Учкисьёсмес паймытом

Удмурт Дунне
By Удмурт Дунне 2 октября, 2012 15:14

Учкисьёсмес паймытом

Филармония мытӥз выль сезонзэ

Быдэс дунне 1-тӥ коньывуонэ пусйиз Крезьгурлэсь  нуналзэ. Удмурт кун филармония та нуналэ 75-тӥ концерт сезонзэ усьтӥз. Калыкез шумпоттӥз филармониысь «Музыгранты» группа «Старое вино» программаеныз.

Мар тунсыкоез вите на учкисьёсты юбилей сезонын? Та но мукет юанъёсын вазиським Удмурт кун филармонилэн кивалтӥсезлы Алексей Фоминлы.

— Алексей Юрьевич, маин паймытоды милемыз, учкисьёсты, ар ӵоже?
— Паймытом трос выль проектъёсын, выль нимъёсын. Кылсярысь, «Золотая мелодия» оркестр концерт сётоз Россиысь тодмо профессоръёсын валче. Та сям вунэтэмын ни вал. Туэ  сое улӟытом. Малы ке шуоно милям валтӥсь ужпуммы — калыкез тодматыны вылӥ искусствоен.  Озьы «Золотая мелодия» туэ концерт сётоз Россиысь калык артистэн, Урал кун консерваториысь профессорен, баянэн шудӥсен Виктор Романькоен.
Та оркестрен ик герӟаськемын мукетыз проектмы — литературалы сӥзем ӝытъёс. Соос «Оркестрен выжыкылъёс» амалъя дасямын, моноспектакль выллем луозы. Оркестр шудэм улсын, шуом  Ф. Шопенлэн крезьгурез чузъяськыку, артист лыдӟоз Б. Пастернаклэсь, А. Блоклэсь, А. Ахматовалэсь но мукет поэтъёслэсь  кылбуръёссэс.

— Нош кин лыдӟоз соосты?
— Асьме учкисьёслы та  усточи тодмо ӧвӧл на. Со  18 аресъем пияш Алексей Губкин, дышетске культурая колледжын. Али ми соин ужаськом ини.  Пинал арлыдыз шоры учкытэк, со туж умой быгатэ произведенилэсь валтӥсь малпанзэ калык доры вуттыны. Малпасько, учкисьёсты Алексей паймытоз.

— Мар эшшо филармониын вылез?
— Ми усьтӥмы выль отдел. Филармониын вань   «Золотая мелодия» калык инструментъёсъя оркестр, «Шулдыр ӝыт», «Музыгранты» коллективъёс, «AVIS CANTU» академической хор капелла. Соос вӧзы ватсаськиз эшшо одӥгез —  «Квартет Чайковский». Со — Иван Новиков (альт),  Илья Петухов (скрипка), Яна Коновалова (скрипка), Наталья Рязанова (виолончель). Л. Бетховенлэн, М. Глинкалэн, Г. Гендельлэн, Г. Малерлэн, Д. Шостаковичлэн  но трос мукет композиторъёслэн вань квартетлы чаклам крезьгуръёссы. Нош соос Ижын воксё уг чузъясько, асьмеос вунэтӥм струнной квартетъёсты. Соин ик культурая, печатья но иворъёсъя министрен Дмитрий Ивановен кенешим но огкылэ вуим: Ижын луыны кулэ квартет. Ар ӵоже тыршомы, калык соин мед тодматскоз шуыса.  Соин ик квартетэз пыртӥм абонемент циклэ. Та  сезон ӵоже «Квартет Чайковский» бадӟымъёслы но пичиослы быдэн куинь концерт сётоз. Кылсярысь, чузъяськоз П. Чайковскийлэн 1 номеро струнной  квартетэз. Тросэз усточиос та произведениез быдэстыны кышкало, но ми, аспал эшмес данъяса, сое быдэстоно кариським. Крезьгур 37 минут кыстӥське ке, ми отчы Чайковскийлэсь мукет произведениоссэ но пыртӥм на. Квартетлэн кыкетӥ концертэз сӥземын луоз Г. Гендельлэн, А. Вивальдилэн творчествозылы. Куинетӥяз чузъяськоз Д. Шостаковичлэн 8-тӥ квартетэз но М. Марутаевлэн 1 номеро квартетэз.

