Малы сюбегало уйпал буртчин лудъёс?

Удмурт Дунне
By Удмурт Дунне Ноябрь 30, 2012 14:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Малы сюбегало уйпал буртчин лудъёс?

Етӥн заводын

Кӧня ке ар талэсь азьло элькунамы 17 етӥн завод вал. Со вакытэ быдэсъяськиз «Етӥн» программа. Соя предприятиосы юрттэт вуылӥз Москваысь но, республикаысь но. Коньдон мынэ вал минерал сылалъёс, ядохимикатъёс но выль техника басьтыны.

Нош табере программа йылпумъяськемын, юрттэт ӧвӧл.

Пытсаськемын Ува, Балезино, Сьӧлта, Яр, Кизнер ёросъёсысь етӥн предприятиос. Али 12 льнозаводъёс пӧлысь 2-3-ез гинэ тыро-пыдо ужало. Озьы шуыны луоз Зура черкогуртысь «Лён-сервис», Шарканысь, Можгаысь етӥн заводъёс сярысь, нош кылемез мырдэм возисько.

Та удысын югдурез тупатон, етӥн будэтонэз но сэстонэз умоятон-улӟытон вылысь шаерамы куинь ар талэсь азьло кыдытэмын «Удмуртский лён» коммерциен вырисьтэм огазеяськон. Солэсь ужзэ радъяны оскизы Эгра ёросысь етӥн будэтонэз ӟеч тодӥсь-валась муртлы, «Григорий» етӥн заводлэн валтӥсь директорезлы Иван Петрович Чирковлы.

— Иван Петрович, берло дыре гурт хозяйствоос етӥн будэтэмысь дугдӥзы. Етӥн будэтон выжиз льнозаводъёс вылэ. Та шоры кызьы учкиськоды?

— Вашкала дыръя етӥнлэсь мар гинэ ӧз куэ: ӵушкон, ӝӧккышет, дэрем… Ваньзэ киын сэсто, черсо, гужато вал. Табере югдур чылкак воштӥськемын: ваньзэ сямен ужъёсты машинаос быдэсъяло. Озьы ке но етӥн лудъёсмы уг паськытало. 2011-тӥ арын160-170 гектар вылын уйпал буртчин будэтылӥм ке, али но сомында ик кизиськом. Огдыре ми етӥн бусыосмес 400-500 гектарозь вуттылӥм. Зарни вакытмы кема ӧз кыстӥськы. Гурт хозяйствоослэн етӥн будэтыны музъемзэс арендае висъямзы уг поты. Нош етӥн заводмылы ичизэ 500 гектар кулэ, бадӟымесь льнозаводъёслы — 1000 гектар. Та одӥгез лэчыт ужпум луэ. Милемлы музъем уг тырмы.

— Нош кызьы завод пуктӥды?

— Колхозын будэтэм етӥн куромес Зурае вузаськом вал, но отысь завод коньдонзэ ӝегаса сётъяз. Кылдэм югдурысь кызьы ке но потыны амал шедьтоно вал. Адямиосын кенешыса, одӥг малпанэ вуим: асьме понна пуктоно пичигес етӥн завод. 2001-тӥ арын гужем Ярославльысь оборудование басьтӥм. Порвай гуртэ пуктэм заводмы, ӝыны ар ортчыса, мертчан поттыны кутскиз ни. Со понна бадӟым тау карисько гуртоослы. Ватсаме потэ: оскисьтэмъёсыз но вал, учкомы ай, пе, кызьы чебер верам кылъёстэс улонэ пыӵатоды. Лушкемен учкыны но ветлӥзы.

И. Чирков

Заводлэн кулэлыкез бадӟым. Усьтӥськизы выль ужан интыос. Уката но умой толалтэ, гуртын ведь соку музъем уж быре. Табере етӥнмес асьмеос дасяськом но вузаськом. Басьтӥсьёс вань, со пичи ке но юрттэ ёрослэсь экономиказэ юнматыны но калыклэсь улон-вылонзэ умоятыны.

— Иван Петрович, мар эшшо тӥледды сюлэмшугъяськытэ?

