Тулкымъёс но юмокъёс

Удмурт Дунне
By Удмурт Дунне Октябрь 26, 2012 13:24

Тулкымъёс но юмокъёс

Журналист В. Михайлов, звукорежиссёръёс Л. Гусев но Н. Мамонтова.

Туэ 80 ар тырме Удмурт радиолы. Ӟуч тодосчилэн Александр Поповлэн кылдытэм арбериез нырысьсэ удмурт сямен вазиз 1932-тӥ арын 5-тӥ шуркынмонэ. Со дырысен уно радиоверанъёс дасямын. Нош ужын луэм учыръёс анекдот выллем ветло на корреспондентъёс пӧлын. Куд-огеныз тодматэме потэ.

Гай агай
Удмурт радиоысь диктор но редактор Гай Сабитов огпол вазь ӵукна дыртыса дӥсяськем но эфирез усьтыны кошкем. Шунды ӝужамлэсь азьвыл уже мынӥсь шер-тур калык маке но шораз учке но мыньпотэ, пе. Изьызэ но, пальтозэ но эскерем ини Гай агай — ваньмыз интыяз. Радиоюртэ вуэмез бере гинэ адӟем: кальсонэзлэн кукъёсыз думылэмын ӧвӧл, пыдъёсыз бӧрсьы нюж гинэ тӧдьы калъёс кыстӥсько. Ма но уг луы дыртыку.
Быдӟым ож вылтӥ Гай Сабитов Совинформбюролэсь иворъёссэ, удмурт кылэ берыктыса, эфире сётъялляз. Огполаз со, Сталинград дорын немецъёсты пленэ кутэм сярысь иворез вераса, дораз бертыны потэм.

Ульчаысен пумитаз ӟуч эшез шедем. Ну ӟыгыръя, пе, Гай Сабитовичез: фашистъёслы Сталинград дорын пум вуиз-а, Гай? Тау, Сабитыч, ӟеч иворедлы. Нош эфирын жоб кыл верамед понна тыныд номыр уз луы-а? Кыӵе жоб кыл? Мар вера та? Кызьы удмурт кылэз тодӥсьтэм юлтоше фашистъёс сярысь иворез валаз? — чилектэм Гай Сабитовлэн йыраз. Со, зӥрак берыктӥськыса, ужан интыяз бызем. Совинформбюролэсь удмурт текстсэ выльысь лыдӟем: «Сталинград дорын советской войскоос фашистъёслы юн пезьдэт сётӥзы». Гай Сабитычлэн сюлэмыз ырак луэм: эшез «пезьдэт» кылэз, ӟучлы укшатыса, мукет сяменгес валам, лэся.

Кыӵе ке Кудяшев
Иван Аркашев армия бере Удмурт радиое вамыштӥз. Кивалтӥсь Леонид Емельянов сое уже кутыны пумит ӧз кариськы. Егит корреспондентэз соку ик репортаж лэсьтыны ыстӥз. Быдэс Россиысь гурт удысъя министръёс Удмуртие люкаськиллям. Тыршы, пе, асьме министрлэсь но интервью басьтыны. Иван Иваныч сопалтӥз но, тапалтӥз но министрлы микрофонзэ мыче — соизлэн дырыз ӧвӧл. Министрлы акыльтӥз, лэся, котыраз кут кадь тэбинись корреспондент, мын, пе, тӥни Юрий Кудяшев огназ сылэ, со тыныд ваньзэ вералоз. Зэм но, соиз ӧз пумитъяськы, вань юанъёслы лад-лад валэктӥз.

Аркашев радиоюртэ пырыку, отысь Леонид Емельянов потэ вал. Пӧрмиз-а, пе, ужед. Министрез кырмыны ӧй быгаты — лулске Иван Иваныч. Кыӵе ке Кудяшевез гинэ гожтӥ. Юрий Петровичез-а? — тып дугдӥз дыртӥсь мурт. Ну-ка, ӝогак пыр кабинетам, кылзомы гожтэмдэ. Корреспондентлэсь юанъёссэ но, Удмуртиысь Министръёслэн тӧрозылэсь Юрий Кудяшевлэсь валэктонъёссэ но радиоен кивалтӥсь рос-прос кылзӥз. Нош Иван Аркашев соку нырысьсэ тау карон кылъёсты кылӥз.

