Ӝыт тылъёс нуназе но пишто

Удмурт Дунне
By Удмурт Дунне 30 октября, 2012 06:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӝыт тылъёс нуназе но пишто

Я. Зайцева

Пичи Пурга ёросысь Баграш-Бигра гуртысь библиотека шаерысьтымы краеведениея центрен лыдъяське. Кӧня ке аръёс ӵоже ини соин кивалтэ Яна Зайцева. Нылпиослы ас шаердэ яратон мылкыд пыӵатэм сяна, гуртысь библиотекарь мыло-кыдо пыриське туризмез улӟытонэ. Яна Леонидовнаен кенешиськом та удысын вормонъёссы но шуг-секытъёссы пумысен.

— Шаркан ёросын улэ Тол бабай, Эграын калыкез пумита Лӧпшо Педунь, Граке  пӧртэм выжы калыкъёслэн Яга песяйёссы выжыяськизы. Нош тӥ  маин паймытыны быгатӥськоды палэнысь вуэм куноосты?
— Удмурт калыклэн вашкала улэм-вылэменыз герӟаськем возьматонъёсмы туж трос, чебер интыосмы но вань, азьланезлы малпанъёсмы но тырмыт. Библиотекаямы трос аръёс ӵоже ини ужа «Ӝыт тылъёс» клуб, отчы пырисько гуртысьтымы песянайёс. Соослэн вашкалаез сярысь тодонзы туж узыр: улэм-вылэмзы, вӧсяськон интыос, нюк-гопъёс сярысь мадёзы, киужъёсынызы тодматозы, кырӟалозы-вералозы.

Берло дыре улон воштӥськиз, берыктӥськиз вашкалаез пала. Пиналгес дыръям малпасько вал, кинлы со ваньмыз кулэ луоз? Ми будӥмы анаелэн анаеныз Анисья Евдокимоваен. Пичи дыръямы валес котыръёс, ковёръёс куэ вал. Вань со ужъёссэ нылпиосызлы кельтӥз. Милемлы шуылӥз: ноку но, пе, та секыт ужен выроно медад луэ.

Туж жалясько, вань тодэм-валамзэ со сьӧраз нуиз. Юалляськы вал вашкала улэм-вылэмзы сярысь, киужъёс бордын ужамзэ. Баграш-Бигра муниципал кылдытэтамы пырись Орлой гуртын вань ай  вашкалазэ мадьыны быгатӥсь кибашлы песянай.
Весь шуисько, туризм борды рос-прос басьтӥськоно. Кунгож сьӧрысь вуэм куноослы сюресъёс шаерысьтымы котькуд ёросэ, котькуд гуртэ усьтыны луоз. Асьмеос, удмуртъёс, ӵемысь ум валаське, ум тодӥське мар бордысен кутскыны. Яке дӥсьтонмы уг тырмы. Валя сузэре семьяеныз Эстониысь Тарту городын улэ, быземын пор пилы. Со но весь шуэ, кунгож сьӧрын улӥсьёс понна сомында тунсыкоез гурт улонын, тӥляд номыр выльзэ малпанэз ӧвӧл, вӧй шукконэз ик верано ке.
Троссэ ужрадъёсмес ортчытъяськомы культура юртын ужасьёсын ӵош, туризмен герӟаськемъёссэ но. Таяз арын «Ӝыт тылъёсын» пыриськимы Вӧй келян арняе. Ижысь студентъёс, школаын дышетскисьёс вуылӥзы та шулдыръяськонэ. Ортчиз со Орлойын куно пумитан коркан, интыос но со палан туж чебересь.

Песянайёсылы шуисько, ойдолэ Вӧй келян йылолэз азьланяз дунэн ортчытъялом. Табаньды, мильымды понна уксё сётозы. Кин ке вӧй шукконэз возьматоз: гуртысьтымы пиналъёс гинэ но уг тодо ни, мар со сыӵе, уго тросэз семьяос скал уг вордо.  Куноослэн, оло, асьсэлэн но вӧй шуккемзы потоз.

