Пиштомы яке саюлын уломы?

Удмурт Дунне
By Удмурт Дунне 28 ноября, 2012 10:48

Пиштомы яке саюлын уломы?

Ольга Прокопьева

«Котьку мед пиштоз шунды!» — таӵе ӧтён улсын улэ котькуд «шундыпи». Нош котькудӥз доры меда вуэ солэн тылсиез? «Шунды» дэменлыклэн шумпотонъёсыз но куректонъёсыз сярысь юалляськоно кариськи огазеяськонлэн тӧроезлэн воштӥсезлэсь Ольга Прокопьевалэсь.

 — Оля, мар тон понна «Шунды»?

— Берло куинь ар ӵоже «Шунды» улонам тужгес но бадӟым инты басьтэ. Пӧртэм ужрадъёс, трос выль эшъёс, тунсыко адямиосын пумиськонъёс… Ваньмыз со кужым сётэ дышетскыны но ужаны. Пӧртэм удысъёсъя тодон-валан люкаськод на. Кылсярысь, огазеяськонэ пыриськыса, дыши калыкен кусып тупатыны, удмурт кылме волятӥ (огазеяськонэ пырыкум, та нырысетӥ ужпуме вал), трос тодон-валан басьтӥ ужрадъёсты ортчытъян пумысен. «Шунды» — со бадӟым улонэ тубат выллем, аспӧртэмлыко школа.

 — Та огазеяськон трос лэсьтэ удмуртлыкез азинтон понна. Нош мар быдэсмытэк кыле?

— Мон малпамъя, «Шундылэн» тужгес но вогыриё интыез — ёросъёсын ужан.  Шуом, карын егитъёслы трос тунсыко ужрадъёс, адӟытонъёс ортчытъяськом. Таин валче соослэн удмурт кыл сярысь малпанзы воштӥське, 100 процентлы уг ке но, азинсконъёс вань. Оскисько, тросэз егитъёс анай кылзы шоры мукет синмын учкыны кутско, удмурт луыны «круто» шуыса валало. Ёросъёсысь, удмурт гуртъёсысь лыктэмъёс тросэз анай кылэз тодо, но вераськыны возьдасько. Соин ик тросгес ужано ёросъёсысь, гуртъёсысь егитъёс пӧлын: пиналъёс мед сюлмаськозы анай кылзэс утён пумысен.

 — Кыӵе ужпум пуктӥз вал «Шунды» 2012-тӥ арлы? Мар пӧрмиз, кытчы ӧд вуттӥське?

— Таяз арын малпамы вал котькуд вузын но ссузын ёзъёсмес кылдытыны. Та ужмы ӧрзэ ӧз шедьты. Оло дырмы ӧз тырмы, оло асьмелы тунсыко ӧз поты. Мон ИжГТУ понна кыл кутӥсько. Номыр лэсьтэмын ӧвӧл шуыны уг луы: волейболъя, удмурт стритболъя ИжГТУ-э нимысьтыз командаос люкамы. Али но пиосын кусып возиськом, вераськиськом. Туж шумпоттэ, удмурт кыл ИжГТУын но кылӥське шуыса.

— Мар сӥзьысалыд «Шундылы» азьланяз?

— Мыныны азьлань но азьлань. Со вакытэ ик, выль уж борды кутскыса, вужез медам вуны. Удмурт огазеяськонъёс пӧлын «Шундылэн» котьку вал ас интыез, со азьланяз но егитъёсты ас сьӧраз валтыны мед быгатоз.

Олялэн та кылъёсыз вӧзы мон но быдэс сюлмыным итӥськисько. Пиштоз-а «Шунды» яке пилем сьӧрысь дырын-дырын поталоз — соиз асьме бордысь потэ.

Люба Михайлова

Удмурт Дунне
By Удмурт Дунне 28 ноября, 2012 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<