Ошмес синэз сузясь

Удмурт Дунне
By Удмурт Дунне 27 ноября, 2012 12:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ошмес синэз сузясь

Паллянысез — Г. Ходырев

Котькыӵе шур дуре мед вуомы — пичи-а со, бадӟым-а — малпаськом: нош кыӵе меда солэн ошмес синэз?

Кыӵе изъёсты вӧлыса, потӥз со югыт дуннее? Кин со ошмес синэз сузяз, чылкыт вулы азьлане ӧръяськыны юрттӥз? Таӵеесь ик юанъёс кылдо, Герман Ходыревлэсь ужан сюрессэ чаклаку но.

Герман Ходырев журналистикаын 30 арлэсь кема ужаз. 18 но ӝыны ар «Дась лу!» газетын тыршиз. Бадӟым улон сюресэз ортчиз со татын. Статьяос, зарисовкаос, очеркъёс, веросъёс, кылбуръёс печатлам сяна, Ходырев кивалтӥз редакциысь литература но искусство отделэн. Со сюлмаськиз яркытэсь но муресь произведениосты печатланы, пинал талантъёсты утчаны, соослы юрттыны.

Герман Алексеевичлы будыны, ӧръяськыны юрттӥзы тодмо кылбурчиос Михаил Петров но Тимофей Шмаков. Соос сярысь ӟеч мылкыдын гожъяз аслаз тодэ ваёнъёсаз.

Школаын но университетын дышетскон аръёсам мон ачим но ӟеч кусып возьылӥ «Дась лу!» газетэн. Ӵем вуылӥсько вал редакцие. Герман Алексеевичен ми азьло ик тодмо вал ни — ӵужмуртэ монэ котьку туж капчи пумиталляз.

Университетэз йылпумъяса, ужаны кутски аслам дышетскем Тыло школаям. Кылдытӥ литературно-творческой кружок.

Методикая литература ӧй вал. Син азям пуктылӥ Даниил Яшинлэсь университетысь кружоксэ но «Советской Удмуртия» газетысь литобъединениез. Тӥни кытын кулэ луизы Герман Ходыревлэн визь-кенешъёсыз. Школаямы я ачиз вуэ вал, я гожтэт ыстэ.

Тани одӥгаз гожтэтаз вазиське: «…Асьмеос вераськимы вал «Нырысетӥ вамышъёсмы» баме печатланы Тылоысь гожъяны кутскисьёслэсь кылбуръёссэс, веросъёссэс, сочинениоссэс, суредъёссэс, лыдӟем книгаоссы сярысь отзывъёссэс. Мон ветлыку, тон лыдӟид вал пиналъёслэсь «Кин луоно?» темалы сӥзем сочинениосты. Вай соосты но лэзь, мед пиналъёс гожъялозы. Кӧня отын? 10-12. Мед луоз сомында — сётом.

15-тӥ декабрёзь ваньзэ дасяса но келяса вуттэ вал. Табере литкружоке ветлӥсьёсыз фотографировать кароно. Соку «Алнаш колхозник» редакциысь Г. Я. Григорьевез ветлыны косоно, дыр, тӥ доры. Фотоснимокен шулдыр луысал. Мылкыдме валад, дыр. 28.11.1985».

Ёросамы литературно-творческой кружокъёс ӧжыт вал. Но дышетӥсьёс шугъяськылӥзы та ужез радъяны, соин ик удмурт кылъя дышетӥсьёс куриськизы кружокелэн одӥгаз занятияз. Мон шуге-леке вуи. Нош ик вазиськи Герман Алексеевичлы. Со мыным гожтэ:
«…Удмуртоведъёслэн лыктонзылэсь эн курда. Мынам таӵе дэмланэ: Иосиф Ивановлэн книгаез потӥз. Умой книга. Вот сое котыр ласянь сэрттоно-пертчоно вылэм. И тынад занятиед туж бадӟым пайда вайысал дышетӥсьёслы но. Кугес со луоз? Мон но лыктысал, дышетӥсьёсын но адӟиськысал…

Со урокад мон произведениез эскерон сярысь гинэ ӧй, мукет жанръёс сярысь кылпум поттысал. Марысь мар ке, тон монэ одно ик ӧть, аслым со ӟеч адӟиськем, кенешем луысал… 1 октябре 1986 аре».

Герман Алексеевичлэсь визь-кенешсэ санэ басьтӥ. Куное ӧтимы со вакытэ егит кылбурчиез Иосиф Ивановез. «Тон но, мон но, ми но тӥ» книгаезлы пиналъёс котыр ласянь дунъет сётӥзы: кылбуръёссэ но эскеримы, иллюстрациосыз сярысь но вераськимы. Жаль, Герман Алексеевич лыктыны ӧз быгаты висеменыз сэрен.

Куное лыктэм дышетӥсьёслы но, пиналъёслы но таӵе ужрадмы туж яраз.
1986-тӥ арын Герман Ходырев выжиз выль уже, «Кизили» журналэ. Со нош ик гожтӥз: «…Мон табере журналын ужасько, татчы басьтӥзы. Сюлмаськонъёсы сыӵеесь ик. Только татын толэзьлы огпол потӥськом. Эркынгес дырыд луиз ке, пиналъёслы заданиос сёт. Мед гожъялозы милемлы но: верос, кылбур, заметка, йыртӥян, юан но трос мукетыз милемлы одӥг но мултэс уз луы… 2 сентябре 1986 аре».

Озьы тӥни Герман Алексеевич Ходырев вань пӧсь сюлэмзэ сётӥз аслаз ужезлы. Солэн вамышъёсыз шӧдскымонэсь вал. Али но со мон понна юн шӧдћське на.

Вылӥ дунъет сётэм потэ Г. Ходыревлэн аслаз творчествоезлы но. Юнме шорысь солэн кылбуръёсыз школа программае пыртэмын ӧвӧл.

3-тӥ-4-тӥ классъёслэн лыдӟон книгаосазы пыртэмын умой сямъёслы дышетӥсь кылбуръёсыз. Нош «Кизили уг кысы» произведениез сӥземын Афган ожын бырем егит журналистлэн Валерий Глезденёвлэн подвигезлы.

Бадӟым классъёслэн программаязы Г. Ходыревлэн творчествоезлы инты сётэмын ӧвӧл ке но, 5-тӥ-6-тӥ классъёсын дышетскисьёсты тыршиськомы тодматыны кылбурен гожтэм выжыкылъёсыныз внеклассной лыдӟон урокъёсын.

Котькыӵе шур дуре мед вуомы — пичи-а со, бадӟым-а — асьмеос малпаськом: нош кытын меда кутсконэз, кыӵе солэн ошмес синэз? Нылпи литератураез ошмесэн ӵошатоно ке, тросэзлы сое усьтӥз Герман Ходырев. Со ошмес синэз сузясь, чылкыт вулы азьлань ӧръяськыны юрттӥсь мурт луиз.

Елена Смирнова,
Алнаш ёрос, Тыло гурт

Удмурт Дунне
By Удмурт Дунне 27 ноября, 2012 12:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<