Кык кылын бӧксӥсь кунян

«40 ар йӧлтэк» колхозын оптимизация ужрадъёс йылпумъяськизы. Одӥг гинэ тракторзэс вузаса, гуртоос сеялка басьтӥзы. Сое, пе, вал кыскалоз. Озьы трослы дунтэмгес усе

Туэ «Ю-нянь тю-тю» колхозын чабей уз кизе. Мугез одӥг: колхозын кидыссы, пе, тю-тю.
* * *
Бакча сиёнъёсты утялтон ужпумъёсъя кенешъёсы ветлэменызы Песятайлэн но Песянайлэн сяртчызы бакчаязы ик кылиз.
* * *
Ӝыныкукей гуртысь Матрон кенаклэн курегъёсыз чоръяны кутскиллям. Табере кышномурт возьма атасэзлэсь пузамзэ.
* * *
Туж аспӧртэмлыко кунян вордӥськиз «40 ар йӧлтэк» колхозлэн Скалгурт фермаяз. Солэн кык кылыз. Татысь пудо утисьёслэн верамзыя, али гинэ вордӥськем кунян удмурт сямен но, ӟуч сямен но бӧксыны быгатэ.
* * *
Шаерамы картофка октонзэс тужгес но вазь быдэстӥзы «Ю тысь тю-тю» эштосын. Ужъёссы соослэн валля арын ик йылпумъяськизы: со дырысен гуртоос одӥг картош но ӧз мерттэ ни.
* * *
Толон Маскара гуртысь Параска Ижкаре выставкае ветлэм. Адӟытонэ вуылэмез бере мылкыдыз солэн туж урод вал: шораз учкись луымтэ.
* * *
Ижкарысь трамвайын ветлон дунэз дас манет каремзылы Шачамача гуртын улӥсьёс нокыӵе но ӧз кариське. Вань улытозязы соослэн Ижкарез но, трамваез но, дас манетэз но адӟылэмзы ӧвӧл.
* * *
«Одӥг манет» колхозысь тракторист Иван Ӝыныёиванов сӥё-дано нимен пусъемын: со — дано механизатор. Воргорон трактореныз туэ гужем нуналлы быдэ 100 гектар музъемез гырылэм. Озьы со гуртоослэсь ужзэс трослы капчиятӥз. «Одӥг манет» колхозын туэ турын но дасяно ӧз луэ, ю-нянь но ӧз утялтэ: вань бусыосты дано механизатор гырыса быдтэм.

Лӧпшо Педор