Сцена вылын — марӟан пырыос

Удмурт Дунне
By Удмурт Дунне 27 ноября, 2012 06:00

Сцена вылын — марӟан пырыос

А. Прокопьева

«Аксион» культура юртын ортчоз Удмурт Элькунысь дано артисткалэн, Чувашиысь Эмине премилэн лауреатэзлэн Анна Прокопьевалэн творчество удысын 40 ар тыршемезлы сӥзем ӝыт.

Анна Николаевна кема аръёс ӵоже кырӟаз эктонъя но кырӟанъя «Италмас» кун ансамбльын, фольклор кырӟанъя но эктонъя «Айкай» ансамблез одӥгез кылдытӥсез вал. «Удмуртия» кун телерадиокомпаниын кема аръёс ӵоже радъяз но нуиз «Марӟан» но «Анна кенак ӧтчаське» крезьгуро программаосты. Юбилеезлы сӥзьыса, Анна кенак нош ик кунооссэ котыраз люка.

Концертэз Анна Николаевна герӟаны турттэ вал Сталин лагерьын пукем анаезлэн Серафима Семёновналэн со вакытысь кырӟанъёсыныз, сцена вылэ ӵошен ик потыса. Но туэ гужем анаез улонысь кошкиз. Озьы ке но пытсэт сьӧрын вордӥськем кырӟанъёс концертын чузъяськозы.

Ӝытэ пыриськозы элькунысьтымы тодмо но дано кырӟасьёс но коллективъёс. Соос пӧлын калык эктонъя «Эктон корка» студия, кырӟанъя но эктонъя «Айкай» театр, фольклор коллективъёс, Андрей Ураськин, Геннадий Ганьков, Надежда Уткина, Иван Григорьевых но мукетъёсыз.

Нырысьсэ чузъяськозы Анна Николаевналэн аслаз гожтэм кырӟанъёсыз. Песянаенызы ӵош сцена вылын быгатэмзэс возьматозы нуныкайёсыз Марика но Илиан.

Лия Малых

Туспуктэмез: vk.com

Удмурт Дунне
By Удмурт Дунне 27 ноября, 2012 06:00