Гуртэ вадьсын пиштэ шунды

Удмурт Дунне
By Удмурт Дунне 27 ноября, 2012 12:15

Гуртэ вадьсын пиштэ шунды

Мувыр гурт

Эгра ёросысь Мувыр гурт пӧртэм вакытэз чидаз. Куке-соку отын нимаз «Лоза» колхоз но вал. Но солэсь улонзэ куспетӥ кариз выльдӥськон.

Мувыр гуртын будэм но вань улонзэ дышетон удысын тыршем Тамара Стрелкова вордскем палъёссэ туннэ кадь ик син азяз возе.

Гуртсы пичи вылэм. Покчи классын дышетскисьёс артысь Каргурезе ветлӥзы, отӥяз тодон-валан люкаллязы Зураысь 7 классъем школаын. Зураын дышетсконзэ йылпумъяса, Тамара Герасимовна Можга педучилищеез, собере Глазысь пединститутэз быдтыса, вордскем палъёсаз берытскиз. Покчи классъёсты визьнодась бордысен школа кивалтӥсёзь будӥз.

Гуртлэсь вашкалазэ тодон вылысь дышетӥсь вазиськиз Мувырын улэм арлыдоослы. Юалляськемез бере паймем: ваньзылэн сямен гуртоослэн Корепанов фамилизы вылэм.

Документъёсты эскерыса, шараяськиз: Мувыр кылдэм 1859-тӥ арын. Гурт сярысь тазьы, пе, пусъемын вал: «Мувыр интыяськемын Глазов уездысь Вятской губернилэн Сарапулэ нуись Лоза шур кузя кыстӥськись сюресэзлэн бур палаз — Глазов городлэсь 95 километрлы палэнын» («Список населённых мест  по сведениям 1859-1973 гг.» — С.-Петербург, 1876, с. 164). Та гуртын соку одӥг юрт вылэм, дас улӥсез, пӧлысьтызы ӝыныез — нылкышноос.

19-тӥ даурлэн кыкетӥ люкетаз артысь Зура черкогуртэ вуэм ӟуч купец Илья Тупицин. Со пуктэм кык этажъем юрт. Зураос сое туннэ ке но тупичин корка яке белый дом шуо. Лоза шуре со вуко ӝутэм. Гуртоос тодазы ваё на: татын, пе, изыса улэм Каргурезь гуртысь Ларкапи выжыысь Корепанов. Ужан интыяз со пичигес корка пуктэм. Та интыез али Мырккорканюк шуо. Кӧня ке улыса, ошмесысь вуэз бырем но, Корепанов Мувыр палась ошмесо интые юрт пуктэм. Кышнояськем, пиоссы вордскиллям. Будыса соос яна потӥллям. Озьы гурт арысь аре паськытам.

— Мувырлэн кылдэмез сярысь мукет веранъёс но ветло, — тодаз вае Тамара Герасимовна. — Лоза шур вылэ нырысь ик вуко пуктэм Шулятьев купец. Ужасьёсты медъям, соин но, дыр, та интыез али но Шулятькенер шуо. Али со интыез быдэсак сик басьтэмын. Пересьёс верамъя, Шулятьев вукозэ Тупицинлы вузам. Со вакытэ ик Зура палъёсын улэм Тупицинлэн Лукьян агаез, солэн но кык этажъем коркаез, пыжиськон интыез вылэм. Со Зураын вуз карем нянен, сушкаен, пряникен.

Зура электростанцилэн выжез

Лоза шурлэн паллян палаз Зелёный Бор гуртэ мынон сюрес вылэм. Отын пужым суллэсь скипидар пӧзьтылӥллям. Нош Лозалэн бур ярдураз Егорты (ужасезъя озьы нималлям) котырын кызьпу туйлэсь тэкит пӧзьтылӥллям. Аръёс ортчыса, сир пӧзьтон инты ӝуам.

Граждан ож дыръя вуко пуштытэмын вылэм, нош выжзэ, тӧдьыос мукет ярдуре потыны медаз быгатэ шуыса, «Лоза» колхозлэн председателез Фёдор Овчинников (Кари Доро) сутэм.

