Бюджет кисьма

Удмурт Дунне
By Удмурт Дунне Ноябрь 30, 2012 14:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бюджет кисьма

Кун Кенешлэн кыкетӥ сессиез.

Та нуналъёсы ортчиз Удмурт Республикаысь витетӥзэ ӧтчам Кун Кенешлэн кыкетӥ сессиез. Эскерыны чаклам 20 пала ужпумъёс пӧлысь валтӥсь радэ потӥз вуоно, озьы ик 2014-тӥ-2015-тӥ аръёслы чаклам бюджетэз сэрттон-пертчон.

Ужрадэз усьтӥз Кун Кенешлэн Тӧроез Александр Соловьёв, со сяна, сессилэн ужаз пыриськиз Президент Александр Волков, валтӥсь федерал инспектор Дмитрий Мусин, министерствоослэн но ведомствоослэн кивалтӥсьёссы.

Матысь аръёслы чаклам бюджетэз эскерыны кутскемлэсь азьло кыл сётэмын вал Россиысь Кышкытлыклэсь утиськонъя федерал службалэн Удмурт ёзэныз кивалтӥсьлы генерал-майорлы Сергей Вертуновлы. Со Россиысь ФСБ-лэн аппаратаз ужаны выжемен, Кышкытлыклэсь утиськонъя федерал службалэн Удмурт ёзэзлы кивалтӥсе та дыре юнматэмын полковник Евгений Кукарцев.
* * *
«Удмурт Республикалэн 2013-тӥ, озьы ик 2014-тӥ-2015-тӥ аръёслы чаклам бюджетэз сярысь» законлэн проектэныз тодматӥз Правительстволэн Тӧроезлэн воштӥсез, коньдон ужпумъёсъя министр Валерий Богатырёв. Солы юанъёс лачак люкаськизы. Кылсярысь, кызьы радъяськоз бюджет удысын тыршисьёслэсь уждунзэс йылтон? Дышетӥсьёслэн но эмъясьёслэн югдурзы валамон ке, кыӵе куронъёсъя лыдъяськоз, шуом, культура, мугорез кыдатон удысын тыршисьёслэн уждунзы? Валерий Богатырёв валэктӥз: туэ 1-тӥ декабрёзь Россиысь Коньдон ужпумъёсъя министерство улосъёслы келяны кулэ бюджетникъёслэсь уждунзэс лыдъянъя нимысьтыз методикаез. Соя ик чаклаломы уждун будэтонэз но.

Пусйыны кулэ: депутатъёслэн бюджет пумысен ӵектонъёссы 60 пала люкаськизы. Соос санэ басьтэмын, куд-ог удысъёсъя расходъёс йылтэмын. Кыӵе луоз  шаермылэн матысь аръёслы чаклам бюджетэз?

— 2013-тӥ арлы чаклам бюджетлэн доход люкетэз — 41 миллиард 249 миллион манет, — шуиз Валерий Богатырёв. — 2014-тӥ арын та лыдпус 40 миллиард 992 миллион вылын возиськоз, 2015-тӥ арын 43 миллиард 223 миллион пала луоз. Вуоно арын расходъёс 51 миллиард 129 миллион тыр чакламын, 2014-тӥ но 2015-тӥ аръёсы — ог 300 миллион манетлы ичигес. Дефицитэз пытсаны чакламын, кун облигациосты вузаса но кредитъёс чотын. Бюджетын валтӥсь интыын луозы калыклы юрттон, экономикаез ӝутон, жилищно-коммунальной хозяйствоез рос-просгес радъян. Уноезлы удысъёслы, туэ арен ӵошатыса, тросгес коньдон висъяськоз.

Министр ватсаз на: федерал центрысь матысь аръёсы ватсаса вуоз 1 миллиард 325 миллион манет. Таин валче расходъёсты но 1 миллиард 400 миллион манетлы йылтыны луоз.

Бюджет пумысен мылкыдъёссэ шараяз Президент Александр Волков:
— Кылем аръёсы сямен ик, вуоно арын но нырысетӥ интые потоз социальной удыс. Калык азьын сётэм кылмы быдэстэмын луоз.

Кылсярысь, бюджетэ пыртэмын ни дышетӥсьёслэсь но нылпи садын тыршисьёслэс уждунзэс йылтон. Талы висъяны чакламын 3,2 миллиард манет. Палэнэ уз кыле бюджет чотысь мукет удысъёсын тыршисьёс но. Пусйыны кулэ: бюджетникъёслэн уждунъёссы, 2013-тӥ арысен кутскыса, люкетэн-люкетэн будозы. Кылсярысь, 2018-тӥ арозь эмъясьёслэн уждунзы 2 поллы тросгес луыны кулэ улосын юнматэм шоро-куспо уждунлэсь. Нош культура, мугорез кыдатон но спорт, калыкез утён удысъёсын тыршисьёслэн кисызы отчыозь тупатӥськоз шаермыя шоро-куспо уждунэн. Озьы быдэстомы Россиысь Президентлэсь пуктэм куронзэ.

Бюджетлэсь проектсэ эшшо огпол сэрттыса-пертчыса, депутатъёс сое нырысетӥ лыдӟон бере юнматӥзы. Отчы воштонъёс пыртыны дыр вань на: ӵектонъёс кутӥськозы 4-тӥ декабрёзь.

Сессиын радъяськиз лушкем куара сётон но. Кун Кенешысь Наукая, дышетонъя, культурая но егитъёсын ужанъя ялан ужась комиссилэн кивалтӥсезлы воштӥсе ӵектэмын вал Ольга Черкасова. Кун Кенешлэн кылем ӧтчамаз со кивалтӥз Социальной политикая ялан ужась комиссиен, ассэ возьматӥз визьмо но кышкасьтэм политикен. Уноез депутатъёс со понна дурбасьтӥзы.

Кун Кенешысь Наукая, дышетонъя, культурая но егитъёсын ужанъя ялан ужась комиссилэн кивалтӥсезлэн воштӥсез луыса со тыршоз, мукет удысъёслэсь мозмытыса.

Елена Никитина

Туспуктӥз Николай Глухов

Удмурт Дунне
By Удмурт Дунне Ноябрь 30, 2012 14:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<