Уло пунэмаськытэк

Удмурт Дунне
By Удмурт Дунне Октябрь 12, 2012 11:39

Уло пунэмаськытэк

Валтӥсь зоотехник Л. Григорьева.

Азинскон я бырон потэ кивалтӥсь бордысь, шуо калыкын. Алнаш районысь «Писеевское» хозяйствоын ужасьёс та веранэн быдэсак соглаш. Малы ке шуоно хозяйствозылы кивалтӥсе Николай Михайловез юнматэмзы бере умой пала воштӥськонъёс адӟиськыны кутскизы.

Дышетскемезъя Николай Иванович дышетӥсь, озьы ке но гурт удысэз вить чиньызэ кадь тодэ. Берло дыре воргорон трос кужымзэ сётэ фермаосты но трактор-машинаосты выльдонлы. Ужез пӧрме. Гуртазы вуылыку, синмез тужгес но кыско туала выль гидъёс.

Скал гидзэс пуктӥзы кылем арын. Воштӥз со ньыль вуж гидэз. Чакламын 400 йырлы. Пудоос ньыль радэн сыло. Гидын югыт но шуныт, пуктэмын выль йӧл кыскон тӥрлык.

Выль скал гид пуктэмезлэсь азьло Михайлов вуылӥз республикаысь унояз хозяйствоосы. Мар тунсыкозэ, выльзэ адӟиз, ваньзэ бератаз ас дораз пыӵатӥз. Табере тунсыкъяськись куноос дорысьтызы уг кошкыло.
Куд-ог хозяйствоос, сиён уг тырмы шуыса, пудо йырзэс кулэсто ке, Писэйгуртын сое йылэто. Кылем арын сюро таза пудозы 1 сюрс 56 ке вал, туэ со 1 сюрс 208-озь ӝутӥськиз. Пудолэн выжыез но умоя. Туэ 35 ветыл вайизы районысьтызы ик «Молодая гвардия» племрепродуктор хозяйствоысь. Эшшо 110-сэ «Иж-Кама» хозяйствоысь вуттӥзы. Ваньмыз со юрттэ продукция поттонэз йылэтыны. Кылем арен ӵошатыса, туэ Писэйгуртын йӧл 761 центнерлы тросгес кыскемын. Скаллы быдэ со 4 сюрс 515 килограмм усе. Ар йылпумъяськытозь, та лыдпусэз 6 сюрсозь вуттыны малпало.

Выль гидэ потыса, дояркаослэсь ужзэс мукет сямен радъяно луиз. Соос татын 12 кузя, шор-куспо арлыдзы 40 арес.  Кык мурт борды юнматэмын 70 скал. Туэ тужгес но чырмыт ужало В. Семёнова но Т. Кулакова — укмыс толэзь куспын скаллы быдэ 4 сюрс 685 килограмм йӧл кыскизы. Соослэсь ӧжыт гинэ берегес кылизы Р. Михайлова но Н. Колесникова. Пудо утисьёслэн уждунзы йӧллэсь потэ — толэзяз ог 8-10 сюрс манет.
Скал фермаысь вань ужез бергатэ В. Максимова. Валтӥсь зоотехнике юнматэмын Л. Григорьева. Удысэз кельше. Солэн верамезъя, фермаын али ӟеч ужан понна ваньмыз лэсьтэмын. Одӥг липет улэ интыямын пудоез бызьылытӥсьлэн, пудо эмъясьлэн, зоотехниклэн кабинетъёссы. Скал кыскисьёслы нимаз висъет лэсьтэмын кылиськыны-дӥсяськыны. Со сяна, вань шутэтскон комнатазы, отын холодильник, сиён пӧсятъян электро- гур сылэ. Ваньмон дыръязы татын чай юо, юбилейёссэс но куддыръя ортчытъяло.

2010-тӥ арын сямен ик, алнашъёслы куазен туэ нош ӧз удалты. Гужем зоръёс ӧй вал бере, начар кылизы юос но пудо сюдон культураос. Соин ик уноез шуге-леке вуизы пудо сиёнэн.

— Кылем арын кадь ик сиёнмы бусьтыр ӧвӧл, — шуэ зоотехник Л. Григорьева, — но толэз потомы. Милям кылем арын тырем силосмы вань на. Турын дасяны бускель Можга районэ потамы. Ваньзэ сое чотаса, пудо йырлы быдэ 49 центнер сиён дасямын. Азьланьзэ учкыса ужаськод ке, секыт аръёс но капчиен сётӥсько.
Ӵуказе нуналзэс верано ке, гурт калыклэн малпанъёсыз эшшо но бадӟымесь. Уноез соос герӟаськемын пудо вордонэн. Кулэ на выль гидъёс. Матысь дыре Улын Сырьезе выль ферма улэ фундамент кисьтыны малпало. Отын скалъёс кунян ваёзы. Зэм, таӵе гидзы татын вань, но со вуж, туала куронъёслы уг тупа. Эшшо одӥг бадӟым сюлмаськонзы вань ай Улын Сырьезь гуртысь пудо утисьёслэн. Татчы скал ферма вӧзы ик выль кунян гид ӝутэмын. Отчы 300 кунянъёсты пыртозы. Со вуыны кулэ октябрь толэзь пумын. Мукет бригадае, Писэйгуртэ, мылкыдзы вань пуктыны одӥг но кык аресозь кунянъёсты будэтонъя выль фермаос.

Хозяйствоын вань асьсэлэн лэсьтӥськон ужен вырись бригадазы. Кулэ дыръяз палэнысь кибашлыосты но ӧтьыло. Уждунлы но материаллы уксёзы асьсэлэн ик тырме — кредитъёс уг окто. Уксёзэс шыръяса куто. Азинскон сюрессы отӥяз но вольыт кошкыны кулэ.

  Леонид Ушаков

 

Удмурт Дунне
By Удмурт Дунне Октябрь 12, 2012 11:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<