Медальёсыз — нылкышноослэн гажамзы

Удмурт Дунне
By Удмурт Дунне Ноябрь 30, 2012 15:45

Медальёсыз — нылкышноослэн гажамзы

Н. Орлова

Редакциямы вазиськизы Ижысь 5 номеро нуны ваён юртын ужасьёс: бордамы, пе, тырше туж синмаськымон адями — акушер-гинеколог Нина Ивановна Орлова. Зћбыт, ушъяськыны валасьтэм. 49 ар ӵоже кӧня нуныос вордскизы ни со киын! Кӧня егит специалистъёсты со бурдъяз, удыссэс валаны-шӧдыны дышетӥз.

Ӝыныё талам нянь
Туж шер озьы луэ: адями сярысь гожтыны куро ӵош ужась эшъёсыз. Киямы чипей лыктэмлы — удмурт кизили ӝужамлы — кызьы уд шумпоты? Но озьы гинэ луысал ке. Нина Орлова гозызэ нуйтӥз на — пумиськонлы соку ик соглаш ӧз кариськы. Егитъёс сярысь гожъялэ ни, пе. Тышкаськыса но вуттӥз: сирпуос! Чылк-чылк удмурт манерен пумитъяськемез уката зыгатӥз, юатэк ӧйлась ни:
— Кытысь луиськоды, сокем чебер удмурт кылын вераськиськоды?
Но тани пумиськыны соглаш кариськиз!

— Дэриысь луисько. Мон пичи вакытэ отын удмуртъёс уло вал — али ӟуч кылэз ӵемгес кылод ни. Нош соку палэнысь вуисьёс но удмуртомылӥзы. Бускельёсмы Сибирьысь лыктэмъёс вал. Нылпиоссы удмурт ӟабыльтӥзы. Мар ке йыртэмамзы потэ ке, анай-атайёссы азьын удмурт сямен вераськылӥзы — соосыз уга мурт кыллы умой-умой ӧз дыше.

Быдӟым тылож кутскыку, Ниналы 2 арес вылэм ай. Бӧрысь вераллязы солы: тятяез фронтэ кошкыку, туж бӧрдыса кылем — сьӧраз улляськем. Семьяязы со ньылетӥез пинал вал, будӥзы куинь агайёсыз. Нош Нина бере, 14 ар ортчыса ни, вордскиз на вынзы.

Анай-атаез сярысь тодаз вайыкуз, Нина Ивановна синкылиоссэ ватыны уг быгаты:
— Мае но ӧз чидалэ соос. Война дыръя анайме дорысь адӟылыны уг луы вал. Самой кын корт куртчон вакытыз — 35-40 аресъем.

Таӵеосты ӧз жаляллялэ. Фронтлы гын сапегъёс гындылӥзы, гыризы-кизизы, нюлэс коразы… Нюлэскысь кык-куинь арнялы одӥг пол бертылэ ик вал — быдэс тэйӟемын. Мисьтаськылӥз-сузяськылӥз — нош ик уже. Милемыз учкизы песятаймы но песянаймы.

Зэм, война вакытъёсты Нина Ивановна умой-умой уг тод ни. Но сием потылонъёссэ уг вунэты. Агайёсыз сое акация мульыосын сюдылӥзы. Нонойзы (песянайзы) картошкаез, кӧмыныз ик вуштыса, одӥг-ог пыжылӥз.

— Калык 4 часын ӵукна бусые сюрлоен араны поталляз, — азьланьтэ веранзэ нылкышно. — Кин удыссэ котькинлэзь вазь быдтылӥз, солы чабей сётъязы. Со чабейлэсь ноноймы одӥг пол нянь пыжиз. Сокем тӧдь-тӧдь со потӥз ини, сокем ческыт… Сииськом, сииськом — кӧт уг тыры. Песятаймы ӝыные талаз няньмес — тырмоз, пе. Али валасько ни, шонер лэсьтӥз шуыса — сютэм улэм вылысь шуак сиськыса, шугомыны но кема ӧвӧл.

