Рок-н-ролл мирошкаос

Удмурт Дунне
By Удмурт Дунне 28 ноября, 2012 11:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Рок-н-ролл мирошкаос

Рок-н-ролл албастыос Ижкарез зуркато

Пезьгыт, яркыт, чибориё шоу: тылъёс ворекъяло, дымбыръёс йыггето — сцена вылэ «4 cheber pios» пото. Ӧвӧл, Иван Белослудцевлэн уромъёсыз ӧвӧл. Маке йӧспӧртэмгес. Тазьы кутске Roc’n’roll Bastards огазеяськонлэн шулдыр ӝытэз. Та пияшъёс Ижын зэмос рок-н-ролл лэсьто!

Рок-н-ролл бастардъёс (албастыос яке йӧнтэмъёс, мирошкаос шуод-а) — выль промо-группа. Сержио Манифесто но бандаез — «Бар весёлых историй» клубысь диджейёс. Сергей Солодянкин — крезьгурчи, огинлэн валтӥсез, гуру, со ик кырӟась но, диджей но, мур копыштыны быгатӥсь визьмо мадиськись но. Йырез поромытымон пальпотэ. Эшшо ик мыйыкез вань. Та мыйыкезъя клубын вань егитъёс сое тодмало.

— Кинлэн малпанэз та — Roc’n’roll Bastards? Ку кисьмаз?

— Кемалась йырам бергаз, — маде Манифесто. — 1972-тӥ арын куартолэзе… (Сергей пальпотэ, мон серекъясько, угось соку со вордскемын но ќй на вал). Валай, вӧзам огвыллем малпаськись муртъёс люкаськизы, ӵошен мае ке выльзэ, асьмелэсьсэ лэсьтыса утчано. Мон туж акыльтӥ кортнась эгесъёслэсь.

— Нырысетӥ ужрадды «ворсамын» вал. Эшъёстэс гинэ витиды?

— Бен, ми ӧтёнъёс лэсьтӥм. Адямиос валазы: нырысь ик имидж сярысь малпаськиськом. Нош кӧня калык вуоз, кӧня коньдон люкалом, созэ ӧм чаклалэ. Валасез валалоз, шуэм кадь.

— Work for love! — итӥське вераськонамы Паша Shaggy — лусьтро Паша.

Паша азьвыл Flower in her head группаын шудӥз (та огинлэсь гитара кырӟанъёссэ «Узы-боры» киноын кылыны луэ, Пашалэсь вокалзэ нокинэн но уд сура). Али ужа диджей луыса, банкын но. Банкын ужась рок кизили — Ижын та норма. Озьы ке но вылтусызъя Пашаез нормальной уд шуы. Концертэ со тужгес тузӥ майкаен, чилясь лосиныен потэ, пештырскем йырсиез кыдёкысен унябей сяська кадь адске. Gorod журналлэн «20 стильных мужчин Ижевска» лыдметаз пыриз. Али со Deep Winter проектаз барабанэн шудэ.

— Адямиос милемлы оскыны кулэ, — гань-гань азьланьтэ Сергей. — Нокин муртэз, кулэтэмез медаз люкеты. Рок-н-ролл ке — рок-н-ролл ни со.

— Нош кызьы тон валад, вӧзысьтыд муртъёс рок-н-ролл тодметъёсъя тупало шуыса? Тани Данил Бабушкин, Cat@pult, удмурт дискотекаосын но шудылэмын ук.

— Данил — бунтарь. Таин тырмыт ини.

— Озьыен, тӥ понна рок-н-ролл — со бунт, эрикъяськон гуръёс?

— Рок-н-ролл — со рок гинэ ӧвӧл. Со пӧртэм жанръёс, мылкыд, эпоха — вакыт. Крезьгур ке — одно ик гитараен луыны кулэ ӧвӧл! Ну, шуом, мон понна со 50 cent но луыны быгатэ. Beasty Boys но Snoop Dogg — сыӵе ик рок-н-ролл, со адямиосты бергатэ, лэйкатэ. Abba, Blondie (Дэбби Харри) но Eminem — озьы ик. Диско, фанк — ваньмыз мыноз. Котькуд жанрын вань аспӧртэм адями, азьлань мыныны кужым сётӥсь мурт. Соос милемыз ӝуато, кенжыто!