Иван Аркашев гурт удысъя редакциын тырше вал бере, очеркъёсыз скал кыскисьёс, ю-нянь будэтӥсьёс, пудо сиён дасясьёс сярысьгес вал. Огпол азьмынӥсь дояркаез, скал кыскыкуз ик, гожъя. Ведрае йӧл ӵыж-ӵаж! ваське, со куара улсын ик нылкышнолэн верамез но магнитофон лентае гожтӥське. Чебер репортаж пӧрмоз, шумпотэ журналист.

Шӧдтэк шорысь тыбыраз чабкись луиз.  Иван берыкъяськытэк гинэ киыныз шонтӥз:  эн люкетэ, пе. Кӧня ке дыр ортчыса, нош тыбыраз  чабкись луиз. Кӧня ке улыса — эшшо. Йырзэ берыктыса ик мышказ уӵертӥз но валаз: скал озьы быжыныз шона вылэм. Фермалэн горд сэрегаз пыремез бере ик Иванлы дояркаос шуо: корреспондент эш, тӥ кытчы ке наштаськиллямды. Сюролы Иван Иваныч вожзэ ӧз потты — чебер репортаж пӧрмиз уго. Кыедэн наштаськем куртказэ дояркаос ик миськизы.

Буратино
Командировкае потаку, ӵемысь сьӧре я сое, я тае басьтыны вунэтоно. Ярам, магнитофон кассетаед ке Иже кылем. Нош батарейка лябӟемын ке, уж дуре «буратиноез» вуттод. Буратино шуо вал радиожурналистъёс лябӟем аккумуляторен гожтэмез. Сое стационар магнитофонэ выжтыны кутскиськод ке, куара «Арня ӵукнаысь» Шӧкычлэн выллем кылӥське. Операторъёс магнитофонэз шаплы я каллен бергатыса, нерад луылӥзы кулэ тембрез, интонациез шедьтон понна.

Яке куасьмем плёнкаос бадӟым бабинаосысь куашкало — иськем кузьда лентаез, тугаськем бугорез сямен, быдэс радиоюртэн сэрттылӥзы но выльысь бабинае биньылӥзы. Мӧйы ужасьёс верало на:  юнкорлэн Юрий Кедровлэн галстук пумыз бергась лентаос вискы шедьыса, пияш кеканы кутскем. Ярам, магнитофонэз кин ке кысыны вуттэм.

Азьвыл радиокорреспондент магнитофонысьтыз плёнкае гожтэмзэ соку ик куарая операторъёслы сётылӥз. Соос ини стационар магнитофонэ выжыто вал. Озьыен, мар отчы гожтэмын — журналистлэсь њечгес тодылӥзы операторъёс.

Огпол корреспондент фермаен кивалтӥсен кенеше. Ог дасо минут ортчыса, магнит лента вылысь журналистлэн пудо утисьёслы кесяськемез кылћське: мар тӥ отын, чатран люкетъёс, шуметӥськоды? Уд адњиське шат, сотонаос, ми татын гожъяськиськом.

Сябась, эшъёс
Аслам но юмоке шедьылэме вань. Конференцие мынӥ. Валтӥсь инженермы Николай Краснобаев запаслы чельы зӧктаесь ньыль батарейкаос сётӥз. Соос кисыям кир-пазь медаз луэ шуыса, бушам сигарет пачкаям интыяй но пиджакелэн пуш кисыяз донги. Ӝыны нунал ужаме бере шӧдӥсько: маке но мус котыры кужекъяны ӧдъяз. Эх, малпасько, висьыны усисько. Кӧня ке улыса, эшшо но зол кужекъяны ӧдъяз. Маяллясько ке, висёнэ басыла кадь. Кӧня ке пол озьы маялляй но шӧдӥ — тамак пачкаысь фольга пушкын соос пӧсяны кутскиллям.

Владимир Михайлов

Удмурт Дунне
By Удмурт Дунне Октябрь 26, 2012 13:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<