—  Луозы на-а «П. Чайковскийлэн вордӥськем палъёсаз»  но джаз фестивальёс?
— Одно ик. Ӵапак та квартетлэн ньылетӥ концертэз луоз П. Чайковскийлы сӥзем фестиваль дыръя. Дано композиторлы но джаз крезьгурлы сӥзем фестивальёс шаерамы валтӥсьёсыз радын. Туэ но та ужрадъёс паськыт ортчозы. Джаз фестиваль луоз ноябрь пумын.  туж тодмоесь куноос вуозы. Кылсярысь, шаерамы улӥсьёс кылзыны быгатозы быдэс дуннелы тодмо луэм «The Shin» квартетэз. Отын шудӥсьёс Грузиын вордскемын, но уло но ужало Германиын. Озьы ик фестивале пыриськозы пианист Яков Окунь, «Фонограф джаз бэнд» оркестрез кылдытӥсь, Россиысь тужгес тодмо джазмен Сергей Жилин но джаз кырӟась Дебора Браун.

П. Чайковскийлы сӥзем фестиваль ортчоз вуоно арын апрель-май толэзьёсы. Отчы но ми возьмаськом дано музыкантъёсты. Но ваньзэ али ик шараям уг поты на, калык, концертамы лыктыса, мед паймоз.

— Удмурт учкисьёслы уката тунсыко, дыр, удмурт артистъёс сярысь тодыны. Эстрада кырӟанъя «Шулдыр ӝыт»  театрын бадӟымесь воштӥськонъёс вал.
— Озьы. Но нырысь ик верам потэ: «Шулдыр ӝытлы» туэ 35 ар тырме. Та лыдпуслы артистъёс шулдыр концерт дасяло, со луоз ноябре. Театрлэн чеберлыкъя кивалтӥсез Марина Галичанина филармониысь кошкиз. «Шулдыр ӝыт»  ансамблен со интые кивалтэ Наталья Ушакова. Озьы ик быриз «Малпан» группа. Светлана Ручкина кошкиз Финляндие дышетскыны, Эльвира Панченко Санкт-Петербурге мынӥз. Но та нылъёсын милям кусыпъёсмы шунытэсь, ми соосты возьмалом, концертъёсамы ӧтчалом. Калык тодматскоз выль артистъёсын но. кылсярысь, Яна Белослудцеваен. Удмурт учкисьёс выль нимъёсты усьтозы, тунсыко концертъёсты адӟозы. Сыӵе луонлыксы кылдоз  ини матысь нуналъёсы ик. 19-тӥ коньывуонэ луоз «Кык кизилиос» проект.

— Культура, искусство удысысь тодмо адямиосын пумиськонъёсты азьланьтӥськозы-а?
— Творческой пумиськонъёс одно ик луозы. Кылсярысь, шаерамы улӥсьёс таяз толэзе пумиськозы СССР-ысь калык артистэн Василий Лановоен. Василий Семёнович люкаськемъёслы лыдӟоз А. Пушкинлэсь, М. Лермонтовлэсь, Ф. Тютчевлэсь, А. Ахматовалэсь но мукет классикъёслэсь кылбуръёссэс. Дорамы вуылоз РСФСР-ысь калык артистка Светлана Крючкова. «Санкт-Петербургысь яратыса» программаен лыктоз Совето Союзысь калык артист Олег Басилашвили. Солэн ӝытаз чузъяськозы поэзия но проза, улон сярысь вераськонъёс,  ваче юан-веранъёс.

— Кылӥськиз, филармонилэн залэз но выльдӥське шуыса.
— Ми тыршиськом, калык дорамы чебер, вылӥ ӟечлыко крезьгурен тодматскыны мед быгатоз шуыса. Адямиослэн культуралы, искусстволы матэгес  кариськыны, гань-гань шутэтскыны луонлыксы мед кылдоз. Соин ик филармонилэн залаз но воштӥськонъёс вал. Табере отын укноос ӧвӧл ни, сцена но ужан аппаратура выльдэмын. Куара но татын умойгес чузъяське ини. Кафемы но выль. Вань та воштӥськонъёсты адӟозы, дунъялозы дорамы лыктэмъёс. Малпасько, учкисьёслы кельшоз. Соосты шумпоттоз но паймытоз филармониысь артистъёслэн ужамзы но, выль проектъёсмы но.

Галина Семёнова

Удмурт Дунне
By Удмурт Дунне 2 октября, 2012 15:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<