Вормонме сӥзисько атаелы!

Удмурт Дунне
By Удмурт Дунне 8 октября, 2012 14:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вормонме сӥзисько атаелы!

Олег Чувашов луиз Россиысь анай кылъя устоез дышетӥсь

 

Можга ёросысь Пазял школаысь егит дышетӥсь Олег Чувашов пӧсе-леке вуттӥз Президентмес. Александр Волковлы ӝегатскытэк ватсанъёс пыртоно луиз республикаысьтымы устооссэ дышетӥсьёсты сӥлы карон радлыке. Сю визьнодасьёс пӧлы со чик могатскытэк ватсаз на Олег Анатольевичез.

Олег Чувашов август пумын пыриськиз Россиысь анай кылъя дышетӥсьёслэн конкурсазы. Отысь бертӥз азьвесь тылыен — Гран-при басьтӥз. Республикаысьтымы визьнодасьёс та ӵошатсконын котьку ик ӟечесь тодон-валанъёссэс, быгатонлыкъёссэс возьматъязы. Но таӵеез ӧй вал на.

— Шаерамы анай кылъя дышетӥсьёслэн конкурсазы мон кыкетӥ инты басьтӥ вал, 0,4 баллы гинэ кыли Пичи Пурга ёросысь Кечол школаысь дышетӥсьлэсь Нина Анатольевна Ермокиналэсь, — шуэ Олег Анатольевич. — Тае лыдэ басьтыса ик, луоз, Дышетонъя но наукая министерство мыным Россиысь ӵошатсконэ пыриськыны ӵектӥз.

Дасяськыны кык толэзь но кылемын ӧй вал ни ке но, Олег Чувашов сюрес вылэ потыны соку ик соглаш кариськиз. Малы кужымдэ эскеронтэмез? Удмурт кылэн со шока-улэ ук! Егит дышетӥсь уг но ваты: вормисьёс радэ шедёз шуыса, со оске вал.

* * *
Саранскын куинь нунал ӵоже ӟырдыт нюръяськон мынӥз. 24 улосысь 29 дышетӥсьёс вуизы отчы. Котькудзы тунсыко мастер-классъёс, улоссы, школазы, асьсэос сярысь презентация дасямын, пӧрмытскемын калык дӥсенызы.

Мар дасяз Олег Чувашов? Удмурт дӥсен солы юрттӥз «Айкай» ансамбльлэн кивалтӥсез Пётр Данилов. Видеое пуктӥз школа садазы радъям уроксэ. 9-тӥ классэ ветлӥсь пиналъёс валэктон утчазы: удмурт кылэз быроз шуыны луэ-а?

— Ӵапак таӵе юалляськон ортчыто вал калык пӧлын «Мынам Удмуртие» телеканалысь  журналистъёс. Таос борды итӥськоно кариськи, — вера егит дышетӥсь. — Нылпиосты куинь группалы люки: одӥгъёсыз — ӟучъёс, киязы арган сётӥ, кыкетӥосыз — бигеръёс,  нянь сукыри кутытӥ, удмурт группалы дэмлай Библиез — М. Атамановлэсь берыктэм «Ӟеч ивор» книгазэ. Нылпиос куспазы ӵашетӥзы-кенешизы: удмуртъёслэн но вань  культуразы, сямъёссы-йылолъёссы, соос туж ярато кырӟаны-вераны, мукет калыкъёсын огкыл шедьто. Малы соослэн выжызы бырыны кулэ? Тыршись муртлэн  ӝӧк вылаз котьку луоз нянь, удмуртъёслэн сукыри  пыжон культуразы но вань. Малы удмуртъёс бырозы? Удмуртъёс Инмарлы но ас кылынызы вазиськыны быгато. Иське, малы соослэн кылзы ӵушиськыны кулэ? Та пумысен малпанъёссэс нылпиос лушкем, куаразэс компьютер пыр сётыса, вераны быгатӥзы. Соос огымысь кадь шуизы: удмуртъёс, удмурт кыл, удмурт культура уз быры, со пушъёз!

Жюрилэн тусызъя ик адӟиськиз: Удмуртиысь ваем мастер-класс кельшиз! Олег Анатольевичен ӵош Саранске ветлӥзы на Алнаш ёросысь Писэйгурт школаысь дышетӥсь Елена Евсеева но Дышетӥсьёслэсь тодон-валанзэс будэтонъя институтысь Андрей Клементьев. Андрей Александрович лӧптӥз: вормисьёс радэ шедим ке, одно удмурт «Ум люкиськеез» кырӟаса лэзё!
Тани конкурсын яло ни куинетӥ интыез. Со, пе, донгиське бигеръёслы. Кыкетӥ инты… мордваослы, нырысетӥез… чувашъёслы. Калык шокамысь ик дугдӥз кадь. Азвесь тылы кошке… Удмуртие, Олег Анатольевич Чувашов кие!

Андрей Клементьев тапыр эктэ, удмурт, ӟуч но бигер кылъёсын кырӟа «Ум люкиськеез».
— Нош мынам пушкы тыриз, ачим ик кышкатски: синвуэ гинэ медаз быльыра, — уг ваты егит дышетӥсь.
Со тылызэ выллань ӝутӥз но ваньзылы кылымон вераз:
— Та вормонме сӥзисько атаелы!
* * *
Удмурт кылэз, удмурт калыкез яратон мылкыд Олег Анатольевичлы нырысь ик пыӵатӥз атаез Анатолий Михайлович Чувашов. Пазял школаын со куамын арлэсь кема нуиз удмурт кылъя но литературая урокъёсты. Дораз ик дышетскиз Олег пиез но.

