Пиосы — мынам

Удмурт Дунне
By Удмурт Дунне 23 ноября, 2012 16:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пиосы — мынам

Глаз ёросысь Люм черкогуртысь М. Хаймина Третьяков пиосыныз

Глазов ёросысь Люм черкогуртын улэ Надежда Хаймина — огшоры удмурт кышномурт, визьмо бухгалтер, усто кузпал но зэмос анай. Надежда Викторовна Геннадий Васильевич картэныз Понино нылпи юртысь басьтӥзы кык пиосты — Миша но Антон Третьяковъёсты.

Кузпалъёс кык нылъёссэс будэтӥзы. Бадӟымезлэн, Еленазылэн, аслаз семьяез ини, улэ Глазовын. Пичиез но, Олязы, Глазове кошкемын. Та нылзы Люмын улэ на вал, кузпалъёс нылпи юртысь пи басьтыны кенешыку.

— Нылъёсмы будӥзы, нош мужике весь пилы гоча вал. Соин ик кенешим, нылпи юртысь пи басьтом шуыса, нылъёсмы пумит ӧз луэ. Ёрос администрациысь опекая отделэ пыралляй.

Сюлэсь уно анкетаосты учки но куинь пиез бырйи. Озьы Пониное нылпи юртэ пиосты учкыны мынӥм. Пыриськом мужикеным но, Миша коридоретӥ бызьылэ. Мон сое адӟи но, соку ик яраз, тусыз но мыным тупа кадь потӥз. Мукетъёссэ ӧм ик учке ини, тазэ басьтоно кариськимы.

Соку воспитательёс шуизы, 9 аресъем Мишалэн Антон выныз вань. Озьы ми соосты тулыс но гужем каникулъёсазы дорамы куное вайылӥм. Нош 2007-тӥ арын 1-тӥ сентябре Люме школае лыктӥзы ини, Миша — 3-тӥ классэ, Антон — 1-тӥ классэ, — тодаз вае Надежда Викторовна.

Та пиос Пониноын уло вылэм. Атайзы кулэм, анайзы юэ шуыса, пиналъёсты нылпи юртэ басьтӥллям. Кышномурт нылпиоссэ чакланы вуылымтэ. Нылпи юртын ньыль ар улэм пиосты шедьтӥзы Хайминъёс. Табере витетӥ арзэ Миша но Антон Люмын уло ни.

Бадӟымез Миша вераськыны уг яраты, улэм-вылэмзы сярысь маде пичиез.
— Татчы улыны лыктыкумы, Люмын эшъёсмы ӧй вал. Табере татын но бускель Дондыкарын, отчы школае ветлӥськомы, соос трос ини. Самой секытэз вал выль анай-атайёсмылы «мама, папа» шуыса вазьыны, — шуэ Антон Третьяков.

Пиос сямзыя пӧртэмесь. Миша яратэ чорыганы, уяны, Антон — великен ворттылыны, суредаськыны но заметкаос гожъяны. Но агай-вынъёсты огазеясез но трос. Соос кыксы ик умой дышетско но ческытэз ярато. Мишалэн повар луэмез потэ, нош Антон кондитере дышетскыны малпа.

—  Соос милемлы юрт-тӥсько. Куддыръя берозь ужасько ке, Антон сиён пӧраса вите. Туж ческыт табань пыже, картошка жарить каре. Урокъёссэс эскере мужике. Со весяк пиос котырын. Котькуд семьяын сямен ик, куд-ог дыръя пиосы уг кылзӥсько ке но, воксё уг жаляськы, соосты дорамы басьтӥмы шуыса, — мылкыдзэ усьтэ кышномурт.

Надежда Викторовна картэныз шедьтӥзы пиослэсь анайзэс. Со кыкетӥзэ бызем но али кык нылпиоссэ будэтэ.
— Ми пиосын вордэм анайзы дӥне куное ветлӥськом одӥг-ог. Миша но Антон будӥзы ке, асьсэос тодозы ини, кудмы соослы матынгес.

Пиослэн туссыя, Надежда Викторовна борды кариськемзыя ик валамон луэ: та анай вӧзын соослы шуныт.

Галина Семёнова

Туспуктӥз Владимир Беломорских

Удмурт Дунне
By Удмурт Дунне 23 ноября, 2012 16:17