Нырулэ донгоно, чиньыен возьматоно…

Удмурт Дунне
By Удмурт Дунне Ноябрь 28, 2012 10:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нырулэ донгоно, чиньыен возьматоно…

Эгра ёросысь Сэп культура юртын пумиськон

Аспӧртэм ужрадэ Эгра ёросысь Сэпе вуылӥм: татысь клубын ужасьёс гуртысь гуртэ ветлон йылолэз улӟытӥллям.

Олег Дыгаев ужбер-гатӥсь лӧпкытэмъя Пичи Пурга ёросысь куреггуртъёс сэпъёс доры куное ветлӥзы. «Удмурт дунне» редакциысь Лариса Дмитриева но Дарали Лели бордазы итӥськизы. Ижысь апайёс пӧлысь озьы ик Mademoiselle Oudmourte агентствоысь чеберайёс но журналистика факультетысь студентъёс ветлӥзы.

Ужрад шулдыр концертэн кутскиз. Нырысь сцена вылэ потазы эграос, собере пургаос. Висказы «Дарт» газетэн тодматскон но мода адӟытон вал. Концерт бере — дискотека. Но малы ке — ӟуч кырӟанъёсын… Малпанъёссэс веразы сэпъёс но.

Алевтина Мосова, Сэп культура юртысь режиссёр:
— Ми дӥньын вить ар ӵоже «Шудо егит дыр» лагерь ортчылӥз. Отчы быдэс элькунысь егитъёс люкаськылћзы. Сэп егитъёсмы туж мыло-кыдо пырисько: куратор, туспуктӥсь, ужрадэз нуись луыса. Котькуд ар ми, Элькунмылэн нуналэзлы сӥзьыса, удмурт арня ортчытӥськом. Туэ арнямес фольклор коллективъёсын усьтӥм, школаын ужрадъёс ортчытӥм, туннэ та пумиськонэн удмурт арнямес пытсаськом. Куреггуртысь егитъёсын концертысен тодматским вал. Со дырысен кема дыр ортчиз ни, пумиськыны вакыт вуиз. Ог-огед доры ветлыны, табань сиыны — со вашкала йылол. Мукет ёросысь гуртэн пумиськон нырысьсэ ортчытӥськом, нош Эгра ёросысь Мазьгиысь но Кабачигуртысь егитъёсын таӵе ужрадъёс радъямы ни.

Настя Сергеева:
— Пичи Пургаысь егитъёсын пумиськон мыным кельшиз, малпасько, табере мукет ёросысь егитъёсын пумиськонъёс ортчытъяно! Яраз армие келян обрядзы: ар ортчыса нош ик пумиськон понна туг шуккыса кельтӥзы. «Дарт» сярысь кылылэм но, лыдӟылэм но вал! Мыным со туж кельше. Со элькунысь но, мукет ёросъёсысь но иворъёсты, кизилиосты тодыны юрттэ. Модельёс — ӟечокъёс. Выль дэремъёсты возьматон понна котькуд адямилэн мылкыдыз уз тырмы, кин ке керпотоз, кин ке уз быгаты. Дорамы вуылэм модельёс чебересь, веськресэсь, адске, соослы вылысьтызы дӥсьсы яра. Аслам но модель луэме потӥз. Клубамы кыӵе ке ужрадъёс ортчо ке, мон котькудаз вутскыны вырисько. Кытчы ке ӧтё ке, шумпотыса пыриськисько. Малпасько, мылкыды вань дыръя тэк пуконо ӧвӧл, котькытын астэ эскероно!

Гожтӥськонэн герӟаськем мылкыдъёссэ шарая Лариса Дмитриева:
— Ижысь нуназе бере потыса, берен уйин вуим. Тодэмды потэ-а, кӧня мурт гожтӥськиз — кык.

«Дартлы» гожтӥськон сылэ 65 манет гинэ. Арлы быдэ подписка кулэсме. Тӥ котьмар шуэ, но милям продуктмы вань, силё шуиды ке но, отын ӟечез но трос. Но марлы ми куаш-куаш газетмес возьматыны-вузаны ум быгатӥське — соиз секыт ужпум. Марлы одно ик котькудӥныз нимаз вераськоно, дораз лыктыса, ныр улаз донгоно, чиньыен возьматоно? Кыкеныз ми лулысь-сюлмысь вераським но, соос 65 манетсэс поттӥзы. Котькудӥныз табере озьы вераськыса пуконо шат?

Андрей Краснов малпанзэ Интернетын шарая:
— Эмоциосты куштыса, подписка уж шоры учконо ке, нокыӵе но пайда таӵе ужрадъёс али уг сёто. Возьытэ уськытыса, трос подписчик уд шедьты. Газетын ужаме вань бере, вераме потэ аслэсьтым малпанме. Берло дыръёсы газет пыр информация сётон, телевидениен но радиоен ӵошатыса, ляб адске, табере мукетыз конкурент — Интернет — вуиз на. Иворлэн адями доры ӝог вуэмез та вакытэ туж бадӟым инты басьтэ.

Быдэс дуннеын газетъёс тиражъёссэс ышто, куд-огез чылкак потэмысь дугдо (та нуналъёсы тани Newsweek бумага версизэ ворсаз). Валаны кулэ, газет луыны быгатэ удмурт, туж тунсыко, верантэм чебер, но со али нокыӵе гарантия уг сёты, та газетлы одно ик гожтӥськозы шуыса.

Реклама сётӥсьёслы тунсыко бадӟым каръёс гинэ, нош гуртъёсын уксё ичи возиське. Интернетэ выжыны но гуртъёсын уггес быгато — Интернет зол вӧлмемын ӧвӧл. Почталэн дунъёсыз но зол будо. Энтузиазмен, удмуртлыкез азьланьтонэн луэ ик дыр кӧня ке возиськыны, но со вазь-а, бер-а быроз. Соин ик ӟеч продукция поттэмдэс шӧдӥськоды бере (аслыд оскон — бадӟым кужым), нырысь кулэ вылэм газеттылэсь экономика люкетсэ азьланьтыны. Спонсоръёсты утчано, бюджетысь лулчеберетлы висъям коньдонэз киултыны тыршоно, депутатъёс пыр гожтӥськон радъяно.

Озьы, оскисько, ог 10 000 котырын (котькуд ёросэ 400 экземпляр усе) тираждэс таӵе секыт вакытэ возьыны луонлыкъёс вань.

Дарали Лели

Туспуктӥз Настя Сергеева

Удмурт Дунне
By Удмурт Дунне Ноябрь 28, 2012 10:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<