Эшъёсыз дунъяло, калык гажа

Удмурт Дунне
By Удмурт Дунне 9 ноября, 2012 15:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Эшъёсыз дунъяло, калык гажа

Подполковник А.Ураков

Югдурез утён удысын ужасьёс кыкетӥ арзэ пусъё Полицилэсь нуналзэ. Ӝыны даур пала 10-тӥ ноябрь вал милицилэн нуналэныз. Реформа ортчиз, нош МВД-ын тыршисьёслэн праздниксы ӧз воштӥськы. Удмуртиысь 10 сюрс пала полицейскойёс туннэ пумитало нуналзэс. Соос пӧлын Ижысь полицилэн 5 номеро отделэныз кивалтӥсь подполковник Антон Ураков.

Кин ке пичи дыръяз лётчик, водитель, спортсмен луыны малпа ке, Антон нылпи садын ик вералляз: луо милиционер. Та мылкыдыз юнме шорысь ӧз кылды. 1970-тӥ аръёсы заводын тыршись бубызэ Григорий Павловичез милицие ужаны ыстӥзы. Озьы бадӟымез Ураков участковой луиз. Нырысь Ижын ужаз. Татын ик Антон вордскиз. Отӥяз милиционерлэн ужан тубатъёсыз вошъяськизы, выльдӥськиз улон интыез но.

— Ижын вордскыса, кытын но ӧй улы, — шуэ Антон Григорьевич. — Дэри ёросысь Первомайский посёлокын будӥ. Туж усто аръёсы ортчизы Якшур гуртын. Татысь нылпи садын визьмаськи, Якшурысь ик начальной школае мынӥ. Пичи Пурга районысь Пугачёвоын улӥсь песянае Зоя Андреевна Уракова удмурт кыллы дышетэ вал ке, Якшурысь эшъёсы пӧлын ачим но удмурт сямен ӟабыльтыны кутски. Соин алдаме кельтыны нокин ӧз ни быгаты.

Бубызэ Кияса районэ ӝоген келязы. Татын со ёрос милицилэн кивалтӥсезлэн воштӥсез дорозь будӥз. Киясаын Антон 9-тӥ классозь дышетскиз. Нош собере анаезлы ӵогем кадь вераз: Иже мыно, юридической классын тодон-валан люкало. Та пумысен бубиныз Антон кемалась кенешиз вал ни. Майор Ураков пиезлэн мылкыдызлы пумит ӧз мыны. Визь-кенеш гинэ сётӥз: милициын зэмзэ но ужамед потэ ке, дышетскем сяна, калыкен огъя кыл шедьтыны быгатоно.

Юридической классэз йылпумъяса, Антон капчиен пыриз МВД-лэн Нижний Новгородысь академиезлэн Ижысь филиалаз. Колледжын кык ар визьмаськиз, сое горд дипломен йылпумъяз но уже куриськиз. Вылӥ тодон-валан, пе, заочно амалэн басьто. Кабинетын пукытозь, йыртэмасьёсты утчало.

Уже интыяськыкуз но, капчи сюресъёс ӧз утча. Горд дипломен муртлы Иже кыльыны луонлык вал, нош со Удмуртилэсь воксё мукет сэрегзэ бырйиз. 19 аресаз Глазовысь уголовной розыске куриськиз. Кышкыт но секыт йыружъёсты сэрттонъя отделын егит оперлы капчи ӧй вал. Но уж кыдатӥз сое. Бӧрысь выжиз наркотикъёсты вӧлмытонэн нюръяськонъя отделэ.

2002-тӥ арын Антон Григорьевичез ӧтизы Иже, республикаысь МВД-е уголовной розыскъя управление. Татын ужез туж тунсыко но секыт вал — антиквариат но мукет дуно арбериосты лушкан учыръёсты сэрттӥз-пертчиз. Юнме уг верало, оперативной ужын кивалтӥсьёс кыдало шуыса. Тани асьме МВД-лэн кивалтон ёзъёсаз но — оперын нырысь-валысь кыдам муртъёс. Та службаын йыртэманъёсты но сэрттоно, законэз тӥясьлэсь но кылзэ пертчоно, огшоры адямиосын но кусып тупатыны быгатоно. Таӵе практика бере нокыӵе уж кышкыт ӧвӧл ни.

Ижын кык ар куспын Ураков ассэ зол возьматӥз. Соин 2004-тӥ арын егит муртэ Каракулиноысь РОВД-ен кивалтӥсьлы воштӥсе юнматӥзы. Татын Антон Григорьевич ассэ интыяз шӧдӥз. Ужез пӧрме, эшъёсыз дунъяло, калык гажа. Соин кытчы ке выжон-тэтчан сярысь ӧз ни малпаськы — гань-гань кариськыса, кредитэн корка басьтӥз. Собере семья кылдытӥз, пиез вордскиз, садаз виноград мерттӥз.