1920-тӥ арын ортчем лыдъян-чотан дыръя Мувыр гуртын 12 хозяйство, 86 улӥсез лыдъяськем. Одӥгаз гинэ юртын ӟучъёс улӥллям, мукетъёсаз — удмуртъёс. Ньыль ар ортчыса, лыдпусъёс воштӥськиллям — 13 хозяйство луэм, улӥсез 109-озь йылэм. Быдӟым ож вакытэ пичи гуртысь 13 мурт тушмонъёсын нюръяськыны кошкем, пӧлысьтызы дасэзлы (7 пиосмуртлы но 3 нылкышнолы) сӧсырмыса доразы бертыны кылдэм. Нош 1959-тӥ арын ортчем переписья Мувырын 27 хозяйствоын 126 улӥсез вылэм ни.

«Лоза» колхоз кылдӥз 1929-тӥ арын 29-тӥ июле. 1957-тӥ арын Мувырез пыртӥллям Зураысь «Гигант» колхозэ, нош 11 ар ортчыса, со «Зуринский» совхоз луэм.

— Со дырысен гуртоослэн сюлмаськонъёссы йылӥзы, — шуэ Тамара Стрелкова. — Гуртэз неперспективнойёс радэ пуктӥзы, гуртоосты кошкыны косӥзы, юртъерзэс сэрттоно шуизы. Тросэз адямиос улыны выжизы Зурае. Нош кӧня ке ар ортчыса, гурт бервылэз бусылы пӧрмытӥзы. Озьы 1980-тӥ-1981-тӥ аръёсы Мувыр гурт Зура сельсоветысь пыраклы ӵушемын вал.

Татысь музъем луоё, нош сыӵе интыын умой будэ пужым. Гурт бервылэ та писпуэз мерттӥзы, нош кӧня ке ар ортчыса, отчы губияны, емышаны ветлӥзы ни. Вунэмнюк, Тусёошмес та гуртын будэмъёсты выльысь вордскем палъёсазы ӧтизы кадь. Нош кӧня татын пӧзись ошмесъёс!  Паськыт Лоза шур быдэсак тӧдьы лилиос пӧлы ышылӥз, вера дышетӥсь. Жаляса верано, 1965-тӥ арын  Воткае электростанция пуктэмзы бере Лоза палъёс пашмыны кутскизы.

1948-тӥ арын гуртэн кивалтэм Анатолий Кочуров. Со сюлмаськемен, гурт вӧзы Зуринской электростанция пуктӥллям. Ӵапак соку ик гуртын улӥсьёс доры нырысьсэ тыл вуэм. 1960-тӥ аръёсы Мувыре ӝутӥллям медпункт, магазин но клуб.

— 10-14 аресамы колхозын турын утялтӥмы, етӥн ишкимы, — веранзэ азьланьтэ Т. Стрелкова. — Уж вискын шулдыр кырӟанъёсты быдэстылӥмы, керетӥсьёс, юыса костаськисьёс ик ӧй вал кадь. Нош педучилищеез йылпумъяме бере гужем ӵоже колхоз бусыысь турын утялтӥ. Ужан куспын ваньмызлы кылӥськымон газет-журналъёс лыдӟылӥ, гуртоосты выль иворъёсын тодматылӥ.
1992-тӥ арын вылӥ образованиен агроном, Мувырысь потэм Пётр Корепанов, вордскем гуртэзлэсь музъемъёссэ огазеяса, фермер хозяйство кылдытӥз. Али «Прогресс» эштосэн кивалтэ. Солэсь ужамзэ мукетъёсыз но синйылтӥзы — гурт калык вордскем палъёсаз кыстӥськыны ӧдъяз. Табере отын кык фермер огазеяськон лыдъяське. Мукетыныз кивалтэ Александр Корепанов.

2009-тӥ арын Мувырлэн нимыз выльысь берыктэмын вал. Нош 2012-тӥ арын ортчем переписез учконо ке, та гуртын 7 корка пуктэмын ни, 23 улӥсез лыдъяське. Гуртоослэн азьланезлы паськытэсь малпанъёссы: ву ӵыпет ӝутоно, часовня пуктоно.

Надежда Данилова

Туспуктӥз Александр Караваев

Удмурт Дунне
By Удмурт Дунне 27 ноября, 2012 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<