Ӵуказе нуналэ — кышкатэк!

Удмурт Дунне
By Удмурт Дунне 27 ноября, 2012 06:17

Ӵуказе нуналэ — кышкатэк!

Улон сюрес быръён — капчи уж ӧвӧл. Школаын бадӟым классъёсын дышетскисьёс азьын та ужпум туж лэчыт сылэ.

Калыкез уже интыянъя ёзъёсын тыршисьёс пусъё: школаез йылпумъясь пиналъёс пӧлысь уноез уг быгато сюлэмзылы-мылкыдзылы тупась удыс бырйыны. Уг малпасько, кыӵе уж туннэ нуналлы тужгес но тупасез луэ, кыӵе специалистъёслы кулэясько шаерысьтымы предприятиос. Та ласянь пиналъёслэн тодон-валанъёссы туж сюбегесь. Нош ӵапак улон сюресэз быръён бордысь ик потэ адямилэн ассэ шедьтэмез, коньдон поттыны но ваньбур люканы, семья кылдытыны луонлыкез.

Тае лыдэ басьтыса, Удмурт Республикаысь Калыкез уже интыянъя службаысь специалистъёс, нимысьтыз группа кылдытыса, асьсэ киязы басьтӥзы пиналъёслы юрттон ужез: удыс быръён, уж шедьтон, быгатонлыкъёстэ усьтон ласянь. Бадӟым классъёсын дышетскисьёс доры вуылыса, специалистъёс соосты котыр ласянь визьнодало. Кылсярысь, мадё, кыӵе удысъёс туннэ нуналлы тужгес но коньдоно луо, кыӵе амалъёсын шараяно аслэсьтыд быгатонлыкъёстэ, кыӵе удыслы тупась луэмдэ но уно мукет.

Калыкез уже интыянъя службаысь специалистъёс кемалась ик ӧвӧл вуылӥзы Сьӧлта черкогуртэ — профориентацияя урок нуизы шор ёзо школаын. Бадӟым классъёсын дышетскисьёс ог кык час ӵоже муресь тодон-валанъёс басьтӥзы удыс быръён пумысен.

Республикаысьтымы Калыкез уже интыянъя службаысь профконсультант Светлана Шиляева пиналъёсын огкыл шедьтыны дышемын ни. Угось арнялы быдэ шаермылэн пӧртэм сэрегъёсысьтыз школаосын дышетскисьёс доры вуылэ, соосты визьнода. Сьӧлта черкогуртысь шор ёзо школаын 8-тӥ классын дышетскисьёс азьын но со уроксэ дышем сямен мытӥз: доска вылэ суредаз ог-огенызы герӟаськись куинь круг, одӥгзэ пусйиз «быгатӥсько» шуыса, мукетсэ — «мынам потэ», куинетӥзэ — «лэсьтыны кулэ». Та куинь кругъёслэн «пумиськон» интыязы бадӟым точка пуктӥз. Пиналъёслы валэктӥз:

— Та куинь мылкыдъёсты — быгатӥсько, потэ но кулэ — герӟаны быгатӥды ке кыӵе ке одӥг удысэн, озьыен, сюрес тӥляд. Иське, быгатонлыкъёсты со ужлы тупало, мылкыдды но со борды кыстӥське, со вие ик валаськоды но — та ужез быдэстыны кулэ шуыса. Тани алигес вуылӥмы Глазов городысь одӥгаз школае. Одӥгез нылаш мылкыдзэ шараяз: луэме, пе, потэ геннной инженер. Ярам, шуом, солэн мылкыдыз та удыс борды кыстӥське. Но со санэ ӧз басьты мукетсэ: кулэяське-а Глазов город таӵе специалистлы, быгатоз-а со дышетскем удысэзъя уж шедьтыны? Таиз сярысь нылаш чик но уг малпаськы вылэм. Но со валэктон шедьтыны быгатӥз: Глазовын таӵе специалистъёс кулэ ӧвӧл ке, озьыен, уж утчаса, кошкыны луоз бадӟым городэ, шуом, Москвае. Бен, таӵе луонлыкез вань котькудӥзлэн. Но ваньдылэн палэнэ кошкемды уз поты. Соин ик нырысь ик лыдэ басьтоно шаермылэсь кулэяськонъёссэ, — пиналъёслы вазиськиз Светлана Михайловна.

Светлана Шиляева трос пӧртэм тестъёс-эскеронъёс радъяз. Соос пиналлы юртто ассэ ӟечгес валаны.
— Милям ужмы уг йылпумъяськы профориентацилы сӥзем урокъёсты радъянэн, — ватса на Светлана Михайловна. — Пыр-поч эскериськомы-дунъяськомы нылпилэсь быдэстэм тестъёссэ. Кызьы со валэктон сётӥз соиз я таиз юанлы, кыӵе солэн шугъяськонъёсыз кылдо уж быръён ласянь, кыӵе удысъя солы тодон-валан сётоно на? Та юанъёслы валэктон шедьтыса гинэ, пиналлы зэмос юрттэт сётыны быгатомы. Ваньзэ тае санэ басьтӥськомы, школаез йылпумъяны дасяськись пиналъёсын ужакумы.

Калыкез уже интыянъя службаысь специалистъёслэн профориентацияя ужрадъёсты ортчытэмзы котыр ласянь ушъямон. Таӵе урокъёсын тодон-валан басьтӥзы ни 3 сюрс 460 пала пиналъёс. Озьы бадӟым классъёсын дышетскисьёс адӟыны кутско азьлань улон сюрессэс, кышкатэк вамышто ӵуказе нуналэ.

Елена Никитина

Удмурт Дунне
By Удмурт Дунне 27 ноября, 2012 06:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<