Лабгаын атасъёс но педуньясько

Удмурт Дунне
By Удмурт Дунне 23 ноября, 2012 04:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Лабгаын атасъёс но педуньясько

Вылӥ Парзиысь Педунь

Глазов ёросысь Люм (Лабга) гуртысь культура юртын кылем пятницае ортчиз «Лӧпшо Педуньлэн бенефисэз» вожвылъяськон. Со радъямын вал арлы быдэ ортчись «Эшъяськон вуюись» фестиваль улсын.

Ёрос администрациысь культурая, егитъёсын ужан политикая, физкультурая но спортъя управленилэн кивалтӥсезлэн Маргарита Солдаевалэн верамезъя, куать гуртъёсысь Педуньёс мылкыд каризы вал бенефисэ пыриськыны. Играысез но глазов лӧпшоос доры вуттӥськыны турттэ вылэм. Куд-огзэ кузь сюрес кышкатэм, лэся, нош кинлэн ке пӧяськон пуйыез пасяськем. Но кылемъёсыз Педуньёс калыклы мӧзмыны ӧз сётэ.

Ми но, «Удмурт дуннеын» ужасьёс, машина тыр люкаськыса, Ижевскысь Лабга кеме серекъяны ветлэммес кематэк ум вунэтэ. Шулдыръяськон ӝыт чакламын 6 часын ке, доразы вуимы нуназе бере 2 часын ик. Ужлы ӧм ёрме, газетэ гожтымон удмуртъёс татын вамышлы быдэ — но «Удмурт дуннеен» эшъяськемысь берло дыре малы ке дугдӥллям.
Юри Педуньёс доры лыктӥмы шуыса, лабгаос воксё паймо. Нош асьсэды маскарчиосын уд паймыты вылэм. Кочегарын ужась Василий Терёшин шуэ, магазинэ пырамзы бере милям ваньзы сямен Педуньлы пӧрмо. Но Люмысь воргоронъёс сазь йырын но маскаръяськыны ярато: љыт џоже соос но сцена вылэ педуньяськыны потазы. «Секонд-хендысь» дӥськут бырйыса, визьзэс, эктыны быгатэмзэс возьматӥзы.

Нош палэнысь вуэм маскарчиос куинь номинациосъя нюръяськизы: асэнызы тодматӥзы, миниатюраос возьматӥзы, вашкала арберилы реклама лэсьтӥзы. Люкаськемъёсты тужгес паймытӥзы но кӧт висьымон серекъятӥзы штанигуртъёс. Серекъян-маскаръяськон удысын Штанигурт муниципал кылдытэтысь лулчеберетъя но ваньмон дырез радъянъя «Искра» центрысь «Штат-базар» комикс-группа «Мынам Удмуртие» телерадиокомпаниысь «Шурикъёсты» но синмаськытэм.

Ньылетӥ арзэ ини апрель толэзе Глазовлэн «бакча бераз» интыяськем Штанигуртын юморлы сӥзем «Штат-базар» фестиваль ортче. Отчы пырисько республикаысьтымы но маскарчиос. Комикс-группа ас котыраз огазея куать-сизьым муртэ. Культура удысын ужасьёс сяна, пӧлазы пырисько гуртысь огшоры ужасьёс. Педуньлэн бенефисаз калыкез шулдыртӥзы культурая центрысь нылпиосын ужан ёзэн кивалтӥсь Людмила Фалалеева (доярка Степанида) но чеберлыкъя кивалтӥсь Ольга Корепанова (колхоз председатель Митрофан — Степанидалэн картэз).

Сцена вылэ потаса но залэтӥ ортчыса, вакчи дыр куспын соос быдэс спектакль кылдытӥзы, шуыны луоз. Степанида пӧяськыса кошке Педуньлэн бенефисаз, залын пукисьёсты люке трос йӧл сётӥсь скалъёслы, ветылъёслы но али гинэ кунян ваемъёслы. Ошъёслы визь-кенеш сётъя…

Слудкаысь артистъёс

Вань йӧспӧръяськемзэс кылыны но адӟыны кулэ. Фалалеевалэн кылъёсыз тысез куадам кадь палдо, солэн Степанидаезлэн пинь улаз сюр гинэ — куаӵак мар ке вералоз. Нош Корепанова удмуртэн шугъяське вераськыны, соин быдэс сюресме, пе, удмурт кылъёсты тодам вайыса лыктӥ. Серемес веранъёсынызы газет лыдӟисьёсмес но тодматыны малпаськомы вал. Шуизы, милям, пе, кылъёсмы йырамы гожтэмын, нокыӵе сценариймы ӧвӧл.

Синмаськытӥз Слудкаысь Педунька но — Василиса Антонова. Эшъёсыныз ӝыт ӵоже пӧртэм серемес суредъёс кылдытӥзы. Жаль, удмурт сямен вераськыны шугъяськиськом, пе, миниатюраоссы ӟучен дасямын.

Адамысь Глафира Сизова кема аръёс ӵоже ини нылпи садын Педуньлэсь ужзэ быдэсъя, ачиз ик такмакъёс гожъя. Удмурт выжыкылысь геройлэн тусыз со борды юн бурмем ни. Озьы ке но шумпотоно, маскарчилэсь кузэ воргоронъёс мертало ке. Бенефисын Педунькаос пӧлын одӥг гинэ Педунь вал. Таиз Вылӥ Парзи гуртысь кочегар Владимир Борисов. Воргорон мыло-кыдо пыриське гуртысьтызы художественной самодеятельносте, кырӟа, маскаръяське.

Курегъёс пӧлы одӥг атас сюриз шуыса, вылды, конкурсэз радъясьёс, Глазов ёросысь культурая центр, диплом вӧзы Парзи Педуньлы зэмос атас кузьмазы. Солэсь зэмос луэмзэ ас вылаз шӧдӥз Александр Леонтьев. Шулдыр ужрадэ вуттэмез понна кырӟасьлэсь но ӝытэз нуыны юрттӥсьлэсь чибориё атас вань калык азьын бамзэ кокчалтӥз. Солэн но, лэся, педуньяськемез потӥз.

Лия Малых

Туспуктӥз Владимир Беломорских

Удмурт Дунне
By Удмурт Дунне 23 ноября, 2012 04:46