Ӟуч

Удмурт Дунне
By Удмурт Дунне 21 ноября, 2012 10:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дэжё Костолани

Дэже Костолани

Ӟуч

Верос

1

Тани ма вераз мыным ӟуч эше.
Кык ар талэсь азьло гужем дорам монэн одӥг кунысь вуэм тодмое, эмигрант, пыриз. Со трос дышетскем адями вал, туж тодмо юрист, куке но Москваын кассационной судлэн ёзчиез вылэм.
Нош соку со Будапешт котырысь пичи заводын тыршиз. Кӧня лэсьтӥз, сомында ик тырылӥзы солы, ужам дырзэ лыдъяса. Сизьымдоназ потэмын вал ке но ини.

Висъетам пырыса, пуксиз но шуэ:
— Тани лыктӥ ай тыныд вераны: мон кышнояськисько.
— Тон-а, мар-а, юлтоше? — паймыса юай мон, ачим пурысьтам йырсиез шоры учкисько.
— Ма, мон, о-о, — мыньпотыса йырыныз шонтӥз со, но ымнырыз соку ик ӝожмыт луиз. — Тодӥськод-а, пие, мынам уг поты кулыкум огнам луэме. Оген улыны секыт. Нош оген кулыны, кулыкуд шалтырак огнад луыны эшшо но секытгес.

Таӵе ӝож валэктонлы пумит мон ма вераны ик ӧй шедьты.
Со но кӧня ке чал-чал улӥз. Собере вераз, Венаысь одӥг нылашен тодматскиз шуыса, со но заводын ужа. Сое, пе, кышно басьтӥсько.

Кышнояськемзы бере со монэ кузпалэныз тодматӥз.
Тӧдьы йырсиё, туж яратымон кышномурт, кузпалызлэсь данаклы пиналгес, туж огшоры гинэ, учкымон но уд шу сое.

Куке но со но ӟечгес дыръёсты адӟылӥз. Венаын узыр семьяын вордскем мар ке.
Мон трос ӧй вераськы соин. Озьы ке но, огпол гинэ учкыса но, валаны луэ вал, синъёсысьтыз яратон, астэ мукетызлы сӥзён пиштэ шуыса. Соос пырак верало вал, сюлмыз косэмъя бызиз шуыса: нылмуртлэн потэ вал мынам пересь эшелэсь берпуметӥ аръёссэ чебергес каремез.

2
Тӥни озьы каллен улӥзы соос, ас кунысьтызы амалтэк кошкем мукет адямиос сямен ик, кудъёссэ адӟон кунгож сьӧрын пумиськытӥз.

Вазь ӵукна ӵош кошкылӥзы заводэ, ӝытазе ӵош гуртазы бертылӥзы. Доразы чай юыса пукылӥзы, вераськылӥзы.

Нылкышно пал кыл но ӧз тоды ӟуч сямен. Но картэз анай кылыныз кадь вераськиз немец сямен. Куспазы вераськон кылзы немец луиз.
Котьмар ке но ог-огзэс соос валазы. Кин тодэ, оло, шудоесь но вал соос.

3
Таяз сӥзьыл пересь шӧдтэк шорысь висьыны усиз: уж дураз, заводын, шуак урод луэм солы. Ӝог юрттэт сётонъя машинаен эмъяськонние нуиллям.

Эмчиос буйгатыны туж ик ӧз дыртэ. Нош висисьлэн одӥг гинэ куронэз вал: дораз бертыны. Дораз, одно ик дораз. Уно зарни йыло черкъёсын каре уз ву ни ке но, Будапешт котырысь пичи — одӥг висъетэн но кышнопалэн — патераз сюроно вал солы. Эше оскиз, отын каньылгес луоз шуыса.
Коньдон вылэ туж шер вуылӥсь кышноез сое доразы вайиз но озьы утялтӥз, кызьы туала дыре туж шер утялтыло. Сыӵезэ синкылиез поттӥсь киноосысь гинэ адӟод на ке шат.

Кышномурт заводэ но ӧз ветлы ни, ужзэ ыштонлэсь ӧз кышка. Ялан валесэз дорын пукиз, эмъюмъёс сётъяз, уй но нунал компрессъёссэ вошъяз.

4
Огпол ӵукна нылкышно мыным жингыртӥз но соку ик лыктыны косӥз.
Кышнопал ӧс дорын пумитаз монэ, синъёсыз бӧрдэмын.

— Солэн уг поты монэ валамез, — шуиз нылмурт, бӧрдонзэ кутыны быгатытэк. — Котьма мед вазём, со йырзэ шона но маке кеськыса ӟуч сямен вера, ялан ӟуч сямен гинэ. Уг валаськы, ма соин луиз.
Мон малпай, мынам юлтоше, йырсазьзэ ыштэменыз, уйбыртэ ни шуыса.
Озьы ке но, монэ адӟыса вуиз-а, ӧз-а, соку ик тодмаз.

Шумпотыса ӟечъяськиз.
— Эх, тани вуид но, лэся, пие, — шуиз. — Пуксьы вӧзам валес вылэ.
Киме кутӥз.
— Тани ма бордын ужпум, — пересьмем нылпи кадь зӥбиськем но мае ке ватыны тыршись мылкыдын вераз со, — кузпалылэн уг поты монэ валамез. Йӧл вайыны косӥсько но, ву вае. Укноысь возъетъёсты кыскы, шуисько, шундыез адӟеме потэ, нош со монэ шыдэн утялтэ. Огнаме кельтыны косӥсько — со вӧзам лыктэ, ӧтисько — со кошке. Монэ со чылкак шузи кожа. Юа солэсь, малы уг вазьы мыным, малы уг поты монэ валамез.

Мон маке верамъяськи. Ӧй дӥсьты солы югдурез валэктыны.
Со ас вакытаз выемын вал ини, куке асьмеос ыштӥськом пӧяськон сямъёсты, ваньзэ, малы дышим улытозямы, мае пичиен-пичиен пушкамы люкамы. Соку асьме пушкын кӧкыысь кылем сямъёс гинэ уло на, соос вордскыкумы пыӵамын ини, со — инкуазь, зэмлык.
Мон эшелэсь кизэ кырми но кемалась дыръёс сярысь вераськи.
Ӧжыт буйгамез бере миндэрзэ тупатӥ но кошки.

5
Кӧня ке нунал улыса, кышноез нош ик мыным жингыртӥз но лыктыны косӥз. Мар карыны тодытэк, вераз, картэз эшшо но элекчи но чидасьтэм луэ шуыса, кесяське, пе, маке но ялан куре, нош мае — тодмо ӧвӧл, дугдылытэк черекъя.

Машинае пукси. Озьы но бере кылиськем.
Юлтоше валес вылаз вырӟылытэк кылле. Синъёсыз кыниськымтэ, ымыз бадӟым усьтэмын, кожалод, отысь али гинэ потӥз берпуметӥ кеськем кыл — кыл, кудзэ кышноез ӧз вала но кудӥз сярысь асьмеос ноку но ум тодэ ни.

Маин мон быгатӥсько на юрттыны, беромем берыктӥсь?
Синъёссэ ворсай. Православнойёслэн осконзыя кирос пуктӥ но кулэмъёслы вӧсяськонэз лыдӟи.
Куанер эше, котьма ке но со огназ кулӥз.

Венгер кылысь берыктӥз Елена Родионова

Удмурт Дунне
By Удмурт Дунне 21 ноября, 2012 10:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<