Туризм сярысь кылыса, песянайёсы куалектӥзы, ум гинэ, шуо. Секыт уго одӥг ӧрысь мукет ӧре выжыны, уката ик со уксёен герӟаськемын ке. Удмурт калык куно пумитаны быгатэ: сюлмысьтыз сюдоз, секталоз, шулдыртоз. Нош уксё поттыны та вылын дась ӧвӧл.

* * *
— Кинъёс пырисько «Ӝыт тылъёс» клубады?
— Та клублы кылем арын 35 ар тырмиз. Гуртысьтымы библиотекаен кивалтыкуз, сое кылдытӥз анае Анастасия Фёдоровна. Отӥяз та «пирдан» выжиз мыным. Огвакытэ секытгес югдур кылдӥз вал. Асьсэды пересен лыдъяса, арлыдоосызгес ветлэмысь дугдӥзы. Нош пиналъёсыз пенсионеръёс арлыдоослэн радазы пырыны ӧз дыртэ. Собере огдышем коллектив пушкы выльёсызлы пырыны секытгес.

Али ваньмыз радъяськиз.  Азьветлӥсьёсмы дасо пала, кылемъёсыз  быгатэмзыя пӧламы пырисько. Но таиз армы секытгес кыстӥське. Весь каръяськыны турттӥмы, Пугачёвоын пуштылонъёс бере культура юртмес сэрттӥзы. Пуктӥськон вакытлы культура удысын ужасьёсты  выжтӥзы азьвыл столовойлэн, колхоз конторалэн юртъёсазы.

— Туризмез гуртады азинтон ласянь кыӵе ке проект гожтон сярысь ӧд малпаськылэ-а?
— Кемалась сыӵе малпан йырам берга. Валя сузэре но весь индылэ. Ваньмыз вань кадь: мылкыд, малпанъёс, дась ужъёс. Ваньзэ сое одӥг ӧре радъяса, гожтонэз гинэ кылиз на. Таиз  бордын ик ужпум — проект гожтыны быгатон кулэ. Мон гинэ уг шугъяськиськы, дыр, та ласянь. Мар бордысен кутскыны паймыса, тросэз ӟеч малпанъёс быдэсмытэк ик кылё. Нимысьтыз дышетсконъёс, семинаръёс радъяно вылэм та удысын ужаны мылкыд карисьёс понна.

— Тӥ озьы но куноостэк уд улӥське. Гурттылэн данэз вань — кунгож сьӧрысь вуэмъёсты ӵемысь дорады келяло. Ижлы матын луэменыды гинэ герӟаськемын ӧвӧл, дыр, со.  Куно пумитыны быгатэмды но, сям-йылолъёсты утемды но, гурттылэн котыр ласянь азинскемез но лыдэ басьтӥське.
— Туэ март толэзе дорамы вуылӥзы Америкаысь куноос. Соос милемды асьсэос шедьтӥзы. Корка пырон сям-йылолэз возьматӥмы. Чук но шуккимы. Та сям солдатэ келянын гинэ уг кутӥськы вылэм вашкала дыръя. Туж кельшиз куноослы: дорады, эшшо, пе, лыктомы на.

Мае нош ик вуизы. Семьяосынызы гинэ лыктӥллямтэ, асьсэ палась студентъёсты но вайиллям. Палэнысь вуэм куноос ёросамы радъям маршрут сюресъя ортчизы. Нырысь Вуж Мӧньяысь кибашлыослэн юртэнызы, куро мунё лэсьтонэн, парковой скульптураен тодматскизы, собере ини гуртамы вуизы.

Таяз учыре анай-атаелэн Анастасия но Леонид Николаевъёслэн юртазы люкаськимы, куалазы но вань ай соослэн. Куноосмылы возьматӥмы пукон корка йылолэз, пӧртэм киужъёсын тодматыса. Бакчаысь турын-куарен парем чай сектамы, гуртмы сярысь мадимы. Оломар но юаллясько: кӧня арлыдын нылпи ваё нылкышноос, бадӟымесь-а семьяосмы? Пуконмы кенешон-вераськонлы пӧрмиз. Собере нылкышнооссэс удмурт дӥськутэн дӥсямы, эктӥмы, кырӟамы, удмурт шудонъёсын шудӥмы, коркась корка ветлӥмы.

