«Кипучей но, могучей но…» Ма сётэ кылысь кылэ берыкъян

Удмурт Дунне
By Удмурт Дунне 21 ноября, 2012 11:32

«Кипучей но, могучей но…»  Ма сётэ кылысь кылэ берыкъян

В. Пантелеева

Удмурт кылэ берыктэм вань чеберлыко литератураез Национальной библиотекаын ужасьёс 2009-тӥ арын пыртӥзы электрон указателе. Люкаськиз 4 сюрс 152 книга но нимаз произведение. Берыктэм литературалэсь историзэ мон 5 вакытлы люкыны дэмласал.

19-тӥ даурлэн кутсконэз — 20-тӥ даурлэн кутсконэз
1775-тӥ арын удмурт письменностьлэн кылдэмез нырысь ик герӟаськемын вал христианствоез вӧлмытонэн. Со ик кутскон сётӥз берыктэм литературалы. А. Уваровлэн «Югдытӥсьёс» книгаяз (1994-тӥ ар) верамын 1824-тӥ-1917-тӥ аръёсы потэм ог 100 текстъёс сярысь. Ваньмыз сямен герӟаськемын осконэн — Евангелие, Часослов, Требник но мукет. Берыктэмын ляб, туала удмурт адямилы валантэм. Удмурт кыллэсь кабъёссэ (законъёссэ) нырысьсэ чакланы выриз удмурт кылэз ӟеч валась адями — дышетӥсь, югдытӥсь И. Михеев. А. Уваров малпамъя, солэн 1904-тӥ арын 4 Евангелиосты берыктэмез бордысен кутскиз удмурт литературной кыллэн азинскон сюресэз.

20-тӥ даурлэн кутсконэз — 1918-тӥ ар
Та вакытэ — ог 15 ар ӵоже — удмурт кылэ берыктон трослы воштӥськиз: осконлы дышетӥсь текстъёс вӧзы вуизы ни революцилы сӥзем ӟуч кырӟанъёс, басняос, со вакытысь югдур, инкуазь сярысь кылбуръёс, ӟеч сямъёслы дышетӥсь нылпи веросъёс. Та вакыт дуно соин: берыктэм черк литератураен ӵош удмурт чеберлыко литературалэн инъетэз кылдыны ӧдъяз.

Соку ас мылкыдзыя берыктонэн выризы грамотаез тодӥсь адямиос (ӵемгес — дышетћсьёс, газет поттћсьёс), тросгес берыктэмын выжыкылъёс, А. Кольцовлэн кылбуръёсыз, Л. Толстойлэн но К. Ушинскийлэн нылпи веросъёссы. Берыктонлэн мугез — калыкез югдытон. Берыктэмын, ӟуч кылъёсты удмуртъёсыныз огшоры вошъяса гинэ, удмурт кыллэсь аспӧртэмлыксэ чаклатэк.

Но 1918-тӥ арын азьлане бадӟым вамыш лэсьтӥз Ашальчи Оки: А. Пушкинлэсь «Если жизнь тебя обманет…» («Гажан эше!» А. С. Пушкинъя) кылбурзэ воксё выль сямен берыктӥз. Нырысь ик, со дорозь нокин ӧз кутскылы лирико-философской кылбуръёс борды, берыкъязы малы ке дышетӥсьёссэ, кытчы ке ӧтисьёссэ гинэ. «Гажан эше!» лыдӟисьлэсь сюлэмзэ бугыртэ мур малпанэныз, чебереныз. Кыкетӥез, Ашальчи Оки берыктон ужен бӧрысь ноку ӧз вырылы ни ке но, та берыктэм кылбурез али но вужмемын ӧвӧл, али но малпаськытэ но чылк-чылк удмурт сямен чузъяське. Озьы кылбурчилэн бадӟым талантэз азьпалтӥз дырез, кылиз дауръёслы.

