Ас лэсьтэм книга но Лирика пролка

Удмурт Дунне
By Удмурт Дунне 21 ноября, 2012 17:08

Ас лэсьтэм книга но Лирика пролка

Р. Николаев яратэ Ашальчи Окилэсь но Кузебай Гердлэсь кылбуръёссэс

Воткаысь 5 номеро нылпи библиотекаын ортчиз удмурт выжыкылъёслы сӥзем праздник.

Пиналъёс гожто книга

Анай-атайёссы, песянай-песятайёссы юрттэм улсын 1 номеро школаысь 2-тӥ-9-тӥ классъёсысь кызьлэсь ятыр дышетскисьёс яратоно выжыкылъёссэс удмурт кылысь ӟуч кылэ берыктон конкурсэ пыриськизы. Тросэз ужъёссэс книга выллем дасяллям, выжыкылысь геройёсты суредаса.  Нош 2 номеро нылпи садысь покчиос суредъёс дасяллям.

Берыктон уже пыриськизы арлыдоос но: покчиосты дышетӥсь Светлана Широбокова, 2 номеро нылпи садысь воспитатель Людмила Ашихмина но лыдӟись Анатолий Бегишев.

Вань ужъёсъя библиотекаын  адӟытон радъямын вал. Мылкыд карисьёс азьланяз соосты лыдӟыны быгатозы доразы яке библиотекалэн залаз: ас лэсьтэм книгаос сётӥськозы выжыкыл книгаен ӵош. Удмурт выжыкылъёсын тодматскыны таӵе амал йыраз лыктӥз нылпи библиотекалэн кивалтӥсезлы Елена Бегишевалы.

— Берло дыре удмурт выжыкылъёсын чебересь книгаос дорамы вуо. Нылпиос соос котырын бергало, лыдӟемзы потэ, нош удмурт кылэз уг валало, — шуэ Елена Ивановна. — Тӥни соку малпан кылдӥз выжыкылъёсты ӟуче берыктонъя конкурс радъян пумысен.  Вазиськи 1 номеро школаысь удмурт кылэз нуись дышетӥсьёслы Светлана Степановна Широбоковалы, Елена Вячеславовна Вяткиналы, Валентина Максимовна Черыговалы. Соосын ми кемалась эшъяськиськом ни. Малпанмы туж кельшиз, басьтӥськизы юрттӥськыны.

Удмурт выжыкылъёслы сӥзем ужрадэз шулдыртӥзы Лӧпшо Педунь но Галя апай покчи юрттӥсьёсыныз ӵош. Пусйыны кулэ, 44 номеро нылпи садысь воспитатель Галина Перевозчикова группаысьтыз пиналъёсын пӧртэм ужрадъёсты чеберто удмурт кырӟан-веранъёсынызы. Соос ик пыриськизы туэ тулыс Воткинскын радъям «Пичи чеберайёс но батыръёс» конкурсэ.

Педагогической колледжысь «Сайкан» ансамбле ветлӥсьёс но крезен шудыны быгатэмзэс возьматӥзы. Соос пӧлын вал Роман Николаев. Пияш 1 номеро школаын 9-тӥ классын дышетске, крезьчиослэн «Ошмес син» ансамблязы но вуттӥське, удмурт егитъёслэн «Шунды» дэменлыксылэн Воткаысь ёзэзлэн ужаз но пыриське.

Нылпи библиотекаын Романэз озьы ик асьсэлэн каро, пичиысен, пе, дорамы будӥз. Пияш выжыкылэз берыктон уже но пыриськиз. Тау кариз библиотекаын ужасьёслы таӵе конкурс радъямзы понна, азьланяз тросгес мед луозы, пе, удмурт кылэн герӟаськем ужрадъёс.

Библиотекаын ужасьёс та конкурсэн гинэ буйгатскыны уг малпало. Удмурт выжыкылъёсты берыктэм сяна, нылпиос азьланяз асьсэлэсь гожтэмъёссэс удмуртэ берыктозы.

Эрик ӧвӧл изьыны

Нылпи библиотекаысь липет улэ интыям книгаослы эрик ӧвӧл изьыны, пиналъёс соосты яратыса лыдӟо. Кылбурен эшъяськисьёс кожо Лирика пролкае,  тодон-валан утчасьёсты Наукая пролка возьма, пичиослы сюрес — Покчиослэн пролкаязы.

Та библиотекаын лыдӟисьёс уг бырыло, артэ интыяськемын 1, 6, 7 номеро школаос, 2 но 44 номеро нылпи садъёс.
— Нырысьсэ  анай-атайёсынызы сюрес лёгыса, выльысь татчы вуо ни асьсэлэн пиналъёсынызы, — шуэ абонементэн кивалтӥсь Надежда Дегтерева. — Лыдӟисьёсмес  пичиысен ик будэтӥськом. Ми татын ваньмы кызь арлэсь кема ужаськомы ни.

Покчиосын эшъяськонзы кутске нылпи садысен. Доразы потаса, книгаысь геройёсын тодмато, пӧртэм шудонъёс радъяло, артистъёслы пӧрмыса. Арлыдоос но вунэтымтэ, соос понна  нимысьтыз сэрег дасямын. Детективъёсты гинэ уг лыдӟо соос, выль сямен асьсэлы усьто классикъёсты. «Война и мир», «Мастер и Маргарита» книгаос берло дыре ӝажыосын уг кыллё.

Школаын дышетскисьёс сярысь ке верано, нылпиослы азьло сямен ик матын Николай Носов, Виктор Драгунский, Валентина Осеева, Юрий Дружков, Астрид Линдгрен но совето вакытысь  мукет тодмо писательёс. Нылпиос кыстӥсько яркыт книгаос борды. Александр Гринлэн «Алые паруса» книгаез киысь кие ветлэ.

Лия Малых

Удмурт Дунне
By Удмурт Дунне 21 ноября, 2012 17:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<