— Атаеным котьку данъяськылӥ, — тодаз вае Олег Анатольевич. — Урокъёссэ йӧн-йӧн ортчытъяз, чылкыт дӥсяськылӥз. Мон тыршылӥ, атайме возьытэ медам уськыты шуыса…

Жаляса верано, куинь ар талэсь азьло Анатолий Михайловичлэсь улонзэ секыт висён талаз. Но аслэсьтыз лёгем сюрессэ со пиезлы сӥзьыса вуттӥз — Олегзэ вордскем гуртаз, школаяз берытскыны, удмурт кылъя но литературая урокъёссэ нуыны куриз.

Со вакытэ Олег Чувашов Ижын улэ вал. Вуттӥз ни вал «Ижводоканалын» возьмаськисьын ужаса но, ассэ ӟечен возьматӥз ГТРК-ын журналист луыса но. Нош берло ог ньыль арзэ  промышленно-экономической колледжысь студентъёсты история, обществознание, политология, социология предметъёсъя визьнодаз. Отын со дышетон удыслэсь шӧмзэ умой-умой валаны кутскиз.

Колледжысь ик мӧйы дышетӥсьёс солэсь ужаны мылкыдзэ ӝутӥзы, ялан шуныт кылъёс вераллязы, пичияк вормонъёсыз понна но ушъяллязы.
— Малы та предметъёсъя дышетӥ? Мон Можгалась педучилище бере УдГУ-ысь историяя факультетэз йылпумъяй ук. Владимир Емельянович Владыкин тодосчилэн тодон-валанъёсызлы синмаськыса, УдГУ-э мынӥ. Училищее со лекциосын вуылэ вал — выжыкылэз кадь кылзылӥ соосты. Озьы историлы синмаськонэ пуромиз.

Можга педучилищеысь Олег Анатольевич потӥз математикая но покчи классъёсты дышетӥсь луыса. Тӥни малы удмурт кылъя но литературая урокъёсты нуэм сяна, со Пазялысь пиналъёсты математикая но информатикая визьнода.

— Та предметъёсты но отӥгес кареме уг поты, — шуэ дышетӥсь. — Дышетэм пиналъёсы туэ аттестация пыр потозы ни. Туж потэ, ӟечесь тодон-валанъёссэс мед возьматозы шуыса.
Егит дышетӥсь оске, математикая урокъёссэ но со ӝутыны быгатоз ай — оло, кыӵе ке конкурсъёсын возьматоз соосты.

— Школаын ар но ужаса ӧй вутты на вал, пыриськи ёросамы ортчем «Арлэн дышетӥсез» конкурсэ, — вера Олег Анатольевич. — Вормисе потӥ. Но республикае ӧй мыны. Соку но угось удмурт кылъя мастер-класс возьматӥ вал. Малпай: анай кылъя мукет но конкурс вань, отчы пыриськоно, нош «Арлэн дышетӥсез» ӵошатсконын, математикаез ик возьматыса, умойгес луоз.

* * *
Удмурт кылъя но литературая, математикая яке историяя, социологияя, политологияя урокъёсты нуиськод — пӧртэмез ӧвӧл. Нырысь ик тон Дышетӥсь луыны кулэ. Нылпиос тон шоры синмаськыса, оскыса мед учкозы. Туннэ улонэн гинэ эн улы, малпаськы азьланез сярысь. Пиналъёс школаысь кошко ке но, соос тынад  дышетэм пиналъёсыныд кылё, кызьы азинтозы сюрессэс — та понна кыл кутыны котьку дась лу!

Егит визьнодась таӵеен адӟе аслэсьтыз улонын интызэ.
— Дышетӥсь луон сярысь пичиысен ик малпаськи, юнме ӧй поты педучилище, университет пыр, шумпотӥсько, кыӵе удыслы дышетски, отын ярасько шуыса, — вера Олег Анатольевич.
Воргорон дышетӥсь шоры пӧртэм сямен учкисьёс вань. Школае удалтымтэос гинэ  кылё шуисьёс но шедё. Олег Чувашовлэн та шоры чылкак мукет учконэз: астэ тон дунъяськод, кулэдэ шодӥськод ке, кызьы тон удалтымтэ луод?

— Бен, дышетӥсьлэн ужез соку ик уг но адӟиськы. Но ми ужаськом ӵуказе нунал понна! — шуэ со.
Нялтас вераса, Олег Анатольевичлэн кузпалыз но дышетӥсь, Удмурт кун университетысь удмурт филология факультетэз йылпумъяз со. Наталья Гордеевна удмурт кылъя но литературая урокъёсты нуиз вал, озьы картэзлэн со бур киыз луэ — котьма ласянь юрттэ, мылкыдзэ ӝутэ. Али пуке нылпиосынызы. Бадӟымез пизы школае вамыштӥз ни, нош нылзы туэ гужем гинэ вордскиз.
Шуак омырскем данэз егит дышетӥсез ӧз буса. Йыр поромонлы дыр ӧвӧл — ужъёс витё. Олег Чувашов котькуд ӵукна йыгмыт вамыштэ школа пала. Йыраз уно малпанъёс бергало: мар выльзэ со туннэ сётоз нылпиослы?

Элина Кумачёва

 

Удмурт Дунне
By Удмурт Дунне 8 октября, 2012 14:05