Концертын

Удмурт Дунне
By Удмурт Дунне 27 ноября, 2012 05:50

Концертын

Митрофан но Степанида

Учке-ка, учке, Олён мурт картэн артысь пуке. Толон но урамын вераськыса сыло вал. Маке но татын вань. Так, так. Олёнлэн картэзлы вератэк уз луы.

Отын тӥни Матвей пуке. Нош ик нылпиоссэ дорысьтыз уллям. Кышнозэ жугыса, корказ пытсаса кельтэм. Ачиз нош концертэ лыктэм. Тӥни, мыжыкъёссэ кырмаса пуке, кинэн жугиськоно вал шуыса. Ой, Тюрьма Валя пыре. Таосыдлэн туннэ жугиськытэк уз ортчы. Адӟытэк медам кыльы вал.

Нош Натальлэн йыраз лушкам кышет керттэмын. Возьыттэм, калык пӧлы коть озь эн пот вал! Ваньмыз адӟизы ук, кылем арын Штанигуртысь Манька ныл брагае сыӵе кышетэн лыктылӥз. Котьмае ведь капыртоз, аслыз кароз.

Нош соиз кин? Маке уг тодмаськы. Нош кыӵе дӥсяськемын: кӧт пась, штанэз пилиське ни, кортӵог каблукъёсыз дас вить сантиметр кузьда. Нош ымнырыз буёл улысь уг адскы. Бен та Парсьпи Анжела ук! Выль карт, вылды, утча. Куиньзэ воштӥз ни. Кин вӧзы меда пуксёз? Вот тонэ жугиськись Матвейлы сётоно вал, ымнырад буёл но кулэ ӧй луысал.

Тӥни Скал Маня Йӧлпыд Наталь вӧзтӥ монъяськыса ортче. Ӧй ву ук учкыны толон куспазы ченгешемзэс. Тамаша, дыр, вал. Мон Пупыд Иванне выль телевизорзэ миськыны ветлћ. Ӝыны гурт люкаськылӥз. Иванэдлэн ассэ узыр возьматэмез потэ: 25 сюрсэн, пе, «Рекорд» басьтӥ. Ма, мон карысь учки вал, куать сюрс гинэ сылэ. Нош отын пукытозямы, Скал Маня, пе, Йӧлпыд Натальлэсь четверть кумышказэ гулбечысьтыз поттэм. Кытчы меда кариз четвертьсэ?

Тӥни отын чус гинэ пуке гажано адями — электрик Лёня. Тыл но пыртоз, электрочайниктэ но, телевизордэ но — ваньзэ тупатъялоз. Вот ужамез понна коньдонэн ке басьтысал, миллионер луысал ни, дыр. Бензин Толя музэн. Таиз, колхоз бензинэз палэнэ вузаса, корка но пуктӥз, машина но басьтӥз ни.

Нош пумазгес йӧн-йӧн пуке Наталья Афанасьевна, Офонь Наталь. Дышетсконзэ быдтыса, колхозамы валтӥсь бухгалтер луыса ужа. Кузёмылэн дусымез. Ой! Трос, лэся, вераськисько ни. Мон татчы сценаез миськыны потӥ вал, шуизы, концерт мынэ, берло, пе, миськод. Тӥни, артистъёс но дасесь ни. Мар? Кошкы, шуиськоды? Концерт мынэ? Тӥ-а потыны кулэ? Бен потэ ук, потэ. Кошкисько ни, кошкисько.

Галина Ларионова,
Глазов ёросысь  культурая центрын ужась

Удмурт Дунне
By Удмурт Дунне 27 ноября, 2012 05:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<