Ниналэн тятяез фронтысь берытскиз. Отӥяз быдэс улонзэ колхозын тыршиз. Колхоз ужез быдэстэмез бере но тэк пуконэз ӧз валалля. Килы туж усто вал: дуриськиз, вуриськиз, корка ӝутылӥз, гур пуктылӥз. Дэриысь тросэз наличникъёс солэн киосыныз лэсьтэмын ай. Шуылӥз: нылпиосы, будӥды ке, одно дышетске!

 

Быдэ вуон

Тужгес чылкыт уж

Нина 7 арескын школае вамыштӥз. Мугорыз туж пичи вал бере, дышетӥсез ялан кышкатъяз: ляб дышетскид ке, вуоно арлы кельтом. Нылаш тыршиз! Визьнодасезлэсь верамъёссэ сак кылзылӥз. Эшъёсыз малы ке туж уг ярато вал математикаез, нош Нина семаез кадь куадаз примеръёсты, задачаосты. Урокын киыз котьку ӝутэмын. Бен, урокысь улляллямзы вань. Парта сьӧрын ӵош пукись эшез, матысь ӵыжы-выжыез, ляб кылэ вал. Соин, куараез зол поттыса, вераськоно луылӥз. Вераськемез понна — ӧс сьӧры. Нина ӟеч тодылӥз: ӵуказеяз дышетӥсь одно юалоз выль темаез. Тыро-пыдо дасяськылӥз уроклы.

— Со вакытэ дышетӥсь но эмъясь сяна профессиосты ум но тодӥське вал, — шуэ Нина Ивановна. — Ижын кык институт гинэ вал: мед но пед.

Кин тодэ, Нина Ивановна, оло, дышетӥсьлэсь но сюрессэ лёгысал, сое ас вылаз мертаса ӧй вуттысал ке. 10-тӥ классэз йылпумъямез бере ик роно сое Докшаын математика, черчение урокъёсты нуыны куриз — дышетӥсьёс уг тырмо вал угось. Но

Нина Ивановна отын куинь толэзь чидаз: тросэз анай-атайёс юон вылэ чӧлскемын. Патере оген улӥсь кышномурт доры интыязы вал — соиз но ӟамыръя. Нылпиос эрказ лэземынэсь, уг кылзӥсько. Егит дышетӥсь отысь пегӟиз — кезьыт толалтэ пыдын 40 иськемлэсь кузь сюресэз ортчиз.

Отӥяз Нина Орлова кык арзэ Дэри школаяз физика но химия кабинетъёсын лаборант луыса ужаз на, собере мединститутэ пыриз.

Нырысетӥ кык арзэ дышетскон секытгес ик йӧтӥз гуртысь нылашлы. Ӟуч кылын умой-умой уд вераськиськы ай, татын латынез дышетоно ини. Школаез йылпумъямез бере кык ар ортчиз ни — тодон-валанъёс вуныны кутскизы. Но егит студентка ӧз сётскы — дышетскон борды ӝабыр-ӝабыр басьтӥськиз. Атаезлэн сузэрез окулист вал, со кадь луэмез потылӥз — тӧдьы халатэн ветлоз, адямиосты йӧнатоз. Ачиз синмаське вал терапевтлэн ужезлы — 5-тӥ курс бере гужемзэ Дэри ёрос больницаын ужаса но вуттӥз.

Но кылзэ вераз бадӟым агаезлэн кузпалыз Клавдия Алексеевна. Со кема аръёс ӵоже ужаз Дэри ёрос больницаын акушер-гинеколог луыса, шуиз:
— Нина, акушер-гинекологлэсь чылкыт уж ӧвӧл.

Бабуш луиз… чиган кенлы
Нина Орлова табере ачиз но озьы шуэ:

— Акушер-гинекологлэн кадь чылкыт уж, зэмен но, ӧвӧл. Син эмъясь-а тон, терапевт-а — адямиослэсь курадӟемзэс адӟоно, сюлмад басьтоно. Нош татын — шумпотон, выль лул вордске! Анайёс дортӥ ортчиськод — сюлэм шуна, котькудзылэсь нунызэс кутыса чупасал кадь, сыӵе мусоесь пото.

Нина Орлова ужаны кутскиз вал Кияса ёрос больницаын акушер-гинеколог луыса. Собере кӧнялы ке берытскылӥз вордскем Дэри палъёсаз. Семья кылдытэмез бере выжиз Иже.