1918-тӥ ар — 20-тӥ даурлэн шорыз
Берыктэм чеберлыко литературалэн куинетӥ вакытэз тужгес тунсыкоез, узырез, но со вакытэ ик сое пӧртэм сямен дунъяны луэ. К. Дзюиналэн «Удмуртская книга» ужезъя лыдъяны-чотаны луэ: пусъем аръёсы печатламын 395 берыктэм чеберлыко произведение: котькуд дас арлы быдэ ог 100 книга! Писательёс берыктон вылын гожъяськыны дышетскизы. Писательёс гинэ ӧз — ваньмыз, кинлэн мылыз потэ, тужгес но егитъёс: кык кылын вераськыны быгатонзэс (билингвизм) волятон понна. Соин ик паймонэз ӧвӧл, та вакытысь берыктэм данакез произведениос литературае нокыӵе пытьы ӧз кельтэ шуыса.

Озьы шуыны уг луы Кузебай Герд сярысь. Со берыкъяз удмурт кылысь ӟуч кылэ, ӟучысь удмуртэ, аслэсьтыз произведениоссэ но вераса (со нимаське автоперевод). Со луиз нырысетӥез профессиональной переводчик, мукетъёсызлы сюрес возьматӥз: берыктэм произведение оригиналэзлэсь номыр ласянь но ляб медаз луы. Со понна куштӥськоно кылъёсты вошъяса гинэ берыктонлэсь (буквализм), произведенилэсь пуштроссэ берыктоно вераськон кылын, калыклы валамон фразеологизмъёсын, лэчыт веранъёсын. Берыктэм произведение лыдӟись понна мурт шуыса медаз шӧдӥськы, лыдӟыку кыл медаз бералскы.

Жаляса верано, Герд историлэн вуберганаз бырем бере берыктон нош ик пӧрмиз кылъёсты вошъянлы, куд-ог дыръя удмурт суффикс гинэ лякылӥзы. Кылсярысь «кипучая, могучая, никем непобедимая» кырњан чур луиз «кипучей но, могучей но», 1938-тӥ арын потэм «Антирелигиозные рассказы» бичетлэн нимыз — «Антирелигиозной рассказъёс».

Репрессиослэн лек кӧ улазы шедьымтэ писательёс, ас произведениоссэс гожъяны кышкаса, басьтӥськизы нылпи произведениосты берыктон борды. Книгаос печатласькизы кӧня ке пол 5-10 сюрс экземплярен. Берло таӵеез ноку ӧй вал ни. Берыктэм литература вылын трос удмурт нылпи поколениос будӥзы, пичи дырысен анай кылын кылзэм, лыдӟем выжыкылъёс соосты выжыенызы герӟазы.

20-тӥ даурлэн шорыз — 1980-тӥ аръёслэн шорзы
Вуиз берыктонлэн зарни вакытыз. Совето Союзысь калыкъёслэн эшъяськонзы адӟиськыны кулэ вал литератураоссы вылын но. Удмурт литератураын со аспӧртэм шӧдӥськиз: берыктэм произведениослэн лыдзы йылӥз, нош берыктэм произведениосын книга поттон кулэсмиз. Иське, кытын печатласькизы ужъёс? Газет-журналъёсын но дышетскон книгаосын. Табере ӟуч кылэз вань удмуртъёс тодо ини, книга поттыны кулэлыкез ӧвӧл, шуизы, вылды, кивалтӥсьёс.

Азьло сямен ик, удмуртысь ӟуче, ӟучысь удмуртэ берыкъязы. Фин-угор литератураосты тодэ вайись ӧй вал. Одӥг-ог произведение берыктэмын ке но, ӟуч кыл пыр: фин-угор кылъёсты тодӥсьёс соку туж ичи вал. Удмурт литератураез но фин-угор республикаосын, кунъёсын адӟисьёс ӧй вал.
Озьы ке но фин-угор кылъёсты эскерисьёслэн 4-тӥ конгрессы азьын 1975-тӥ арын печатламын Ш. Петефи венгер кылбурчилэн куинь кылын (удмурт-ӟуч-венгер) книгаез. Переводчикъёсыз кӧня ке мурт, пӧлысьтызы В. Кельмаков, Г. Архипов берыктӥзы шонерак венгер кылысь, ӟуч кыл вылэ «кожатэк».

Та вакытэ берыктэм литературалэн ӟечлыкез оглом будӥз, текстъёс матын луизы удмуртъёслэн вераськонзылы. Нимысьтыз висъяны луысал Н. Байтеряковез — 1960-тӥ аръёсы нырысьсэ берыктӥз С. Есенинэз. С. Перевощиков ӟечлыко берыкъяз пьесаосты но лирикаез. В. Романов А. Пушкинэз удмуртомытӥз. П. Поздеевлэн Быдӟым ож вакытысь берыктэм кырӟанъёсыз али но кельышлы.
1980-тӥ аръёслэн шоразы ортчем воштӥськонъёс культурае, литературае трос шуг-секытъёс вайизы ке но, берыктонэз азинтон понна усьтӥськизы выль инвисъёс.

