Мылкыд + луонлык = байлык

Удмурт Дунне
By Удмурт Дунне 2 ноября, 2012 07:47

Бигра ёросысь калыкез уже интыянъя ёзэтысь кивалтӥсьлэн кабинетаз Ондӥ Корепанов ӧсэз вӧлак усьтыса пыриз. «Вань луонлыкъёсты — уже!» — кизэ мычиз Онтон Онтонович Онтоновлы.

— Шонер, Корепаша Вуж Коньдон, — ушъяз соиз. — Кыӵе пыӵ тонэ куртчиз?
— Умойтэм ужаськоды: жуг-жаг утялтыны, ульчаосты ӵужыны ысъяськоды но со понна кун коньдон тыриськоды. Корка кузёос асьсэос таин мед вырозы. Нош ужтэк кылемъёсты, азьтэмъёсты-азгынмемъёсты губи, нюрмульы октонэ кысконо. Шонер ведь?

Онтон Онтонов малпанзэ умоен лыдъяз. Зэмзэ но, ёросазы нюрмульы киземын кадь. Нош вырйылъёсын, нюкъёсын бирдылы укшась коньыгубиос ӵужекто. Корепаша Вуж Коньдонлэн дэмламезъя толэзь куспын «Инвестгубитрест» но «Бигранюрмульыпром» фирмаос кылдытӥзы. Емышъёсты сузяны-миськыны, банкаосы тырыны буш корка но шедиз. Нуналскын ог 150 пиялаос пайдаё сиёнэн-юонэн тырмо. Биграын но Ижын усьтӥськиз кык магазин. Ваньмыз шумпото: ужтэк кылемъёс толэзьлы быдэ басьто дас сюрс манет, со вӧзы — быдэн куинь литр сылалтэм губи но котэм нюрмульы.
Кун Думалэн депутатэз Арки Курегов юрттэмъя удмурт сиён-юонъёслы сюрес усьтӥськиз Москвае но. Татысен кыдёкын ӧвӧл мириканецъёсын эшъяськон но. Ондӥ Корепановез Бигралась шер адӟоды ни. Москваын нюрмульы вузанъя магазин усьтэмез бере, квартира басьтоно медаз луы шуыса, татысь нылашез синйылтэм, яратэм но кузпалъяськем. Муско кышноез табере чечыен, киренен вуз каре.

— Чырс нюрмульы улонме ческыт кариз, — ушъяське Корепаша Выль Коньдон — дано карыса, кушем нимзэ озьы выльдӥзы.
Пыӵ кадь етӥз удмурт бизнесмен москвичъёсты «Мунчодар» кумышкаен куноятэ. Чарка мекалты но, губиен но ческыт нюрмульыен куртчы. Ондӥ Корепанов  шуэ: пие вордскиз ке, пе, Москваын кыкетӥ магазин усьто. Вуоно аре губи но нюрмульы, кумышка но кирень Америкае ворттыны турттэ: юнме шат, пе, ВТО-е пырим.
P. S. Ортчиз ар. Корепаша Выль Коньдонлэн кыктоосыз вордскизы. Кузпалзэ данъяса, удмурт бизнесмен Нью-Йоркын кумышка вузанъя «Катюша» магазин усьтӥз.

Сергей Широбоков

Удмурт Дунне
By Удмурт Дунне 2 ноября, 2012 07:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<