Ярская — яркыт

Удмурт Дунне
By Удмурт Дунне 28 ноября, 2012 12:52

Ярская — яркыт

Кристина Ярская

Кристина Ярская удмурт кылзӥсьёслы тодмо луиз «Элькуновидение» вожвылъяськон бере. Отын со нырысетӥ инты ӧз басьты ке но, аслаз куараеныз быдэс залэз паймытӥз.

— Кристина, туж тодэм потэ ни, кин тон сыӵе? 

— Мон — студентка (мыня). Дышетскисько Ижысь крезьгуръя колледжын. Яратӥсько калык кырӟанъёсты. Озьы ик тодон-валан люкасько на Ижысь искусствоосъя школаын. Анай-атае крезьгурен выро бере, мон 4-5 аресысеным кырӟасько ни.

— Тон кырӟаськод удмурт сямен. Нош кылэз умой тодӥськод-а? 

— Мон — ӝыныё удмурт. Анай-атае монэн удмурт кылын ноку ӧз вераське. Но анай кылэз мон ӧжытак валасько. Тыршисько вераськыны. Мыным туж кельше удмурт лулчеберет: удмурт дэремъёсысен кутскыса, кылан-буранозь.

— Татчыозь удмуртъёс пӧлын тон сярысь рос-прос тодӥсьёс ӧй вал. Яркыт кизили кадь мальдӥд «Элькуновидениын».

— Вожвылъяськон сярысь тодӥ вокалъя дышетӥселэсь. Аслам продюсереным Наталья Хачироваен келяй гожтэт, та ӵошатсконэ пыриськеме потэ шуыса. Кинэ жюриос вормисе бырйизы, соиз асьсэлэн ужзы. Мон малпасько вал, дунъясьёс пӧлын луозы профессионалъёс, кудъёсыз вокалъя но крезьгур стилья ваньзэ тодо. Янгышаськем…

— Тужгес но вожед потэ куараез пуктӥсьёслы. Соосын йырин тонэ умой кылыны ӧз луы, шуиськод. 

— Бен, та вожвылъяськонын куара туж урод пуктэмын вал. Нырысь со сокем зол вал, монэ кылзыны ик ӧз луы. Берло нош воксё но куараме «пичиятӥзы», соин инструментъёслэн чузъяськемзы гинэ кылӥськиз. Малпасько, жюри но, куара пуктӥсь но профессионалъёс луыны кулэ. Котькуд кырӟась 60 процентлы оскиське куарая режиссёрлы, солэсь ваньмыз потэ ук. Уката сцена вылын ик инструментэн шудо, фонограмма уг пукто ке.

— Кызьы дунъясалыд удмурт эстрадаез? 

— Удмурт эстрадаен мон тодмо ке но, ялан сое уг кылзӥськы. Соин умой дунъяны но уг быгатӥськы.

— Кызьы тон малпаськод, удмурт эстрада аслаз пуртыяз гинэ пӧзьыны кулэ, яке сое вӧлмытоно. Кылсярысь, Брангурт песянайёс сямен. 

— Малпасько, соос умой быгатӥзы. Шонер аранжировка лэсьтӥд ке, крезьгур стиль бырйид ке, вашкала удмурт кырӟанлэсь выжыоссэ но уд ышты, дуннее но тодмо луод. Кырын 21-тӥ даур! Удмурт культура мукетъёсызлы туж ик кулэ ӧвӧл, асьсэлы удмуртъёслы но со акыльтылэ. Соин удмурт лулчеберетэ туала шӧм одно ик пыртоно, соку дуннеын но удмуртъёс сярысь тодозы, асьмелэн но эстрадамы узырмоз. Тросгес кылзом асьме крезьгурез. Кышкано гинэ ӧвӧл.

— Кыӵе кырӟасьёс тыныд ярало? 

— Кылзӥсько соул, госпел, джаз, блюз. Яратӥсько калык кырӟанъёсты. Туж кельшо Christina Aguilera, Mariah Carey, Whitney Houston, Лариса Долина, Марина Девятова но Zventa Sventana (тани таиз туж умой суралтэ ӟуч калык кырӟанэз джазэн но пӧрмытэ туала продукт).

Лукерья Шихова

Туспуктӥз Владимир Беломорских

Удмурт Дунне
By Удмурт Дунне 28 ноября, 2012 12:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<