Сюйлэсь кылзэ тодӥсь

Удмурт Дунне
By Удмурт Дунне 16 ноября, 2012 18:35

Сюйлэсь кылзэ тодӥсь

О. Суворова

Шаерысьтымы кибашлыос пӧлысь чиньыен лыдъямонэз гинэ горд сюен ужало. Угось солэсь маке лэсьтон понна трос пӧсяно. Уно кужымез кыскем сяна, горд сюй чиданлыкез но эскере.

Куинь ар талэсь азьло Калининград палъёсысь Дэри черкогуртэ улыны лыктӥз Ольга Суворова. Шораз учкыса, огшоры, сабырлы кышномурт кадь, нош киосыз солэн зарни. Ма борды гинэ уг басьтӥськы, ваньзэ улӟытэ. Ольга Ивановна дышетскемезъя художник. Суредаськем сяна, нуналлы быдэ пластилинлэсь я сюйлэсь маке лэсьтэ, лякылэ. Солэн киужъёсыз пиналъёсты но, арлыдоосты но бордазы кыско.

Атаез военной вал бере, семьязылы пӧртэм интыосын улыны кылдэм. Пичи дыдыез эшъёсыз шудыны, бызьылыны чортылӥллям, нош со ялан маке лякылэм. Пластилин шедьымтэ дыръяз горд сюйлэсь я нӧдлэсь маке лэсьтылэм. Син куспын шудон корка пӧрмытылэм. Со ик сюй борды кыстӥськемез луэм. Суредасе дышетскемез бере но сюлмыз буйгамтэ. Калининградысь одӥгаз фабрикаын быгатонлыкъёссэ эскерем. Ма гинэ отын лэсьтылӥллямтэ: сад горшокъёс, чыры-пыры шудонъёс, ужан тӥрлык…

Удмуртие вуытозяз, Ольга Ивановналэн киосыз волязы. Пыд улын кыстаськись горд сюез миськыны, солэсь паймымон арбериос лэсьтыны ӝог дышиз. Соин ик асьме шаере со бадӟым песьтэрен вуиз. Кылем арын Дэри черкогуртын Ольга Суворовалэн киужъёсыныз адӟытонэз вал. Сюйлэсь лэсьтэм арбериоссэ возьматэмез бере гуртоослэн та удыс шоры учконзы воштӥськиз.

Туннэ нуналлы Ольга Ивановналэн трос люкаськемын ни сюсьтыл возёнъёсыз, гырлыосыз, коркаосыз, чыры-пыры тыриськон шыкысъёсыз. Та вакытэ сюйлэсь вал уробо лэсьтэ, отчы пуктэмын луозы сылал но сакыр возён сарваос. Ольга Ивановналэн верамезъя, горд сюен ужаны чик но секыт ӧвӧл, музъемез яратыны но гажаны, пе, кулэ, нош отӥяз, чиданлык тырмиз ке, ваньмыз радъяськоз. Зэм, лэсьтэм арбериос, гурысь поттыку, куд-ог дыръя пилиськыны, езаны шедё. Соку вань тыршемед токма луэ. Туннэ Ольга Суворова валэктэ, кызьы горд сюйлэсь пӧрмытоно шудон корка.

Валентина Кутузова

Туспуктӥз  Владимир Беломорских

Удмурт Дунне
By Удмурт Дунне 16 ноября, 2012 18:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<