Котьмалэсь дуно — улон

Удмурт Дунне
By Удмурт Дунне 27 ноября, 2012 12:04

Котьмалэсь дуно — улон

Ижысь сюресъёс вылын  шурдыт

10 толэзь ӵоже Удмуртиысь сюресъёс вылын 1 сюрс 274 шуккиськон учыр пусъемын, 215 мурт улонысь кошкиз, 1 сюрс 496-ез сӧсырмиз — арлы быдэ пичигес гурт быре питранъёс улын.

Югдурез сэрттон вылысь котырес ӝӧк сьӧрын кенешон ортчиз. Пумиськонэ люкаськизы пӧртэм удысын ужась кивалтӥсьёс, сюресъёс вылын бырыны шедем муртъёслэн ӵыжы-выжыоссы.

Секыт зӥбет
— Берлоез шимес учыр вал 10-тӥ ноябре Ижевск-Глазов сюрес вылын. Машинаос ваче шуккиськыса, куинь мурт быриз. Руль сьӧрын пукисьёс азе арысь аре чурытгес куронъёс пуксё ке но, шумприч водительёслэн лыдзы уг кулэсмы. Тросаз шуккиськон учыръёсын кык но солэсь трос адямиос быро, — вераз ГИБДД-лэн кивалтӥсез Альберт Галимов.

Руль сьӧрын ворттылыны мылкыд карисьёслэн лыдзы ялан йылэ. Туннэ нуналлы Удмуртиын транспорт возисьёс 700 сюрслэсь ортчо. Шаерысьтымы сюресъёслэн кузьдалазы ог 12 сюрс иськем пала кыстӥське. Чугун сюрес вамен выжон интыос 200-лэсь трос. Котькуд сюрес воже чакласькисьёсты уд пукты. Россиысь бадӟым городъёсын инспекторъёслы юртто видеокамераос. Удмуртиын соос чиньыен лыдъямон гинэ ай.

Ӝог ворттылӥсьёсты кыл кутытон улэ кыско, штраф тырыто. Жаляса верано, законэз тӥясьёс пӧлысь ог 60 процентэз гинэ дыраз тыро штрафъёссэс, нош 20 процентэз судъя приставъёслэсь лыктэмзэс витё.

— Шуккиськон учыр дыръя туж валаса ӝог юрттэт сётоно, эмъясьёс быдэсъяло ке но «зарни часлэсь» правилозэ, бырисьёслэн лыдзы уг кулэсмы, — шуиз Ижысь 1 РКБ-ысь анестезиологияя но реанимацияя ёзэн кивалтӥсь Павел Тверитнев. — 149 мурт шуккиськон интыын ик кулӥз. Больницае вуттэмъёслэн улонзы понна но кужмо нюръяськоно луэ.
Кенешонэ люкаськемъёс пусъё: матысь адямиен люкиськон — секыт зӥбет. Шуккиськон учыръёс дыръя куд-ог водительёс кыл кутонлэсь пегӟыны тыршо. ДТП-осты адӟем муртъёсты жингыртыны куро, оло, ӵапак тӥляд юрттэмды кинлэсь ке улонзэ утёз.

Укыр етӥз, укыр шумприч
Кема ворттылэм водительёслэн верамзы потэ, туала егитъёс, пе, сюрес вылын асьсэды укыр эрказ возё: правилоосты тӥяло, мынӥсь-ветлӥсьёсты уг синйылто, ӝог ворттыло.

Котькуд куинетӥез шуккиськон учыр дыръя янгыш луо руль сьӧры али гинэ пуксемъёс, право басьтэм дырысенызы 2 ар но ортчымтэос. Малпан кылдэ, автошколаосын тыро-пыдо тодон-валан люкаса ӧвӧл вуттэмын, оло нош чик но ӧвӧл дышетскемын. Автошколаослэн лыдзы зор бере потэм губиос выллем йылэ. Удмуртиысь инспекторъёс ӝыны ар ӵоже соосты эскеризы. 27 школа «сьӧд» списоке шедиз. Сюресъёс вылын тужгес трос пол шуккиськон учыре шедьылӥзы Воткаысь «ВИКО», Ижысь «Формула», «Автошкола УКП», «Сюрес», «Премьер» автошколаосты, Сарапулысь ДОСААФ-лэсь автошколазэ йылпумъям водительёс.

Мукетыз но малпаськытэ. Школаез йылпумъясьёс пӧлысь 30 процентэз гинэ, огполскын экзамен сётыса, право басьтыны быгато. Тыро-пыдо дышетскем интые, вуоно водительёс кузьмаськон амалъёс утчаны кутско.

— Бен, туала куронъёслы тупась автошколаос Россиысь куинь городын гинэ кылдытэмын, — веранзэ азьланьтӥз ГИБДД-лэн кивалтӥсез Альберт Галимов. — Асьмелэн водительёсты умой дышето Ярысь политехникумын, Сюмсиысь 34 номеро профучилищеын, Ижысь «Альфа», «Гармония», 42 номеро училищеын но мукет автошколаосын.