Пумиськонмы зэмос юон дырлы пӧрмиз. Одӥгез куно воргорон шуиз: быдэс дуннеез котыртӥ ни, пе, нош таӵе куноятэмез нырысьсэ адӟисько. Анаелэн пушкыз ик тыриз со кылъёслэсь, дышемын ке но ини палэнысь вуэмъёслы. Кызьы мон асме тодӥсько, шаерамы вуэм куноосты весь дорамы келяло вал — финъёсты, венгръёсты, эстонъёсты. Анае но, библиотекаен кивалтыкуз, пӧртэм ужрадъёс, пумиськонъёс ортчытъяз.

Куноосты ас доразы пумитаны ваньмыз ик соглаш уз луэ. Кӧня сюлмаськонэз, утялтӥськонэз, дасяськонэз. Гуртамы дась удмурт корка луысал ке, коть уйшоре куноос мед вуозы — пумиталомы, утялтомы. «Ӝыт тылъёсысь» нылкышноослы вера гинэ, соос черсӥськонъёсын, пӧлэстӥськонъёсын, керттӥськонъёсын соку ик вуозы. Кыӵе вожъяськоно гуртъёсын сыӵе коркаос усьтэмлы. Тани милям ёросамы ик Тыло гуртын Семён Самсоновлэн юртэз усьтӥськиз.

Ёрос но гурт кивалтӥсьёсмылы кемаласен вераськом ини: куноосты пумитаны нимаз юрт кулэ, ойдолэ талы нимаз юртъерез басьтом, отын ик музей кылдытысалмы. Кылӥсь ӧвӧл. Но музей кылдытон сярысь малпанэлэсь уг куштӥськиськы. Гуртъёстӥ ветлыса, вашкала арбериос люкасько. Калыклы вазиськисько, кулэтэм котыръёссэс библиотекаямы мед ваёзы шуыса. Соосты возьыны интымы ӧвӧл бере, огдырлы дорысьтымы пичи коркан но возьыны дась.

— Пугачёвоын луэм  пуштылонъёс гурттэс но зуркатӥзы. Соин йырин вужез культура юртты ярантэм луиз, шуиськоды. Оло, выляз пуктоно юртын музейлы но, куно пумитанлы но инты шедёз?
— Выль юрт пуктонлы шумпотӥмы, но туж сюлэмшугъяськиськом, кыӵе луоз солэн быдӟалаез. Проектэз та дырлы дась ӧвӧл, эскеронъёс мыно на, пе. Пуктыны чаклам юрт туала куронъёслы мед тупасал. Гурт калык туж возьма культурая бадӟым комплекс: спортзалэз но, кружокъёс ортчытъянъя пӧртэм кабинетъёс но мед луысалзы отын. Гуртамы арысь аре тросгес нылпиос вордӥсько, егитъёс доразы ик улыны кылё. Соин ик кулэ дискотекаос ортчытъян инты но.

Библиотекамы вӧзын кылдытэмын на егит анайёслэн, кенъёслэн «Мылкыд» клубзы. Берло дыре троссэ ужрадъёсмес,  кык клубъёсты огазеяса, радъяськомы. Гуртмылэн вашкала сям-йылолъёсыз медаз ыше-быре, соосты егит анайёс, соослэн нылпиоссы мед азьланьтозы.  Юртлэн быдӟалаез азьло кадь ик кылиз ке, библиотекаын пумиськылон инты тырмыт уз луы, музей усьтон сярысь веранэз ик ӧвӧл ни. Соин ик туж оскиськом,  гурт калыклэсь сюлмаськонъёссэ лыдэ басьтозы шуыса.

Лия Малых

Туспуктӥз Владимир Беломорских

Удмурт Дунне
By Удмурт Дунне 30 октября, 2012 06:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<