1980-тӥ аръёслэн шорзы — туала вакыт
Али берыктон уж асьме литератураын ваче пумит сюресъёс вылын сылэ: одӥг ласянь, ӟуч, фин-угор, Европаысь мукет литератураосты ас пушказ кыске, нош мукет ласянь, ачиз сярысь Удмуртилэн палэназ, быдэс дуннелы вераны выре. Соин валче берыктон уж литератураен герӟаськем ужпумъёс сьӧры потэ, солэсь паськытгес луэ, шуом, этнокультураен герӟаськем проектъёслэн туала валтӥсь тодметэз яке оглюкетэз. Берыктон уж пиар шуон валатонэн пќлэстӥське.

Брангурт песянайёсты ик басьтоно ке, дуннелы соос нырысь ик тодмо луо ӟуч эстрадаысь хитъёсты удмурт кылын быдэстэменызы. Кин соослы кырӟанъёсты берыктэ, кыӵе ӟечлыкен — нокин уг юа. Калык гинэ мед паймоз, мед тодмалоз.

Озьыгес ик дунъяны луэ 2000-тӥ аръёсысь «Удмурт кылын ӟуч классика» проектэз. Н. Витрук кивалтэм улсын удмурт кылын печатламын С. Есенинлэн, Н. Некрасовлэн, М. Лермонтовлэн, А. Пушкинлэн, А. Кольцовлэн кылбуръёссы, А. Пушкинлэн «Евгений Онегинэз». Соос умой берыктэмын ке но, жаляса верано, удмурт лыдӟись доры бер вуизы. Табере удмуртъёс, жаляса верано, асьсэ литературазэс но уг лыдӟо ни, ма веранэз берыктэмез сярысь. Соин туала вакытысь ӟучысь удмуртэ берыктэм произведениосын ӵемгес тунсыкъясько тодосчиос яке аспирантъёс, нош огшоры лыдӟись доры соос уг но вуо, собере кулэлыкез но ӧвӧл кадь. Переводчикъёс но та учыре тросгес сюлмасько кадь ас нимзэс данъян но проектъёс пыр коньдон басьтон сярысь. Нош берыктэм текстлэн пуштрос но кыл ласянь ӟечлыкез нокинэ уг ни сюлмаськыты.

Фин-угор кылъёсысь удмуртэ берыктонын мукетгес югдур. Нырысь ик кылдӥзы венгер литератураен кусыпъёс — 1997-тӥ арын Ижын потӥз «Дунай тулкымъёс — Кам ярдурын» антология. Сое дасязы Удмуртиысь калык писатель В. Ар-Серги но Венгриысь тодосчи, удмурт кылэз ӟеч тодӥсь И. Козмач. Со лыдӟисьёс понна но тунсыко, удмурт литератураез но узырмытэ, берыктӥсьсэ но дышетэ.
2001-тӥ арын А. Уваров нимаз книгаен печатлаз финъёслэсь «Калевала» эпоссэс.

Берло 10 ар куспын удмурт кылэ берыктэмын даслэсь трос эстон книга. Та понна трос сюлмасько Арво Валтон но Надежда Пчеловодова. Эстониын потӥз удмурт кылбурчиослэн 4 кылын (удмурт-эстон-англи-ӟуч) 7 книгазы.

Туала вакытысь переводчикъёс тодо ини кунгожсьӧр кылъёсты, берыктон понна соослы ӟуч подстрочник кулэ ӧвӧл. Берыктэм произведениослэн ӟечлыксы оглом будӥз, азьло вакытъёсын ӵошатыса. Но со дыре ик… Берыктэм произведениосты рос-прос нокин уг эскеры, уг дунъя — зэмос критика ӧвӧл. Собере, зэмос лыдӟись но вань на меда?

Вера Пантелеева,

кылосбур наукаосъя кандидат

Удмурт Дунне
By Удмурт Дунне 21 ноября, 2012 11:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<