Туала израиль искусстволы сӥзем альбомен тодматскон ортчиз

Удмурт Дунне
By Удмурт Дунне 18 октября, 2012 17:03

Туала израиль искусстволы сӥзем альбомен тодматскон ортчиз

Туннэ Национальной библиотекаын ортчиз Галина Подольскаялэн альбоменыз тодматскон.

«Современное израильское искусство с русскими корнями» книга-альбом потӥз 2011-тӥ арын Иерусалимын. Галина Подольская — филология наукаосъя доктор, писатель, кылбурчи но критик. 1999-тӥ арысен улэ Израильын. Отын потӥсь газет-журналъёсын печатлаз Совето Союзын вордскем но будэм уно художникъёс, искусство удысын ужасьёс сярысь.

Книгалэн нимызъя ик валано: бичет сӥземын ӟуч выжысь потэм израиль художникъёслы. Татын 80 усточилэн улэм-вылэмез гожтэмын но 500 суредъёслэн туспуктэмзы пыртэмын. Альбом потэмын куинь кылын: ӟуч, анли но иврит.

Книгаен тодматсконэ Галина Подольская ӧз лыкты. Солэн творчествоез, улонэз сярысь веразы библиотекаын ужасьёс, «Буёло дунне» адӟытон но шаерысьтымы еврей культурая «Хэсед Ариэль» калык огазеяськонлэн кивалтӥсез Марк Гольдман.

— Таӵе тунсыко книгаос берло дыре туж ӧжыт пото. Шумпотымон — Удмуртиын улӥсьёслэн луонлыксы вань соин матысьгес тодматскыны. Галина Подольская Совето Союзын вордӥськем но Израильын улӥсь художникъёс сярысь этюдъёс, эссеос, зарисовкаос но очеркъёс гожтэм. Но альбом дуно луэ соин: со юнгес эшъяськытэ израиль но ӟуч калыкъёсты. Кык бадӟым культураос ог-огзылы муртъёс ