Гуртэ бертэме потэ

Удмурт Дунне
By Удмурт Дунне 27 ноября, 2012 05:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гуртэ бертэме потэ

Г. Домнина пыриськиз «Яган базар» ужрадысь «Зарни песянай» конкурсэ

Пичи Пурга ёросысь Яган-Докья гуртысь кузпалъёс Галина но Андрей Домнинъёс куинь нылпизы вань вылысь вордыны басьтӥзы эшшо куинь пиналэз.

Тылпу потэмен, Ксюша, Ваня но Даша одӥг уй куспын кылизы улон интытэк, атайтэк но агайзытэк. Мемизы кызь куинь нуналзэ чидаз ик улыны.

— Туж оскисько вал анайзылэн, Уля сузэрелэн, бурмонэзлы, мугорыз ӝыныез пала сутскемын вал ке но, — шуэ Галина Аркадьевна. — Нош кузпалызлэсь но бадӟымезлэсь пиезлэсь лысьӧмзэс гинэ ватӥмы на.
Нырысетӥ классын дышетскись Ванялэн сутскымтэ интыез ик ӧй вал, вить аресъем Дашалэн пыдъёсыз но киосыз љуаны шедизы. Ксюшамы гинэ та шимес адӟонлэсь палэнэ кылиз. Оло, сюлэмыз шӧдыса, 10-тӥ класс бере Сарапулысь техникуме дышетскыны кошкиз, Уля валаса но ӧвӧл вуттэм сыӵе мылкыдзэ.

Матысь адямиостэ нылпи юртэ сётод-а, ма, шуыса, Домнинъёс опекун кариськизы пиналъёслы. Галина Аркадьевна Кияса ёросысь Тӥгырмен гуртысь бадӟым семьяын будэмын, анай-атайзылэн соос тямыс кузя вал. Соин нылкышно шуг-секытъёслэсь ӧз кышка. Картэз пумит ӧз луы. Вылаз ик, асьсэлэн нылпиоссы быдэ вуэмын ни, Домнинъёс огназы кылемын.
Дашаез Пичи Пургаысь больницаын эмъязы, нош Ваняез — сутскемъёсты эмъянъя элькун центрын, Ижын.

— Ваня ноябрьысен январёзь больницаын кыллиз, — тодаз вае Галина Домнина. — Больницае кузпалэным мынӥм но, пырыны уг лэзё, кинъёс тӥ шуыса. Справкаос бичаны кулэ, пе, ӵыжы-выжыос луиськоды шуыса. Ванялэсь кыӵезэ адӟыса ини, номыр ӧз куаретэ, сьӧрамы ик бертыны лэзизы.

Больницаысь вайыкумы, луло интыез ик ӧй вал, кык толэзьзэ гольык возимы. Эшъёсызлэсь бере медаз кыльы шуыса, дышетӥсез доре ӧтчано кариськимы. Мария Михайловна Русаеваез алӥ, медаз куалекты, номырин медаз возьматы мылкыдзэ. Халатэн шобыртӥм вал Ванялэсь вылтырзэ, быдэсак пӧсяз. Дӥськутэз бордаз лякиськыса, вир вияны кутскиз. Мукет дыръя ӧм ни ворсаллялэ. Дышетӥсьлэсь уг возьдаськы, шуиз.

Нуналаз кӧня пол мисьтаськи меда. Ярам, созэ чидалод. Нош курадӟемзэ, вӧсь луэмзэ адӟыса, сюлэм вирен пылаське. Уже мынӥсько — бӧрдӥсько, ужысь нош синвуаськыса бертӥсько. Но Ваня азьын зол кариськыны вырисько.
Нош кызьы эмъяй, шуоды? Врачъёс котьмар мед вералозы, но сутскемез мунчоен йӧнатоно. Куинь толэзь мисьтӥськымтэ шуыса, кызьпу веникен пыртӥ. Куасьмем яраосыз сачыр усё. Мае но чидамын ӧвӧл Ваня, кӧня пол кузэ вошъямын! Но киыз уродгес ужа, эшшо операциос лэсьтоно, шуо.

Ваньзэ тае тодаз вайыса, Галина Аркадьевналэн нош синъёсыз нюромо. Ярам, пиналъёс выль дорзылы дышиллям ни, нош нырысь мурт каро вылэм. Туэ больницаын кыллемез бере Ваня ӵужапаезлы (озьы шуо сое нылпиос) вазиськем: гуртэ бертэме потэ ни, пе. Тае кылыса, анай сюлэм шумпотонэн пачылаз. Пиналъёслэн ӟеч дышетскемзылы но шумпотэ.
Ксюша но Яган-Докьяе дораз кадь бертэ. Семьяеныз шудтэм учыр луэм бере ӵужапаез сое но ас дораз вайиз. Куинь толэзьзэ Сарапулын дышетскыса, нылаш выльысь школае мынӥз, дышетсконзэ ӟеч йылпумъяз.

Галина Аркадьевна песянай ни, укмыс но тямыс аресъем нуныкаосыз будо. Нылзы йылпумъяз Сарапулысь медучилищеез, собере УдГУ-ын психологе дышетскиз. Али Ижысь одӥгаз аптекаын ужа. Пиоссы лэсьтӥськон удысын тыршо. Табере тани выльысь егит анай чот луиз: Ваняен Даша солы арлыдыз сьӧры уйиськыны уг сёто.

Шуг-секытъёслы Домнина сётскыны дышымтэ. Куректон, сюлмаськонъёссэ кырӟанэн улля — ветлэ гуртысьтызы арлыдоослэн фольклор ансамблязы. Пинал дыръяз туж яратэ вал техника котырын вырыны, тямысэтӥ класс бере дышетскыны пыриз Сарапулысь СПТУ-е. Одӥг арзэ гуртазы шофёрын ужаз, быземез бере Яган-Докьяысь пекарняын тыршиз. Но висьылэменыз ужзэ воштоно луиз, али школаын выж миське. Нош кузпалыз Андрей Александрович кочегар.
Домнинъёс пудо утё, бакчазы вань. Туэ муш вордон борды басьтӥськизы. Улыны но азьлане вамыштыны соослы кужым сёто нылпиос.

Лия Малых

Туспуктӥз  Владимир Беломорских

Удмурт Дунне
By Удмурт Дунне 27 ноября, 2012 05:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<