Оло кыл кутӥз, оло тӧлатскиз…
Кун Думаысь депутатъёс чурыт закон кутон сярысь верасько. Туннэ нуналозь адямиез лёган учыр юри малпамтэ йыружен лыдъяськиз. Шат руль сьӧрын пукисьлэн ымаз кужмысь вина кисьтало? Озьы бере, кудӟем мурт тодыса вылысь руль сьӧры пуксе. Сыӵеосты визьманы кулэ: штрафъёслэсь быдӟалазэс чутрак йылэтоно, руль сьӧрын ворттылон правозэс басьтоно, оло, машиназэс но талано. Выль ӵектонъёсты Кун Думаысь депутатъёс матысь сессиын эскерыны кулэ.

Тросэз тодо на, луоз, 2010-тӥ арын Ижын луэм учырез. 26-тӥ июне выжон уе Вормонлы 40 ар но Первомайской ульчаослэн сюрес вожазы быризы кык инспекторъёс. Соку Сергей Сунцов но Азат Шамсиев кудӟем водителез Андрей Воронцовез ас машинаенызы дугдытӥзы. Воронцовлэн вираз 1,15 промилле курытэз шараямын вал. Первомай ёросысь судлэн решениезъя Воронцов котыр ласянь янгышен лыдъямын. Сое 5 ар но 8 толэзьлы пытсэт сьӧры — колоние-поселение — келязы вал, но… Со дырысен кык ар но кӧня ке толэзь гинэ ортчиз, нош адями виись пытсэт сьӧрысь потӥз ни.

Сюрес вылын бырыны шедем инспекторъёслэн матысь адямиоссы туннэ но судъёстӥ кыстасько, зэмлыкез утчаса.

— Ӝыны ар ортчиз ни тротуаретӥ мынӥсь нылме кудӟем водитель лёгам дырысен, — шуиз та ужрадэ лыктэм атай Дмитрий Лысенко. — Куинь пол суд улэ шедьылэм воргорон, мурт машинаен адямиез лёгаса, шуккиськон учырысь пегӟе. Ньыль час ортчыса, инспекторъёс йыртэмасез ӝегато. Со дыр куспын шумприч водитель, янгышамзэ валаса, ачиз полицие вазиськем. Адями лёгасез чурыт кыл кутытон улэ кысконо вал, нош солы 5 ар но ӧз сётэ. Асьме законъёсмы паймыто.

Йыртэмасьёс полицие асьсэос вазисько ке, нош таяз учыре со адвокатэн вуэмын вал, кыл кутытонзы ӧжытак небӟе. Кызьы пусйиз Удмурт Республикая Следствиея управлениын ужась Андрей Тронин, таяз учыре со водителез 4 ар но 8 толэзьлы пытсэт сьӧры келязы.

Пиштод — кыдёке адскод
— Шуккиськон учыръёс пото на мынон-ветлон правилоосты тодымтэмы бордысь но. Школаосын, нылпи садъёсын тросгес саклык висъяно вылэм соосты дышетонлы, — шуиз Альберт Галимов. — 10 толэзь куспын 135 шуккиськон учыр нылпиосын герӟаськемын, 13 пинал быриз, 133-ез сӧсырмиз.

Берло дас арез эскерыса потоно ке, сюресъёс вылын туэ котькулэсь трос нылпиос бырыны шедемын. Шуккиськон учыре ӵемгес шедё 10-14 аресъем пиналъёс 12 часысен 15 часозь — ӵапак дышетскыны мынон-бертон вакытазы. Ӵем дыръя янгыш луо водительёс, покчи нылпиосты соос уг синйылто яке сюрес уг сёто. Сыӵе шуккиськон учыръёс тросгес пусъемын Вотка, Глаз, Балезино, Камбарка, Пичи Пурга ёросъёсын. Пассажир чотын ворттылыкузы но, пиналъёс бырыны шеде. Нылпиосын герӟаськем шуккиськон учыръёс тросгес пусъемын Можга, Сарапул, Вотка, Алнаш, Грак, Дэбес, Дэри, Эгра, Пичи Пурга, Ува но мукет ёросъёсын. Водительёс вунэто пиналъёссэс нимысьтыз креслое пуктыны, еэн думыны.

Инспекторъёслэн туж бадӟым йыр висёнзы — скутерен ворттылӥсьёс. Нылпиоссылы дуно кузьым басьтыны быгатӥсь анай-атайёс асьсэлы куректон шедьто. Сентябрь толэзе Якшур-Бӧдья сюрес вылын скутер но МАЗ машина шуккиськизы. Пичи скутер сюрес сётымтэ бадӟым машиналы. Озьы 15 аресъем егитъёс Алексей Покошев но Мария Иутина быризы. ГИБДД-ын ужасьёс нимысьтыз саклык висъяны куро пиштӥсь дӥськутлы. Дӥсь борды бырттэм пиштӥсь арбери асьтэлэсь но, нылпиостылэсь но улонзэс утьыны быгатоз.

Валентина Емельянова

Туспуктӥз Владимир Беломорских

Удмурт Дунне
By Удмурт Дунне 27 ноября, 2012 12:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<