Кырӟан яратэ шыпытэз

Удмурт Дунне
By Удмурт Дунне 13 ноября, 2012 10:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кырӟан яратэ шыпытэз

Узей-Тукляысь арганчи Виктор Анисимов но Пантелей Кузнецов

Алнаш ёросын вордӥськем крезьгурчилы но Уваысь «Купанча» калык ансамблен кивалтӥсьлы, Россиысь культура удысысь дано ужасьлы Пантелей Кузнецовлы 24-тӥ шуркынмонэ 75 арес тырме.

Пантелей Кузнецовлэн юбилеез кык полэс, нырысетӥез — арлыдыз, кыкетӥез — Уваысь культура удысын тыршемезлы 50 ар тырмиз. Шаерысьтымы тросэз коллективъёс, кырӟаны яратӥсь адямиос понна Пантелей Кузнецов яратоно крезьгурчизы луэ. Нош «Купанча» ансамбльлы туэ 21 ар тырмиз ини, отысь кенакъёслэн кивалтӥсьсытэк кырӟамзы ик уг поты. Пантелей Николаевич висьыку, мукет мурт ансамбльын ужаны кутскиз вал, но нылъёс репетициосы потамысь дугдӥзы. Артистъёс но крезьгурчи-арганчи ог-огзы борды бурмемын ини. Пантелей Николаевич выль гур малпа ке, нырысь ик ансамбльысь нылъёсызлы возьматэ.

— Туннэ нуналлы 850-лэсь уно кырӟанъёсы ини. Арняяз одӥгзэ ке но гожтыны тыршисько. Крезьгуре кылдэ, семья изьыку — уйин. Кырӟан уго шыпытэз яратэ. Куд-ог дыръя шуак йырам лыктэ: мон таӵезэ малпай вал кадь ини. Черновикъёсысь учкисько но, зэмзэ но вань ини, тӥни озьы но луэ. Мынам кырӟанъёсын ньыль сборнике потӥз ини, али дасяське витетӥез. Выль ар азьын киям куто ни, дыр. «Ува гуръёс» нимаськоз со. Отчы 90 пала удмурт но ӟуч гуръёс пыризы. Ӟуч кырӟанъёс пӧртэм авторъёслэн кылъёссыя малпамын, удмуртъёсыз — Ува ёросысь усточиослэн кылбуръёссыя, — шуэ Пантелей Николаевич.

Крезьгурчиослы капчи ик ӧвӧл кырӟанлы тупась чуръёс шедьтыны. П. Кузнецов но трос газет-журналъёсын утчаське, Ува ёросысь гожъяськисьёсын пумиськылэ. Тани Ува районысь тодмо дышетӥсьлэн но шаерчилэн Евгений Эжбаевлэн кылъёсызъя кырӟан гожтӥз. Со дырысен кык воргоронъёс эшъяськыны кутскизы. Крезьгурчилэсь юбилей ӝытсэ но Евгений Эжбаев ик радъяно кариськиз. Со ортчоз Уваын декабре.

Алигес Пантелей Николаевич редакциямы выль кырӟанъёссэ вуттӥз. Соосты одно ик дунъялозы, дыр, шаерысьтымы кырӟаны-вераны яратӥсьёс.

 Туспуктӥз Владимир Беломорских

 

Удмурт Дунне
By Удмурт Дунне 13 ноября, 2012 10:35