Мон лобасько!

Удмурт Дунне
By Удмурт Дунне Ноябрь 23, 2012 03:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мон лобасько!

Мунё театрлэн сценаез вылын — аспӧртэм памятник

Малы ке шуоно театрын ужасько

Удмуртиысь Театр удысын тыршисьёслэн союззылы тырмиз 70 ар. Таин валче республикаысьтымы Мунё театре люкаськылӥзы шаерысьтымы артистъёс но режиссёръёс.

Залэ люкаськем калыкез пумитаса, Удмуртиысь Театр удысын тыршисьёслэн огазеяськонэнызы кивалтӥсь Александр Мустаев шуиз:
— Та огазеяськонмы кылдӥз туж секыт 1942-тӥ арын но бордаз огазеяз ог 30 муртэ. Быдӟым ожлэн нырысь аръёсаз артистъёс фронтэ кошкизы. Ворсаськытэк Ижын ужаз Мунё театр гинэ. Городэ кылизы актёръёслэн семьяоссы, озьы ик Москваысь но Ленинградысь театръёсысь артистъёс татчы эвакуировать каремын вал. Та адямиослы маин ке юрттон понна ик кылдытэмын вал таӵе огазеяськон. Сое кылдытон бордын тыршизы Удмуртиысь тодмо артистъёс Кузьма Ложкин, Клавдия Гаврилова но трос мукетъёсыз.

Пӧртэм аръёсы огазеяськонэн кивалтӥзы Соломон Гляттер, Георгий Любченко, Нина Бакишева, Леонид Романов, Геннадий Веретенников, Олег Никитин. Туннэ шумпотыны мугъёс вань, шаерысьтымы театръёс выльдӥсько, отчы егит артистъёс ужаны лыкто, шуиз Россиысь дано артист Александр Мустаев.

70 ар — со туж ик бадӟым лыдпус ӧвӧл, но тӥледлы вань маин ушъяськыны, пусйиз Удмуртиысь культурая, печатья но иворъёсъя министр Дмитрий Иванов.

— Та союзлэн валтӥсь ужпумез — сценалы тазалыксэс, кужымзэс но улонзэс сётӥсь адямиослы юрттон. Тӥляд со пӧрме. Республикаысьтымы артистъёсты но пусйыны кулэ. Тани 1989-тӥ арысен дорамы ортчись «Театр тулыс» фестивалез ик басьтом. Отчы республикаысьтымы вань театръёс тужгес усто ужъёссэс ӵекто. Соосты дунъяло Москваысь но Санкт-Петербургысь тодмо критикъёс. Но мон висъясал на эшшо кык Александръёсты: Волковез но Калягинэз. Малы ке шуоно Президентмы Александр Волков но Россиысь Театрын ужасьёслэн союзэнызы кивалтӥсь Александр Калягин трос лэсьто Удмуртиысь театръёслэсь улонзэс умойгес карон понна, — шуиз министр.

Союзлэсь юбилейзэ артистъёс мыло-кыдо пумитазы. Удмурт театрысь артист Пётр Романов верамъя, туж умой, таӵе союз кылдӥз шуыса. Сотэк, пе, артистъёсты ныркгес карыны выро вал. Удмуртиысь калык артист Романов огазеяськонэ пыриз 1977-тӥ арын.

— Азьло котькуд театрлэн сдачаяз ветлӥм. Со туж умой сям вал. Табере котькуд театр коммерциен вырись нимаз государство выллемгес луиз. Но театр — со творчество, искусство, татын ваньзэ манетэн лыдъяны кулэ ӧвӧл. Аресэ сярысь поттылытэк, мон туннэ но лобасько, малы ке шуоно театрын ужасько, — шуиз Пётр Романов.

Союзын 35 ар ӵоже Удмуртиысь калык артист Вячеслав Байков. Та ӝытэ со пырак репетициысь вуиз.
— Татчы люкаськемын ужез яратӥсь адямиос, малы ке шуоно аслэсьтыд удыстэ сюлмысь ӧд яраты ке, театрын тыныд номыр карыны, — мылкыдзэ усьтэ Вячеслав Байков.

Котькуд вордӥськем нуналын трос сяськаос но кузьымъёс луо. Праздникез дасясьёс залын пукисьёслы вазиськизы сяська керттэтъёссэс тырыны тодмотэм актёрлэн синпелетэз азе. Мунё театрлэн сцена вылаз аспӧртэм памятник пуктэмын вал: дунне театрлэсь историзэ нырысь тодмотэм актёръёс но актрисаос кылдытӥзы.

Галина Семёнова

Туспуктӥз Владимир Беломорских

Удмурт Дунне
By Удмурт Дунне Ноябрь 23, 2012 03:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<