— Серёжа, тынад аслад группаед вань — Kings of Ra. Мар шуэм со? Кудпала тӥ мынӥськоды?

— Нимыз валэктонтэм. Ним — со мистика но магия огдыре. Та ним мыным соиныз кельше — огазеянтэм макеос ваче пумит луо. Кызьы со — Египет инмарлэн эксэйёсыз? Ми кык трек гожтӥм. Куддыр концертъёсын потаськом.

— Мон малпасько, Sergio Manifesto & Kings of Ra ӟеч уж лэсьтӥзы, — малпанзэ ватса Артём Рожков, Аrt Richards. — Cоос рок-н-роллэсь валтӥсь малпанзэ электронной крезьгур пыр усьтыны быгатӥзы. Но та выльдэм крезьгурзы пошлой ӧз луы.

— Ми асьмеос — рок-группа! — шуак вала Манифесто. — Ньыль диджейёс: мон, Паша, Данил но Артём — со коллектив. Мыным кельше, ми сцена вылэ ӵошен, ньыль кузя потӥськом шуыса. Крезьгур тӥрлыкен-а шудӥськом, диджей пульт сьӧрын-а — со шоу, усьтӥськон, эктӥсьлы астэ кузьман.

— Ужрадын, вечеринкаын тужгес но кулэез — мылкыд, — вера Паша. — Мед адямиос шулдыр дӥсяськемын луозы. Рок-н-ролл — со астэ висъян, пурысь уллёысь нимазъяськон.

— Адями эрико луыны кулэ, — пыр-почгес вера Сергей. — Эрико мурт азьын шудыны капчи — со ваньмызлы дась. Мед со дӥсяськемын Бруно Марс кадь. Хипстер, рэпер, Бруно Марс — милем ваньмыз огкадь. Берпуметӥ ужрадэ тани пересь итальянец вуиз. Туж мыло-кыдо тэтча, зэмос рок-н-ролльщик, ява.

— Озьыен, тӥ доры куное котькин сюрыны быгатэ ни.

— Ми дуннелэсь ум палэнскиське, — азьланьтэ Манифесто. — Публикаез валаны тыршиськом. Зэмос крезьгурез гажасьёс но огшоры баре вуэмъёс огкадь шулдыръяськыны мед быгатозы.

— Нош мон шӧдӥсько, Ижысь рокеръёс тӥ сярысь уггес тодо. Маин герӟаськемын та? Укыр трос «микротусовкаос»?

— Рок но рок-н-ролл — пӧртэм макеос. Рок-н-ролл — паськытгес.

— Шуом, «Интеграл» — со «говнорок», — серектэ Паша.

— Рок-н-ролл соиныз пӧртэм: со уг вошъяськы. Со дауръёс пыр улэ.

— Иське, уд гажаське тӥ выль трендъёсты, модае пырем арбериосты?

— Тренд — со ярлык, — мур малпаськонэ усе Сержио. — Крезьгурчи вылэ пус ошо. Адями мае ке малпа, собере адӟем карисьёс сюро. Азьпалан котьку модаез кылдытэм адями гинэ луоз. Кылемез — тузон. Шузи кадь мурт адямилэсь ужзэ кӧчыртӥськод ке, тынад комплексъёсыд вань. Ми комплексъёсын ум нюръяськиське.

— Рок-н-ролл азьветлӥсь сямен ик, ми кема дырлы планъёс ум пуктӥське, — ватса малпанзэ Артём Рожков. Вераськон со доры выже. Артём — интеллигент тусо, очкиен, сьӧд пенжакен. Шудыкуз гинэ чылкак воштӥське — кулэм мурт гинэ уз экты! Азьло Артём «Анри» но «Фавориты луны» огинъёсын гитарист вал. Али, кызьы ачиз вера, крезьгурлэсь палэнскиз — англи кылэ выемын.

— Артём, берпуметӥ ужрадды Tarantulo нимаське. Мар та, Тарантинолы салам? Афишаысь шальтрам корт шоры учкыса, Death Proof фильм тодэ лыктэ.