Шуэ: ужаны кутскыку, астэ котьмае тодӥсь кадь потоно ни, азьдэ-бердэ чаклано ӧвӧл. Аръёс ортчемъя, опыт люкаськемъя кышкась луоно. Угось улонын котьмае адӟыса вуттӥськод — секыт учыръёс ӧжыт уг луо. Нуналлы быдэ лэчыт пурт вылтӥ кадь ветлӥськод.

— Таӵе учыр луиз ни, 5-тӥ нылпи ваён юртын ужакум, — тодаз вае Нина Ивановна. — Суббота нуналэ сменае лыктӥ. Шуизы: егит нылкышно, мединститутысь студентка, нуны вае. Нуныез бадӟым, потыны уг вормы. Нуныкарез шымыртӥсь эмъюмъёс уз юрттэ — висёнэз вань. Адӟисько: нуны вайись нылкышно пумен катьтэмме ни — ӟигарыз уг тырмы. Мар кароно? Бордам — егит акушер-гинеколог, соку гинэ ужаны кутскемын. Кинэн кенешоно? Таӵе учыръёс туж ӵем луо — аслыд сяна, нокинлы оскиськыны. Сюрес одӥг вал — кисэн (щипцыен) кысконо. Но со нунылэн син вадьсаз шедиз — мукет сямен уг луы. Нуны куаразэ сётӥз! Ныл. Но син вадесыз тӧрнамын, оло, синкӧльыез ик кисьтӥськемын…
Таӵе вакытъёсы Нина Ивановна Инмарлы вазиське, оске, со одно юрттоз.

— Акушер-гинекологъёс кык лул понна кыл куто: анайлэсь но тазалыксэ утёно, нуны но таза мед вордскоз. Осконтэк уг луы… Ноное талы дышетӥз ай, со ялан вӧсяськиз, пиосыз войнаысь мед бертозы шуыса. Бертӥзы кыксы но.

Таяз радэ но ваньмыз умой ортчиз — нылпи ваён юртысь нуны таза потӥз. Нош Нина Ивановналы удалтӥз на со нылпиен адӟиськыны. Быдэ вуэмез бере ни анаез сое Орлова доры саламен келям.

— Шораз учки — бакоми: сокем муспотон, чебер. Зэмос модель! Школазэ «витьёслы» гинэ йылпумъям, университетын, пе, дышетскисько ни, — тодаз вае эмъясь. — Бӧрысь но сюлмы шымырскылӥз на: Инмаре-кылчинэ, сыӵе нылаш бырыны быгатэ вал.

Куддыр озьы но малпасько: шуген вордскем нылпиос улон борды ӝабыр-ӝабыр басьтӥсько, азинсконъёс басьто. Кырылыса — кесарево сечение лэсьтыса — поттэмъёсыз лябесьгес — вордсконзы уго соослы каньылэн сётӥськемын, соин ик соосты шуг-секытъёс сабыны быгато.

Берло аръёссэ Нина Ивановна чакласа возе нуны вайыны дасяськись нылкышноосты. Роддоме одӥг пол лыктӥз чиган кышно.

Нуны вайыны дасяськись 13 аресъем кензэ со ваем. Куриз: кутэ вал, пе, тае дорады. Бадӟым кӧтыныз пиналъёс пӧлы футболэн шудыны пегӟе.

Анаез, атаез но анаезлэн сузэрез

Чиган кен Орловалэн отделенияз шедиз. Эмъясьсэ «бабушка» гинэ шуэ вал. Таиз пумитаз «что, внученька?» вазьылӥз. Чиган кен Орловалэн дежурствоез дыръя ик пияз — кырыса поттоно луиз.
— Ма, табере солы 17 арес вань ни, дыр, — вера Нина Ивановна. — Кыкетӥзэ пинал ваёно луэм. Нош ик — ми дорын. Монэ коридорысь адӟиз но «бабушка!» вазиське.

Та дыр ӵоже ужатозяз, Нина Ивановна пыр кӧня меда кышномуртъёс-анайёс ортчизы ни! Дораз нуны ваемъёслэн нунокъёссы табере анай луо ни — таосыз но Орлова доры курисько.

