Арлыдоослы шуныт сэрег дась

Кез ёросысь Сыга II гуртын матысь дыре корка пырон луоз. Школаын дышетскисьёслэн лыдзы кулэсмемен, бадӟым юрт трос аръёс ӵоже буш сылӥз.

Школаез арлыдоослы юрт карыны малпазы. Лэсьтӥськон ужъёсты 2009-тӥ арын мытӥзы. Бадӟым кабинетъёсты песянайёслы но песятайёслы улон сэрегъёслы пӧрмытӥзы. Отын 24 муртлы инты тырмоз. Улон патеръёссы сяна, арлыдоослэн луозы пӧраськон, шутэтскон, мисьтӥськон сэрегъёссы. Юртэн кивалтыны оскемын Валентина Никитиналы. Арлыдоос дорын ужалозы 4 диспетчер но 4 кочегар.

Пересьёслэн юртазы вань мылкыд карисьёсты уг куто. Нырысь ик путёвка висъяло ёросысь куашкан калэ вуэм юртъёсын огнын улӥсьёсты. Туннэ нуналлы даслэсь ятыр арлыдоос отчы дасясько ни. Со сяна, кык путёвка чакламын Дэбес ёросысь арлыдоослы.

Татьяна Трефилова

Туспуктэмез: susanin.udm.ru