Гол пыртӥз Петров

Удмурт Дунне
By Удмурт Дунне 27 ноября, 2012 11:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гол пыртӥз Петров

 

И. Кузнецов

Та арня кутсконын вордскем палъёсазы бертӥзы Россилэн командаез понна следж-хоккеен шудӥсь пиосмы. Сербиын ортчем дуннелэн чемпионатаз пыриськыса, Россилэн командаез зарни медаль утӥз.

Инвалидъёс пӧлын следж-хоккеен шудыны нырысь ик Удмуртиын кутскизы. Нырысетӥ команда люкамын вал 2009-тӥ арын, асьмелэсь адӟыса, мукет улосъёсын но та удыс борды басьтӥськизы. Дуннеысь параспортын Россиысь следж- хоккеен шудӥсьёс тэтэ гинэ каро ай. Кылем арын соос нырысьсэ пыриськизы калыккуспо ӵошатсконъёсы, нош туэ кужымзэс эскеризы ни дуннелэн чемпионатаз. Бен, пока «В» лигае пыриськись командаосын вожвылъяськизы. Та ӵошастконын нырысетӥ но кыкетӥ интые потэм командаослы «А» лигаын шудыны сюрес усьтӥське. Нош отысь тужгес кужмо куать командалы шуд усе ини Паралимпиадае но пыриськыны.

Матэктӥсь тол Паралимпиада Сочиын ортчоз. Россиысь следж-хоккеистъёс, нокыӵе вожвылъяськонъёс пыр ортчытэк, отчы пыриськыны быгатысалзы. Но кужмо командаосын пумиськыны кужымез волятыны кулэ. Соин ик Россилэн командаез азе бадӟым курон пуктэмын вал — дуннелэн чемпионатаз ваньзэс вормоно. Шумпотоно, хоккеен шудӥсьёс сое быдэстӥзы. Россилэн ӝыны командаез Удмуртиысь: Иван Кузнецов, Алексей Лысов, Андрей Двинянинов, Евгений Петров, Руслан Тучин, Павел Широбоков но капка возьмась Владимир Каманцев. Россилэн командаеныз кивалтэ Ижысь азьвыл хоккеист Александр Ларионов, солы юрттэ на Илгам Авзалов.

Зарни медален бертэм пиосты пумитазы Мугорез кыдатон культурая, спортъя но туризмъя министерствоын. Нырысетӥ бадӟым вормонзылы пиос уг оско на.
— Тужгес секытэн сётскиз нырысетӥез но берпуметӥез шудон, — Сербиын шудэмзэ тодаз вае капка возьмась Владимир Каманцев. — Германиен шудыкумы, нырысетӥ гол ми пыртӥмы вал ке но, шудон 2:2 лыдын йылпумъяськиз. Соку ини капка возьмасьёслэсь кужымзэс эскеризы. Мон ӧй сётскы. Нош берпуметӥ шудонын вормисез шараяны юрттӥз чылкак одӥг гол, ярано коть, сое пыртӥз Евгений Петров.

Россиысь следж-хоккеен шудӥсьёсты «горд машинаен» ӵошатыны кутскиллям. Озьы шуылӥзы Совето Союз дыръя хоккеен шудӥсь сборноймес. Та вакытэ Россиысь инвалидъёслэн командазы азьпалан вамышъя. Удмуртиысь кивалтӥсьёс но бадӟым саклык висъяло параспортэз азинтонлы. Туннэ нуналлы соослы кулэ на тыро-пыдо эмъясьёс. Йӧ вылын но тырмыт нискыланы дырзы уг тырмы.
Тренерез Александр Ларионов Удмуртиысь командалы кыкетӥ тренер кутон сярысь кылпум поттылӥз. Сборъёсы кошкылыкузы, нош соос толэзьлы быдэ кадь луо, шаерысьтымы команда тренертэк кыле.

Параспортэ вуэмезлы шумпотэ Можга ёросысь Нынек черкогуртын улӥсь Иван Кузнецов. 2003-тӥ арын, школазэ йылпумъян араз, пияшез машина мырӟытэм. Бадӟым семьяын будэм пияш туж яратэм спортэн эшъяськыны, школазэ йылпумъяса, Удмурт кун университетэ пырыны дасяське вылэм. Ӵапак со вакытэ егит муртэ синйылтэм Удмуртиысь ампутантъёслэн футболъя клубенызы кивалтӥсь Виктор Кузнецов.
— Мон кадь сӧсыр адямиос пӧртэм гуртъёсын вань, доразы медаз пуке, калыке мед потозы, — шуэ Иван Кузнецов. — Азьвыл аръёсы Иже сяна вуылэме но ӧй вал, нош табере быдэс дуннеез адӟыны кылдӥз ни. Инвалид луиды ке но, ӵуказе нуналлы оскондэс  эн ыштэ.

Валентина Емельянова

Туспуктӥз Роман Чирков

 

Удмурт Дунне
By Удмурт Дунне 27 ноября, 2012 11:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<