Кылмес уд кылы…

Удмурт Дунне
By Удмурт Дунне Ноябрь 30, 2012 14:32

Кылмес  уд кылы…

Ньыль ар возьмам ужрад одӥг нуналэ уг тэры

Удмурт калыклэн сюлмаськытӥсь, быдэстымтэ ужпумъёсыз, мукет выжы калыкъёслэн сярысь, данаклы тросгес. Соин «Удмурт кенешлэн» матэктӥсь 12-тӥ съездэз азьын малпанме вератэк уг чидаськы.

…Удмурт калык понна национальной политика валтӥсь ужпум луыны кулэ. Нош туннэ Кун Кенешысь та удысъя комиссие одӥг удмурт но пыремын ӧвӧл. Чаклано ведь таӵе ужпумъёсты, ас ӧраз ӧвӧл лэзёно. Та комиссиын одно ик удмуртъёс но луыны кулэ вылэм. Татчы пыртыны луысал А. Ураськинэз, П. Чушъяловез.

Удмурт калыклэн сюлмаськытӥсь, быдэстымтэ ужпумъёсыз, мукет выжы калыкъёслэн сярысь, данаклы тросгес, нош ньыль арлы огпол радъяськись съезд ортче одӥг нунал гинэ. Таӵе съездъёслэн пайдазы туж ичи. Ӝыны час доклад, одӥг час прениосын вераськон, нуназеян, быръёнъёс, концерт но чыры-пыры. Секциос ужало-а, уг-а. Прениосын вераськыны сётоно ваньмызлы мылкыд карисьёслы.

Мукет выжы калыкъёс одӥг нунал гинэ съездъёссэс уг ортчыто ук. Бигеръёс но башкиръёс 7-8 нунал, мордва, мари но коми — 3-4 нунал. Поръёс туэ гужем 18-тӥ июньысен 21-тӥ июнёзь кенешизы. Асьмеос, удмуртъёс, улыны ке чакласьком на, куинь нуналлэсь ичи медаз луэ съездъёсмы. Дасяськыны ке уг вутто, съездэз бергес но луоз ортчытыны.

«Удмурт кенеш» кылдэм дырысен тросэз пуктэм ужпумъёс быдэстэмын ӧвӧл. Элькунамы кутэмын кылъёс сярысь закон. Асьме кылмы бумага вылын одӥг радэ пуктэмын ӟуч кылын. Нош уж вылын пичи но озьы ӧвӧл. Кылмес городын общественной интыосын уд кылы. Шуом, Ижын автовокзалъёсын, транспортын удмурт кылын ивортонъёс  чузъясько вал. Али кытын? Шат огпол кутскем ужез азинтыны кынармы уг тырмы?

Шулдыръяськыса гинэ ӧвӧл улоно, мургес пыриськоно политикае, кылэз, калыкез утёнэ. Будэтоно наӵ-наӵ удмурт сюлэмо егитъёсты, кысконо соосты политикае. Мед луысал «Удмурт кенешлэн» но Егитъёсын ужанъя министерстволэн удмурт нылъёсты но пиосты будэтонъя-дасянъя программаоссы. «Удмурт кенеш» мед быгатысал вылӥ должностьёсы дэмланы удмурт  адямиосты.

Ужано удмурт калыклэсь лыдзэ будэтон бордын. Асьмелэн шаермы данъяське трос нылпи вордэменыз. Шат удмурт семьяосын пиналзы ӟуч луыса югыт дуннее потэ? Ичи лыдъем калыкъёс радэ мынам пыреме уг поты.  Мордваос кылем перепись азьын калыксылэсь лыдзэ ӝутон понна быдэс ар ужазы палэнын улӥсь диаспораосынызы. Асьмелы но соослэсь адӟем кароно вал, асьме выжыосмы пӧлын но сыӵе уж нуоно.

Николай Васильев
Иж

Удмурт Дунне
By Удмурт Дунне Ноябрь 30, 2012 14:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<