Мон синпелет пукто песянайлы!

Удмурт Дунне
By Удмурт Дунне 7 ноября, 2012 14:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мон синпелет пукто песянайлы!

«Удмурт песянай» синепелетлы макетъёс. Ужъёсыз Г. Сидоровлэн

Брангурт песянайёсмылэн «Евровидениын» кырӟамзы тросэзлэсь сюлэмзэс-визьзэс вырӟытӥз. Калык валаз: арлыдо адямиос — со одно пересьёс ӧвӧл. Песянайёс — улонэз яратӥсь но дунъясь адямиос, ӟечезлы, азьланезлы шуныт оскон пыӵатӥсьёс. Соослэн улон дартсылы синмаськыса, туннэ пӧртэм интыосын кылдо тунсыко проектъёс.

Германиын улӥсь удмурт воргорон Виктор Березин, кылсярысь, Ижысь тодмоосызлы вазиськиз удмурт песянайлы синпелет пуктон сярысь кичӧлтонэн. Малпанэзлы дурбасьтӥзы, сое улонэ пыӵатон понна Виктор Афанасьевич аслэсьтыз миллион манетсэ сӥзиз! Ивор туж ӝог вӧлмиз Интернетэ, газетъёсы. Ужбергатӥсь, эсьма, Германиысен кӧня ке пол жингыръяз редакцие но, ивор поттэммы пумысен тышкаськыса. Ваньмыз, пе, рос-прос тодмо ӧвӧл на, кулэ ӧвӧл вордскымтэ кунян вылын ворттылыны. Огласянь, дунъямон: зэмос меценатъёс ӟеч уженызы ноку но уг ушъясько. Мукет ласянь, кызьы уд гожъя: мын ай пумита кытысь ке удмуртъёс пӧлысь ас миллионзэс сӥзисьёсты!

Но вераськон кызьы ӝог потӥз, озьы ик чалмиз. Маке ӧз пормы шат? Миллион уг тырмы? Валэктон утчаса, курадӟоно ӧз луы — Виктор Афанасьевич нош ик ачиз жингыртӥз. Та рад ми соин пыр-поч вераським кичӧлтонэз пумысен.

— Малы собыдӟа коньдондэс одно памятниклы висъяны малпады? Сокем брангуртъёс сюлмады йӧтӥзы?
— Соос тодам вайытӥзы асьмелэсь, удмуртъёслэсь, улэм-вылэм сюресмес, аслэсьтым пичи дырме… Котькыӵе вакытъёсы удмурт семья возиськиз кышномурт вылын, ӵапак песянай утьылӥз, сюдӥз-вордӥз пиналъёсты, соосты визьнодалляз, чидась, сабырлы луыны дышетӥз. Но малпанам ӧй вал одно брангурт кышноослы синпелет пуктыны, соосты монтэк но данъясьёс туж трос. Мон сӥзьысал сое ваньмызлы удмурт песянайёсмылы. Малпасько, асьме кадь бабушъёсты быдэс дуннеысь утчаса уд шедьты.
Кыӵеен мон адӟисько вуоно скульптураез, верай Удмуртиысь художниклы Геннадий Сидоровлы. Со тодмо луэ удмурт мифологияя вӧлэм пу скульптураосыныз. Геннадий мон дыртытэмен макет лэсьтӥз туж ӝог — дэмлаз кык пӧртэм суред. Огез мыным туж кельшиз, со нимаське «Улом али» (учке туспуктэмысь). Кык песянайёс, огез уйпал дэремен, мукетыз — лымшор, куспазы верасько ӵуказе нунал сярысь, бордазы нуноксы. Скульптура синмез соку ик бордаз мед кыскоз шуыса, кулэ тодмо гожъёс, соин ик огезлэн песяйлэн тусыз басьтэмын Брангуртысь одӥгез кенак вылысь.