47-тӥ арзэ нылпи ваён юртын ужакуз, Нина Ивановна юромо лыдъяса пукиз: кӧня уйёссэ меда дежурствоосын ортчытӥз. Ог 10 арзэ! Нош вазен нуныос ӧжыт уг вордско вал. 5-тӥ нылпи ваён юртын араз ог 3 но ӝыны сюрсэз нырысетӥ куаразэс сётылӥзы. Собере соос 1 сюрс 800 котырозь усизы. Туэ 3 сюрс нуны вордскиз ни — шоркарысь кыкез нылпи ваён юрт огдырлы пытсаськылэмен.

Адскисьтэм ныпъет
Уй-нуналзэ дежурствоосын ортчытэмез сярысь веракуз, Нина Ивановна соку ик тодаз вае кузпалзэ Анатолий Фёдоровичез. Со сярысь часъёсын мадьыны дась:

— Вордскемын со Карлутка удмурт гуртын. Интыяз табере пуксемын ни автозавод. Гуртоос, пудо вордыса, ас хозяйствоенызы улӥллям. Заводэ ужаны ветлӥсьёсыз трос ик вылымтэ. Толя отысь школаын 4-тӥ классозь дышетскем. Ньыль класслы ик одӥг гинэ дышетӥсь вылэм, со но урокъёс дыръя аръян шуккыса пуке, пе, вал. Озьы Толяез выжтӥллям 30-тӥ школае — Карлуткалы со самой матысез вылэм. Со пыдын нюлэс, Восточной посёлок пыр огназ ветлэм. Кионъёсты кышкатон вылысь песянаез сюсьтыл лэзе, пе, вал.

Нинаен тодматскыкуз, Анатолий, пединститутысь физматэз йылпумъяса, школаын 9 ар ужаса вуттэм ни. Собере вуэм «Буммаше», инженере. Кузпалъяськыкузы ежесь ӧй вал ни. Нина Ивановна нырысетӥ пизэ, Вадимзэ, 29 аресказ вайиз.

Кыкетӥзэ, Алексейзэ — 37 аресказ.
— Ӵошен улыкумы ни, Анатолий кыкетӥ вылӥ образование басьтӥз на, Кировысь химикотехнологической институтэз йылпумъяз.

Анаез шуоз вал: э-э, пие, сокем-а, мар-а тон визьтэм, кыкетӥзэ дышетскиськод на. Жаль, картэн артэ улыны кема ӧз кылды — 23 ар. Пенсие но потыса ӧз вутты, улонысь кошкиз — пал кылеме дырысен но тани 23 ар ортчиз ни. Мынам со туж удалтэмын вал.

Ӧз кыскы, ӧз юы. Пиналъёсме тыро-пыдо учкылӥз, сиён но ачиз ик пӧзьтылӥз. Одӥг пол 4 толэзьлы дышетскыны кошки — пал кыл но ӧз керӟегъяськы, чидаз, — шуэ нылкышно.

Нина Ивановна шӧдӥз: кемалы кошкылэмез бере кузпалыз сое уката дунъяны кутскиз. Валаз, луоз: макем бадӟым ныпъетэз кышноез ворме. Уг гинэ адӟиськы со. Нылпиосты утялтон сяна, анайзэс но учконо на вал. Анатолийлэн мумиз, секыт висемысьтыз, ньыль арзэ султылытэк кыллиз. Пересьмыса но со нылъёсыз доры улыны ӧз мыны. Одӥг пол огез нылыз доры выжылӥз ик — кык арня чидаз. Собере сиськемысь воксё дугдӥз — Нина доры монэ нуэ, куриз.
Нина Ивановна — зћбыт сямо кышномурт, котькинэн одӥг кыл шедьтэ, анаенызы но кылзы туж тупалляз.

