Юрт улын — уксё

Удмурт Дунне
By Удмурт Дунне 8 октября, 2012 18:17

Юрт улын — уксё

Бюджет чотын ужасьёслы юрт вуоз вуоно арын

Ижын ӝутыны кутскемын бюджет чотын ужасьёслы юрт. Пуктӥськон вазенгес ик мытэмын ни, кулэ на вал вылӥ кивалтӥсьёсмылэн бакель сётэмзы.

Республикаямы улон юртъёс пуктонъя «Огъя Россия» партилэн пӧртэм проектъёсыз улонэ пыӵало. Озьы 5 сюрс пала егит семьяос корка пырон ортчытӥзы ни «Улон инты — егитъёслы» программа чотын. Вуоно арын нырысетӥ кварталэ дась луоз дышетӥсьёслы юрт — отчы 100 визьнодасьёс пырозы.
— Кылем арын эшшо одӥг малпан йырамы кисьмаз — бюджет удысын ужасьёслы нимысьтыз корка пуктоно, — шуиз Президент Александр Волков. — Озьы вакчи дыр куспын та уж борды басьтӥським. Вуоно ар пумын со дась луыны кулэ.

Ленин ёросысь Зоя Космодемьянскаялэн урамысьтыз коркан 178 квартира луоз. Кыӵе амалъя соос люкылӥськозы — туннэ тыро-пыдо документъёс ӧвӧл на. Но одӥгез тодмо ни: отын улозы дышетон, эмъян, культура, калыклы улон-вылонын юрттэт сётон, спорт удысъёсын тыршисьёс. Квартираос сётӥськозы арендае.
— Улонын котьма луэ, ваньмыз ик ас кужыменызы улон инты басьтыны уг быгато. Малы соослы юрттонтэмез? — мылкыдзэ вераз Александр Александрович. — Куд-ог ӟеч специалистъёсмы мурт патерын уло, пичи сэрегъёсын векало. Со сяна, бюджет удыслы кулэ егит специалистъёс. Кылсярысь, Москваысь Щепкин нимо театр училищеын егитъёсмы дышетско. Республикаямы берытскизы ке, улон интызы ӧвӧл. Малы та юртэ соосты интыянтэмез?

Президент А. Волков, лэсьтӥськонъя, архитектурая но улон политикая министр С. Шикалов асьсэос васьказы корка улэ гудэм мур гулэн пыдэсаз. Нырысетӥ из понӥзы. Ӧз вунэтэ Россиысь вашкала ӟеч сям сярысь но. Выль юртлэн нырысетӥ изэз улэ вашкалаосмы коньдон тырылӥзы, отчы пырисьёс ванё-буро мед улозы шуыса.
Бюджетникъёслы та нырысетӥез корка. Вылӥ кивалтӥсьёс оскытӥзы: берпуметӥез со уз луы. Республикамы арлы одӥг ке но таӵе юрт ӝутыны тыршоз.

Элина Кумачёва

Удмурт Дунне
By Удмурт Дунне 8 октября, 2012 18:17