— Мынам шӧдэмея, со маин ке вашкалаен, куштӥськемен герӟаськемын. Пустыня, шыпыт, вуж машинаос… А-а, валай, тарантас! Крезьгуръя ке учконо, «Назад в будущее» киноысь плейлистлы укшасал — вуж но туала крезьгурлэсь суро-пожо зырет. Мон одӥг вакытысь мукетаз тэтчаса шудӥсько. Вылез пӧлысь — одно ик Kasabian, берпуметӥ альбомзы.

Шудытэк уг кельты брит-поп тулкымез — Blur, Oasis. Классика пӧлысь — Queen, Beatles, Элвис, кызьы соостэк. Малы ке британ крезьгур мыным матынгес. Америкаысь крезьгур сокем сюлэмам уг йӧты.

— Со кызьы вискиез ярато: кин ке бурбон юэ, кин ке скотч…

— Со географиен герӟаськемын ӧвӧл. Мон понна ачиз крезьгур — со зарезь. Зарезьын пӧртэм тулкымъёс веттасько. Американ тулкымысь но кельшисьсэ шедьтыны луоз: Red Hot Chili Peppers, Iggy Pop. Вужез пӧлысь — The Velvet Underground. Классика сярысь тани верай но, тодам лыктӥз: ужрадъёсмес малпаса, улӥын рок-н-ролл шудыку, вылӥын барын классика мед шудоз шуыса, мылкыд карим. Ӧз лэзе.

— Ха-ха. Тунсыко малпанды, зэм но, жаль, улӟыны ӧз кылды шуыса. Дунне крезьгурен ваньмыз валамон кадь. Нош Ижысь крезьгур паймытэ-а? Берло дыре тонэ мар ке лӧпкытъяз-а?

— Туж тунсыко потӥз арлэн кутсконаз ветлэм концертэ — Нино Катамадзе вуылӥз. Солэсь крезьгурзэ нокызьы ниманы уд быгаты, сокем со паськыт, пӧртэм тусо. Профессионалъёс ужало, ваньзэ рос-прос лэсьто! Нокытӥзэ курланы. Со грузин кылын но кырӟа, но грузин кыл мыным уг люкеты — крезьгуре выйисько. Нялтас вераса, Silent Woo Goore группады но удмурт кылэз туж быгатыса кутэ. Ӟечокъёс. Учкымон удмурт продукт лэсьто, пошлой уг луы. Ӟуч группаос пӧлысь таяз арын шумпоттӥз «Ундервуд». Мон соосты туж рок-н-ролльноесь шуысал. «Бабл-гам» альбомзы кельшиз.

— Кызьы малпаськод, Ижын рок-н-ролл лэсьтыны луэ-а? Синпӧет ӧвӧл-а та йӧндырем?

— Кызьы шуод… 60-тӥ-70-тӥ аръёсысь рок-н-ролл уз луы ни. Нош со адямиос али ке но — ого-го! Учке Rolling Stones шоры. Выль бичетсылэн нимыз но кыӵе гррр! — «Grrr!» Вылтусаз — горилла. Инмар мед сётоз, мон таӵе арескам сокем сэзь мед луом на. Нош секретэз кыӵе? Соослы «похер». Вот со ик рок-н-ролл. Мыным солэн югыт палыз кельше, урод палзэ (наркотикъёс, йыружъёс) адӟеме уг поты. Выль группаослэн шексы вань — укыр тыршо: чылкыт чузъяськыны, йырси тугзэс шонер сынаны, гитара сизэс тупамон золтыны… Но тани калык азе Кит Ричардс потэ — Баба-Яга но Баба-Яга — мынам пушкам ваньмыз бугырске, сокем трос солэн дартэз — шоканэ ик усьтӥське!

— Пиос, тӥляд но мытэм ужды дырызлэсь вазь медам кысы!

— Мар сюлмаськонэз — рок-н-ролл ноку но массовой ӧй вал. Азьло но адямиос отысь-татысь, куштӥськем мурӝолъёсын люкаськылыса, кыре-данэ потылӥзы. Милям со вакытлэсь масказэ мертаммы потӥз. Тунсыко уж та. Э-э, вераны вунэтӥськем: Брангурт песянайёс — тани кин зэмос рок-н-ролл мудоръёс! Тыро-пыдо рок-н-ролл, таиз зэм!

Дарали Лели

 

Удмурт Дунне
By Удмурт Дунне 28 ноября, 2012 11:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<