Сизьым пӧлысь огзэ быръён

Нина Орловалэн пиосыз кемалась быдэ вуэмын ни, асьсэлэсь семьяоссэс кылдытӥзы. Но анайзэс уг вунэто. Нунокъёсын шумпотто. Бадӟымезлы внучкаезлы 19 арес тырмиз — Ижысь медициная академиысь студентка. Туэ отчы пыриз. Нылпи эмъясь, пе, луо. Нина Ивановна солэсь мылкыдзэ ӟечен лыдъя — ачим но, пе, нылпиосты туж яратӥсько.
— Пичиез внучкае туэ нырысетӥ классэ мынӥз, — данъяське Орлова. — Дотово шаплы, дышетскыны пӧрмытэ, пианиноен шудэ.

Ужын

Школае огназ мынэ-бертэ ни…
Тодаз вае на, кызьы солэсь вордскемзэ пусйиз. Ӵош ужась эшъёсызлы ӧз вера вал, роддомазы кенэз нуны вае шуыса. Ӵуказеяз ӵукна ик пӧраськиз, ваньзэс утялтоно кариськиз:
— Витетӥзэ песянай луи!

Шуэ: нуныосын висъетэ пыри, отын соос 7 кузя ныс кӧло. Аслэсьтымзэ соку ик тодмай! Воксё асьмелэн тусмы пуксемын ук, кызьы уд шӧды!

Кыкез ик кенъёсыз пиналъёссэс 5 номеро нылпи ваён юртын вордӥзы. Но Нина Ивановна огзэс но ачиз ӧз куты. Озьы пӧрмиз.
— Кыкетӥ кенэлэн уйшор бере куинь часын кӧтыз позыръяны кутскиз, — тодаз вае Орлова. — Монэ сайкатэ, уд мыны-а, пе, сьӧрам.

Серектӥ: быдэс семьяен пинал вордом-а. Угось пие со сьӧры мыныны дасяськиз на, пинал ваён вӧзаз ик сылӥз но. Бӧрысь вера ини: мама, тӥляд отын войнаын кадь.

Возьмаськись пукон

Нина Орлова арлыдзэ уг ваты — туэ март толэзе пусйиз 73 арессэ. Но котькуд ӵукна вамышъя огдышем сюресэз кузя.
— Инмарлэсь курисько, пыдъёсы гинэ уж дурам мед вуттозы, — шуэ со. — Уже, отысь эшъёсы мыным улон борды ӝабырскыны, возиськыны кужым сёто. Егитъёс пӧлын астэ уга егитэн шӧдӥськод. Ӵош ужась эшъёсы монэ ноку унь-мань уг каро, пӧлазы басьто. Коллективмы туж усто. Вань сюлэмзэс-лулзэс сётыса, тыршо.

Алигес Нина Орлова шуккиськыны шедьылӥз, 10 толэзьзэ дораз пукиз. Уж дораз лыктэ но — пуконэз сое возьма, отчы нокин пуксьымтэ. Нина Ивановна нош ик кыштыр ужаны кутскиз.

— Мон туж яратӥсько нылкышноосты, — азинтэ веранзэ. — Куанеръёссэ но, узыръёссэ но, кырсьёссэ но… Котькудӥзлэн аслаз улон сюресэз. Кышномуртлэн улонэз капчи ӧвӧл — трос чидано. Нош нуны ваён юртын соос ваньзы ненегесь, оскиськисесь. Сюлэмзэс усьтыны дасесь.

Нина Орлова котькудзэс валаны-кылзыны быгатэ, ӟеч кылыныз шунтэ-либатэ.

Одӥгез туж паймытӥз: ӝыны даур пала ужатозяз, со одӥг грамотаен но, медален но пусйымтэ. Кызьы сое адӟытэк кельтӥллям кивалтӥсьёсыз — валантэм. Востэмезлы луыса, оло?

— Дан сьӧры ноку ӧй уйиськы, марлы кулэ со? — шуэ Нина Ивановна. — Мар карысал со медальёсын? Мынам медальёсы — нылкышноослэн гажамзы, дунъямзы. Ураметӥ нунокеным ортчиськом. Тросэз ӟечбуръясько, дугдыса ик лабырто монэным. Нуноке пайме: песянай, кытысь тонэ ваньзы тодо? Кызьы ӧвӧл мон шудо? Яратон пӧлын пыласькыны кылдӥз.

Элина Кумачёва

Удмурт Дунне
By Удмурт Дунне Ноябрь 30, 2012 15:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<