— Сюлэмез висьытӥсь ужпумъёс трос. Соос пӧлысь тужгес бадӟымез — ваньмаз сямен, асламаз но, етӥн заводъёсын техника но оборудование вужмемын, соосты ӝегатскытэк выльдоно но етӥнэз мур переработкае выжтоно. Мертчан сяна, поттоно етӥн сӥньыс, гозы, шпагат но мукетсэ. Та уж борды умой-умой басьтӥськиз ни Зураысь «Лён-сервис» огазеяськон. Туэ со ӟеч сӥньыс керттыны кутскоз. Вуззы туж кулэ. Сое басьтозы «Сактон», «Шарканский трикотаж» но музон фабрикаос. Зураослэсь адӟем каре ни Шарканысь етӥн завод. Нош азьланьын ваньмыз льнозаводъёс выльдӥськыны, сӥньыс поттыны кулэ. Солы нокин пумит ӧвӧл, но со понна уно коньдон кулэ. Тани зураослы ичизэ 20 миллион манет шедьтоно. Соин ик етӥн предприятиос государстволэсь юрттэт возьмало, сотэк выль сямен ужаны, ӟеч вузъёс поттыны уз быгатэ. Сое кулэ каре Россилэн ВТО-е пыремез но. Кунгож сьӧрысь вуттэм вузъёс асьмеды медаз кышкатэ. Солы али дасяськоно ни.

Котькинлы тодмо: производствоез выльдытэк, азинсконъёс уд басьты. Нош соин люконтэм герӟаськемын мукетыз ужпум — етӥнлэн дуныз кулэсме. Сое лыдпусъёс умой возьмато. Тани вить-куать ар талэсь азьло одӥг килограмм кузь мертчан 54 манет сылэ вал, вакчиез — 35 манет. Табере кӧня малпаськоды? 32 но 22 манет. Азьланьын номыр ӧз воштӥськы ке, одӥг завод но ужаны-азинскыны уз быгаты.

Малы озьы шуисько? Электрокужымлы дун лапак будэ. Нош али сое трос но трос сутӥськом. Моторъёсты вуэн уд бергаты ук. Озьы ик дунъёс йыло эстӥськонлы, техникалы. Музъем ужан тӥрлыкмы арысь аре вужме, нош выль трактор, сеялка, комбайн басьтыны нош ик коньдонмы ӧвӧл.

Оглом вераса, государство етӥн будэтӥсьёслы но, переработчикъёслы но тырмыт уг юртты на. США-ын, Европаын фермеръёслы юртто, нош асьмелэн кылымтэ улэ аналско. Ваньзэ лэчыт ужпумъёсты рынок вылэ погыльтӥзы, со, пе, ачиз ваньзэ радъялоз. Шонер-а со? Мон сямен, ӧвӧл. Асьмелэн музъемлы но, предприятиослы но зэмос кузё кулэ.

— Нош азьланезлы кыӵе малпанъёсты?

— Тани «Удмуртский лён» огазеяськон кылдытӥм, но солэн пайдаез, кулэлыкез уг шӧдӥськы на. Малы ке шуоно солэн коньдонэз ӧвӧл. Кызьы сотэк етӥн заводъёслы юрттэт сётод, буш кылын техникаез уд выльды, ӟеч ужасьёс но уд дася. Соин ик етӥн будэтонэз-сэстонэз умоятыны коньдон висъяны кулэ федерал но элькун бюджетъёсысь. Со луысал та удысэз азинтонлэн кутсконэз.

Экономикалэн аслаз законъёсыз вань. Удысъёсты, предприятиосты куашкатыны туж капчи, нош ваньзэ огкутскемен ӝутыны-юнматыны уд вормы, дыр кулэ. Малы асьмеос К. Маркслэсь «Капиталзэ» вунэтӥськом? Производство соя улэ-азинске ук.
Ваньзэ лэчыт ужпумъёсты вераса уд быдты. Соос асьмелэн ӵыпетын ву кадь тымиськемын. Озьы ке но осконмы бырымтэ, азинскон-будон сюрес вылэ одно ик потом. Сяськаяськись етӥн бусы лыз зарезь кадь веттаське, соку сюлэм шумпотонэн пачылме.

Геннадий Романов

Туспуктӥз Владимир Беломорских

Удмурт Дунне
By Удмурт Дунне Ноябрь 30, 2012 14:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<