— Мынам синмы та скульптураысь адӟе чылкак мукет суредэз: кык бабушлы одӥг нунок — со быронмес пусъёнлы тупагес кадь…
— Но соос верасько ук улон-вылон сярысь! Тыбыр сьӧраз ныпъетын пукись нуны лэсьтыны луоно на. Художник укыр дыртӥз, соин ваньзэ рос-прос дасяса ӧз вутты. Ми малпам вал сентябрь пумозь, город администрациысь архитектурая комиссилэн кенешозяз, та ужез бералтыны.

— Малы сокем дыртӥськоды: малпандэс уз лушкалэ ни — со суредамын-шараямын, коньдонды вань…
— Малпам ужез кемалы кельтоно ке, со аналме. Мон малпай вал, песянайёс сярысь тема пӧзьыку, дурбасьтӥсьёс луозы но уж капчиенгес вырӟоз. Но маке но могӟет ялан сюре. Кылсярысь, мон понна туж бадӟым инты басьтэ, кытын сылоз синпелет. Шуом, мон «Удмурт песянаез» адӟисько городлэн шоркарысьтыз, кивалтэт дорысь яке удмурт часовня дорысь. Шутэтскон, юмшан интыын медаз сылы. Мон понна со укыр сӥлы арбери. Сыӵе учыре гинэ дась юрттӥськыны. Али Ижын та ужен выре Удмуртиысь памятникъёсты утёнъя огазеяськонлэн кивалтӥсез Зинаида Боткина. Оскисько, со ваньзэ йылаз-пумаз вуттоз.

Зинаида Яковлевна понна котькуд синпелет дуно, со тодэ котькудӥзлэсь историзэ. Котьку шумпотэ выль кылдӥсезлы, угось со — улонмылэн пытьыез луэ. Песянайлы синпелет пуктон сярысь кичӧлтонэз но со шумпотыса пумитаз. Но таӵе ужъёсын ваньзэ мылкыдъя гинэ лэсьтыны уг луы — аслад азбарад со котьмар пуктыны луэ, городын юатэк-чаклатэк юбо но уд юнматы. Соин Зинаида Яковлевна та уж борды рос-прос басьтӥськиз: кенешыны люказ Элькунысьтымы лэсьтӥськонъя министрез, Иж городысь валтӥсь художникез но валтӥсь архитекторез, мукет экспертъёсты. Малпанлы ваньзы дурбасьтӥзы. Памятник луоз кортлэсь (металлэсь). Али кенешиськом тупась инты сярысь. Конечно, мед сылысал со городлэн шор ульчаосаз, но отчы, кытчы мылыд потэ, памятникез пуктыны уг луы.

— Кӧня тыр усёз синпелет?
— Куинь миллион манет котыр.

— Березин сӥзе одӥг миллион, нош кылемзэ кытысь?
— Мон малпасько, Президентмы юрттоз, угось туэ со нимысьтыз указ но поттӥз Песянайлэсь нуналзэ пусъён сярысь. Но ӧм на вазиськылэ.

— Вакчияк вераса, али коньдон ӧвӧл на, миллион но кыл вылын гинэ ай, соку малы сокем дыртонэз вал? Оло, умойгес луысал, скульпторъёс пӧлын конкурс ялыса?
— Мон но озьы лыдъясько. Маке лэсьтоно ке, ваньзэ рос-прос мертано. Но Виктор Афанасьевичез но валасько — тулыс-гужем песянайёс котырын вань улон бергаз кадь, пӧсь дыръяз со темаез уже кутоно, малпаз, вылды. Сыӵе учыръёсы котькугес ик дурбасьто уго.

— Быгатэ-а сыӵе ужъёсы калык пыриськыны: синпелет пумысен аслэсьтыз адӟонъёссэ вераны, ӵектэм макетъёс пӧлысь кудзэ ке тупасьсэ бырйыны. Яке макет юнматэмын ни?
— Макет быръемын. Но со уг вера, воштонъёс пыртыны уг луы ни шуыса. Зэмзэ вераса, калыклэн малпанэз туж дуно, но медаз луы со огшоры «кельше-уг кельшы», мед дэмлалозы валаса.
Нош кинлы синпелет пуктысалды тӥ, лыдӟисьёсмы?

Зинаида Рябинина

Удмурт Дунне
By Удмурт Дунне 7 ноября, 2012 14:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<