Кыл — со дуннелэн кылбуретэз

Удмурт Дунне
By Удмурт Дунне 7 ноября, 2012 10:35

Кыл — со дуннелэн кылбуретэз

Ж.-Л. Моро

Франциысь тодосчи но кылбурчи Жан-Люк Моро кылъёсъя но шундыӝужан цивилизациосъя институтысь профессор кыкетӥзэ удмурт шаере вуылӥз.

Егит дырысеныз ини Жан-Люк Моро тунсыкъяське Удмуртиен. МГУ-ын дышетскыкуз, тодматскиз университетын тодон-валан люкась удмурт студентъёсын Пётр Черновен но Василий Ванюшевен. Нош нырысьсэ асьме доры вуиз 14 ар талэсь азьло. Али куноякуз, Жан-Люк Моро трос пумиськонъёс ортчытӥз. Паймымон: тодосчи куамынлэсь ятыр кыл тодэ!

— Француз кылэз гинэ тодон, мон понна, ӵошатымон француз гинэ кылзонэн, — шуэ Жан-Люк Моро. — Озьыен, адями уг тоды Бетховенэз, Бахез но трос мукет кунъёсысь крезьгурчиосты. Кыл — со дуннелэн кылбуретэз. Нош мон бадӟым дуннелэсь пичи гинэ люкетсэ тодӥсько. Кылсярысь, ӧй дышеты на япон но китай кылъёсты. Кылэз мон дышетӥсько чеберлыко текстъёсын тодматскон понна. Кылсярысь, мон грек сямен уг вераськиськы, нош Константинос Кафавислэсь кылбуръёссэ лыдӟисько.

— Мар бордысен фин-угор кылъёсын тунсыкъяськонды кутскиз?

— Парижысь институтэ пыреме бере куинь кылэз дышетыны басьтӥськи. Малпасько вал германист луыны. Собере поляк но венгер кылъёс борды басьтӥськи. Эшъёсы но мынам пӧртэм кылъёсты дышетӥзы. Студент дыръя одӥгеныз (берлогес со Сорбонна университетлэн профессорез луиз) эшеным ми выль кыл малпамы. Кыӵе кылын тӥ вераськиськоды? — юало вал. — Нош ми кутӥм но камасин кылын шуим.

Сибирьын куке но камасин калык улэм. Ми, егитъёс, малпамы, камасин кыл быремын ни шуыса. Нош 1914-тӥ арын фин тодосчи Кай Доннер эшшо пумитам на камасинъёсты. Соос пӧлысь егитэз 40 аресъем ни вал.

Тодосчи луэме бере кылӥ, камасин кыл литературной луэм шуыса. Совето шаерысь тодосчиос Алтайысь берпуметӥ камасин кышномуртэз пумиталлям. Со Инмарлы оскись вылэм — молитваосты вордскем кылаз берыктыса гожтэм. Таллинын фин-угор конгрессын мон со кышномуртэн — Клавдия Плотникова-Анджигатоваен — тодматски.

Василий Ванюшев но Пётр Чернов мыным мадьылӥзы удмурт шаер, италмас сярысь. Пётр монэ удмурт куараосты вераны дышетӥз: ӝ, ӟ, ӵ. Удмурт кыл чебер кылӥське, нош грамматикаез венгер но фин кылъёслэн кадь. П. Черновен ми «Вуж Мултан» романэз каллен-каллен лыдӟыны кутским. Угось венгер тодосчи Петер Домокош вераз, та роман удмурт улонлэн энциклопедиез шуыса.

Удмурт кылэз дышетыкумы, мон весь малпаськылӥ: верано-а, ӧвӧл-а студентъёслы Удмуртия сярысь туж ӧжыт тодӥсько шуыса. Студентъёслэн юалляськемзы бере каллен материал утчаны кутски. Озьы удмурт кылэз дышетон книга ачиз ик кылдыны кутскиз кадь. «Ойдолэ вераськом удмурт кылын» учебнике пыриз Удмуртилэн картаез, удмурт кыллэн грамматикаез, чеберлыко текстъёс.

— Тӥ француз кылын Ашальчи Окилэсь кылбуръёссэ поттӥды.

— Бен, солэсь кылбуръёссэ кемалась ик ӧвӧл мон лыдӟылӥ ЮНЕСКО огазеяськонлэн нылкышно поэзилы сӥзем ужрадаз. Лыктэм калык паймиз мур пуштросо луэмезлы.

— Кельшо-а тӥледлы удмурт кышномуртъёс?

— О-о! Кышное туж шумпотэ, мон Удмуртие 40 ар талэсь ӧй лыкты шуыса (серекъя). Мон али шутэтскыны потӥ ини, нылпи литератураен вырисько. Удмуртиез туж адӟеме потыса лыктӥ. Ижкар чеберскем — Европалэсь уг висъяськы ни.

* * *

Жан-Люк Моро Франциын нылпи литератураысь тужгес но ӟеч писатель. Куд-ог выжыкылъёсыз солэн ӟуч кылэ берыктыса книгаен потэмын.

Кык арня ӵоже Удмуртиын куноякуз, Жан-Люк Моро студентъёслы лекциос лыдӟылӥз, Ижысь нылпиосын пумиськылӥз, удмурт черк службае но пыралляз. Татчы ветлэмез сярысь профессор видеофильм дасяны малпа.

Удмурт Дунне
By Удмурт Дунне 7 ноября, 2012 10:35