***
Кунгож сьӧрын юнме уг верало, адями, котькуд 7 ар ортчыса, ужзэ вошъяны кулэ шуыса. Соку, пе, со выль интыын бадӟымгес возэз нуыны пӧрмытэ. Ураковлы но Кам шур вӧзысь черкогуртын гань-гань улыны ӧз ни сётэ — 2011-тӥ арын Иже ӧтизы. Уго реформа ортчыку, Югдурез утёнъя министерствоын трос вераськизы кадръёсты выльдон сярысь. Озьы 30 аресъем воргоронэз Ижысь полицилэн кивалтӥсезлы воштӥсе пуктӥзы — таяз радэ но Антон Григорьевич оперативной уж понна кыл кутӥз. Нош 2011-тӥ ар пумын Ижысь полицилэн огаз ёзаз бадӟым йыруж шараяськиз. Кык оперативникъёс йыртэмасьёслэсь талам героинэз вузаны малпазы… Таӵе учырез МВД ӧз ваты. Республикаысьтымы югдурез утёнъя министрлэн приказэзъя оперативникъёслэн йырзы — уголовной розысклэн кивалтӥсез — ужысь уллямын, нош райотделлэн кивалтӥсез пичигес должносте васькытэмын вал. Та дуринчи карез кияз кырмиз Антон Ураков — кык толэзь ӵоже егит мурт быдэсъяз районысь полициен кивалтӥсьлэсь ужзэ. Нош туэ март толэзьысен подполковниклы 5-тӥ — Индустриальной — отделэз оскизы.

Ӧй чида ни юатэк:
— Тӥледлы 32 арес. Нош тӥ быдэс районысь полиция понна кыл кутӥськоды ни. Чаклано ке, реформа бере полицилэн тусыз выльдӥськиз, но огез сюлмаськытэ ик — котькыӵе ёзъёсын кивалтӥсьёс укыр егитэсь кадь.
— Полицие вазиськись муртъёслэн арлыдмы пумысен юанъёссы уг кылдо. Соослэсь сюлэмшугъяськонзэс быдэстыны пӧрмытӥськом ке, ужмы ӝегатскытэк, шонер лэсьтэмын ке, соку егит но шаплы луэммес дунъяло гинэ, — пусъе Антон Григорьевич.

***
Республикаысьтымы бадӟым люкетэз йыртэманъёс Ижын тупало бере, татын служба капчи уг ортчы. Тани Индустриальной ёрос мукетъёсызлэсь висъяське трос шулдыръяськон интыосыныз. Татчы пыро 10 пала таӵе центръёс. Кытын юон но шулдыръяськон — отын йыружъёс.

Депутатъёс юнме уг куто кудӟытӥсь юон вузанэз кортнась законъёсты. Югдур син куспын воштӥське. Тани 23 час бере тросэз кафеос ворсасько. Иське, бер уйин юыса калтыртӥсьёс ичигес луо. 1-тӥ июльысен зол нюръяськон мытэмын сурен вуз карисьёсты пачкатон вылысь. 130-лэсь трос вуз карисьёс кыл кутон улэ кыскемын. Зэм, та уж капчиен уг мыны. Тани Ижлэн шор районъёсаз таӵе учыръёс кулэсмо ке, городлэн пыдлось сэрегъёсаз интыяськем ларёкъёсты зол кырмоно на.

— Юон бордысь потэмын мукетыз сюлмаськон но — кӧня ар ӵоже уг ни ужало вытрезвительёс. Тани милям отделамы нуналлы быдэ вутто 30 пала тяп-тяп кудӟем муртъёсты. Полицие ваё документтэм муртъёсты гинэ. Татын соосты 3 час ӵоже возиськом. Котькуд нунал сямен кудӟемъёс доры «скороез» ӧтчано луэ. Юэмъёс сазьтӥськыса но уг на вутто — соосты лэзьыны кулэ ни. Сюрес вамен пото гинэ — доразы бертэм интые, выльысь аракы утчаны кошко. Нош ульчаетӥ костаськись кудӟем мурт ачиз йыртэмасьёс ки улэ ӝимоз яке законэз витьымтэ шорысь тӥялоз, — сюлэмшугъяськонзэ маде Антон Григорьевич.

Подполковниклэсь нуналмысь уж сярысь сюлмаськемзэ куспетӥ карисько:
— Мӧзмыт ӧвӧл-а оперативниклы бумагаос, отчётъёс пӧлы выйыны, эскеронъёсын потаны?
— Та ужын тросгес пайда ваёнэлы оскисько, — шуэ Ураков.
Соин егит кивалтӥсьлэн ужын будон сюресэз эшшо вольыт мед луысал. Матысь аръёсы Антон Григорьевич тодон-валан люкалоз на Россиысь МВД-лэн академияз. Кин тодэ, оло, азьланяз солэн паськыт пельпумъёсыз вылын чилялозы генерал погонъёс.

Елена Скворцова

Туспуктӥз Владимир Беломорских

 

 

 

Удмурт Дунне
By Удмурт Дунне 9 ноября, 2012 15:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<