шудон сям-йылолэз возьматыкуз туж зол роляз пыриз. Ӝожмыт кырӟаменыз синвуэз ик поттӥз. Нош макем чебер эктӥз со гур ворсан вылын!

Шарканысь Дария Воронцова 4 паймымон дэрем вурем. Туж чебер тапыртэ. Эктон сяменыз шпагатэ но пуксиз, ки вылаз но йырин-чукин султылӥз. Жаль, куашказ визь сынанын. Ужрадэз нуисьёс Петя Пушкин но Дима Софронов юазы Сюмси ёрослэсь административной центрзэ. Дария  малы ке нырысь тодаз вайиз… Чупчиез.

***
Ма, куд-ог мукет нылъёс но ӝожомытӥзы. Куд-ог юанъёслы валэктонъёссэс кылыса, йырси ик пежыр ӝутскылӥз.  Можгалась Татьяна Щёткиналэсь юазы: Удмуртиын кӧня ёрос? Оло, малпаськыса вуиз, оло, ӧз — соку ик куаретӥз: одӥг, пе. Собере ужрадэз нуисьёслэсь паймем синъёссэс адӟыса,  будэтӥз на: лыдъяй, пе, укмыс. Петя Пушкин югдурез небӟытыны выриз ик: ёросъёсмы 25, но Таня, пе, лыдъяз, дыр, сооссэ гинэ, кудаз ачиз вуылӥз.

Дэбесысь Кристина Юферева гуньдӥз «четверг» кылэз удмуртэ берыктыны косэмзы бере. Залын пукисьёс пӧлысь кин ке кеськиз ик: покчиарня. Дыдыед кылэмзэ вераз ик.

Дэри ёросысь Дарья Байковаез колӟаны выризы: кыӵе киын, пе, чаез сурано. Школаын дышетскись нылаш серектыны выриз ик: нырысь одӥг киыным, собере, пе, мукетыныз сурасько. Талы пумит Дима Софронов куаретӥз: мон, пе, малпасько вал, чаез пуньыен сурало.

Сюлэмам лякиськем Олеся Полатова Брангурт песянайёсмылэсь районзэс вераны ӧз тоды. Но кылемаз Чеберай ӵошатскон дыръя солы эшшо секытгес юан сётэмын вал: ку пуктэмын Удмурт театр. Соку со ӧз тоды, мар вераны. Нош туннэ, коть уйшор уйин, пе, мед сайкатозы, вазёз: 1931-тӥ арын. Озьыен, Брангурт песянайёсмы Пичи Пурга ёросысь шуыса, ноку уз вунэты ни.

***
Нылъёсты дунъяны лыктӥллям филология наукаосъя кандидат Вера Пантелеева, Кун Кенешысь Гурт удысъя, музъем узырлыкъёсъя но инкуазез утёнъя ялан ужась комиссиен кивалтӥсь Владимир Невоструев, Удмурт театрен кивалтӥсь Андрей Ураськин, стилист Олег Ажгихин но мукетъёсыз. Капчи ӧз йӧты, дыр, соослы огкылэ вуыны. Ма, сотэк-а кемалы нимаз висъетэ ышизы? Со куспын лыктэмъёсты шулдыртӥзы егит пиос: Иван Белослудцев, UllapalaBoy, Дмитрий Загребин но мукетъёсыз.

Остэ, кинэ меда Чеберае быръёзы? Неужто Олеся Полатова палэнэ кылёз ни? Ма, сое сяна, вылӥ ӝутыны нокинэ.

Тани Андрей Ураськин вань дунъясьёслэн нимынызы сцена вылэ тубиз, меӵак шуиз:
— Кема бырйим, керетӥм но куспамы. Нырысетӥ интыез сётон ласянь гинэ кылмы ваньмылэн тупаз.
Полатовалэсь нимтулзэ кылэме бере сюлэм вылысьтым из ик усиз. 2-тӥ интыен (Лариса Иванова) мон соглаш ай. Но 3-тӥ интыен тэрытӥськеме уггес поты. Мон сое Дария Воронцовалы сётысал  —  мыным со котыр ласянь чупресгес потӥз. Роман Дементьев ужбергатӥсьлы но Воронцова ярам. Нош Владимир Невоструев зарнивуам часэн пусйиз Анна Казаковаез.

Ма, огез но нылъёс пусйытэк кельтэмын ӧй вал — ваньзылы сяська керттэт, коньдон кузьмамын. Мылкыдзэс ӝутыны выриз Владимир Соловьёв: министерство, пе, радъяны малпа «Мисс студентка-2013» ужрад, отчы одно пыриське.

***
Макем капчи туннэ вормисьлы — Олеся Полатовалы? Интернет вотэсын адӟиськыны кутскизы ни пыкылонъёс. Огез соос пӧлысь таӵе: «Мынам малпамея, востэм удмурт ныл вылӥ уг дунъяськы ни (мон Лариса Иванова сярысь). Малы кулэ сыӵе конкурс, кытын интеллект, презентабельность особо кулэ ӧвӧл? Лариса туж тупа вал Чеберайлы, нежели Мусокай!» Зэм, авторез нимтулзэ пусйыны дӥсьтымтэ.

Ма, сцена вылысь чеберинаос кошкыса ӧз вуттэ на, залын куд-ог пукисьёс шиетӥзы: удмуртъёсты лёгаз Татарстан. Талы пумит Олеся Полатова ӝожоме:
— Мон удмурт нылаш! Вордӥськи но дышетски удмурт гуртын, анай кылы мынам — удмурт. Мон янгыш ӧвӧл ук, Татарстанын вордски шуыса…

Нялтас вераса, Олеся дышетске Удмурт кун университетысь филологияя факультетын. Азьпалан — «Уйпал кизили» ӵошатскон. Ортчоз со 2013-тӥ арын. Отын удмуртъёслэсь востэм луэмзэс санэ уз басьтэ ни. Нош Олеся возьматӥз тужгес шаплы но эркын луэмзэ.

Елена Сараматова

Удмурт Дунне
By Удмурт Дунне Ноябрь 20, 2012 15:42
Write a comment

2 комментария

View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<