Будон сюресмы вольыт

Удмурт Дунне
By Удмурт Дунне 2 ноября, 2012 07:21

Будон сюресмы вольыт

А. Максимов

Туннэ Кияса ёрос будон сюрес вылын. Выльысь улӟо эштосъёс, кылдо фермеръёс. Татын ӧвӧл промышленностья но лэсьтӥськонъя бадӟымесь предприятиос, соин ик ёрос улэ ю-нянь но сӥль-йӧл поттон вылын. Улэм-вылэмзы сярысь маде ёрослэн йырыз Александр Максимов.

— Гурт удыс валтӥсь инты басьтэ. Татын 1 сюрс адями ужа но ёрос ваньбурлэсь 92 процентсэ поттэ. Тулыс дыраз кизим 12 сюрс 600 гектар тысё но пуртэсо юос. Планмес 100,6 процентлы быдэстӥм. Но зоръёс беромыса вуизы. Турын но юос чебер ӧз  пушъе. Озьы миымлэсь ичигес урожай басьтӥм, котькуд гектарысь 14 центнер ю тысь кутсам. Ваньмызлэсь трос — гектарлы быдэ 17,3 центнер — кутсазы «Яжбахтинский» агрокомплексысь нянь будэтӥсьёс. Озьы ик юоссы уродэсь ӧй вал Суворов нимо но «Киясовский» СПК-осын.

Туннэ меӵак вераны луэ: ёросын удалтэм ю-нянь будэтыны луонлыкъёсмы вань. Кылсярысь, «Киясовский» эштосын «Раушан» йыды котькуд гектарысь 25 центнер сётӥз, нош П. Петровлэн крестьян-фермер хозяйствояз 23 центнер йыды но 19 центнер сезьы басьтӥзы. Озьы ужаны быгато мукетъёсыз но хозяйствоос.

Музъем ужанэз умоятон ласянь ёросын трос лэсьтӥське. 2009-тӥ-2010-тӥ аръёсы  паськытатӥм пудо сюдон культураосмес. Хозяйствоос али вуоно арлы дасясько. Кидыс тырмыт кисьтэмын. Та ласянь тужгес но адӟем карымон ужа «Киясовский» СПК. 730 тонна кидыссы пӧлысь 610 тоннаез нырысетӥ репродукциозь вуттэмын но 200 тонна вузаны дасямын.

Ушъяме потэ азьмынӥсь комбайнёръёсмес. Соос вань котькуд хозяйствоын. Туэ вормисе потӥз Суворов нимо эштосысь Ильшат Ямалиев. Со КЗС-812-16 комбайнэн 1 сюрс 43 тонна ю тысь но 3,5 тонна трос аръем турын кидыс кутсаз. Быдэн 870-800 тонна лэсьтӥзы «Яжбахтинский» но «Киясовский» агрокомплексъёсысь Сергей Букарев но Юрий Бичурин. Водительёс пӧлысь азьпал радэ потӥзы «Киясовский» СПК-ысь Юрий Поклонов, Суворов нимо СПК-ысь Сергей Шикалов но Владимир Косолапов.

А. Максимов вордскиз Глаз ёросысь Сороково гуртын 1957-тӥ арын. 1980-тӥ арын йылпумъяз Ижысь гурт удысъя институтэз, инженер луиз. Егит специалистэз ужаны ыстӥзы Балезино ёросысь «Мир» колхозэ. Ӟеч тыршемзэ ӝог синйылтӥзы. 14 ар кивалтӥз «Путь к коммунизму» колхозэн. Отысь басьтӥзы ёросэ ужаны. Ёрос администрацилэн нырысетӥ воштӥсез луиз. Ньыль ар тыршемез бере 2001-тӥ арын Кияса ёрослы йыре бырйизы.
Александр Вячеславовичлы сётэмын «Удмуртиысь гурт удысъя дано ужась» ним но Удмурт Республикалэн Данъян грамотаез.

Пудо сиёнъя планмы 86 процентлы быдэстэмын. Миым сярысь со ичигес луиз. Та ласянь тужгес но ӟеч тыршизы «УСПК» ООО-ысь музъем ужасьёс. Соос одӥг но ӝыны арлы тырмымон сиён дасязы. Пудо сиёнзы бусьтыр люкаськиз Суворов нимо СПК-ын но. Пудо сиён дасясьёс пӧлын азьпала потӥз «Киясовский» агрокомплексысь Сергей Бронников. Усто механизатор Дон-600 комбайнэн 9 сюрс 167 тонна вож сиён турназ.

Пудо вордон удысамы но азинсконъёсмы вань. Туэ 9 толэзьскын 5,8  сюрс тонна сӥль, 11 сюрс 804 тонна йӧл поттӥм. Быдэс ёросъя котькуд скаллэсь 3 сюрс 555 килограмм йӧл кыским, яке, кылем арын та дырен ӵошатыса, 105 килограммлы ятыргес. Ар ӵоже  лыдпусэз 5 сюрсозь вуттыны луонлыкъёсмы вань.  «Киясовский» агрокомплексын скаллы быдэ 4 сюрс 750 килограмм йӧл люказы, нош «Яжбахтинский» комплексын — 4 сюрс 239 килограмм. Та хозяйствоосын ик тыршо ёросысь азьмынӥсь дояркаос — Светлана Дулесова, Ольга Краснопёрова, Ольга Кунгурова, Алевтина Коробейникова но мукетъёсыз.

Азинсконъёсмы вань сюро таза пудо будэтонын. Ваньмызлы адӟем карымон тыршо «Киясовский» агрокомплексысь кунянь сюдӥсьёс. Атабаево фермаысь Светлана Лоскутовалэн кунянъёсыз нуналаз 938 грамм будо, нош Байсарово фермаын — 900 грамм.

Берло дыре пыд йылазы султо крестьян-фермер хозяйствоос. Соос арысь аре тросгес сӥль-йӧл потто. Озьы шуыны луоз П. Петровлэн хозяйствоез сярысь. Туэ со ваньмызлэсь уно — котькуд гектарысь 25,3 центнер — ю тысь кутсаз. Солы но фермерлы Владимир Петровлы хозяйствозэс азинтыны но ӟеч выжыысь пудо басьтыны быдэн 5 миллион манет уксё висъямын. Соос Гурт удысъя но сиён-юонъя министерстволэн конкурсаз вормисе потӥзы, грант басьтӥзы. Нош егит фермерлы Александр Залоговлы 1 миллион манет сётэмын. Кутскись ужбергатӥсьлы со туж бадӟым юрттэт.
Гуртысь сиён-юон поттӥсьёслы государство юрттэ. Туэ 9 толэзьскын пӧртэм бюджетъёсысь ог 12 миллион коньдон висъямын. Нош гуртысь семья 2-3 скал вордэ ке, котькуд йыр понна 3 сюрс манет уксё вуэ. Кык егит семьялы корка пуктыны 1 миллион 106 сюрс манет уксё вуиз. Ёрос вань кун программаосъя ужа. Берло дыре бадӟым саклык висъя кадръёс дасянлы.

Туэ ёросын гурт удыслэн арез ялэмын. Солы сӥзьыса, пӧртэм ужрадъёс ортчыло. Ваньмызлы кельшиз «Лучший по профессии» конкурс. Со нырысьсэ радъяськиз. Та ужрадъёс гурт калыклэсь мылкыдзэс ӝуто азьланьын эшшо ӟечгес ужаны, тросгес ю-нянь, сӥль но йӧл поттыны.

Геннадий Романов

Туспуктӥз Владимир Беломорских

Удмурт Дунне
By Удмурт Дунне 2 ноября, 2012 07:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<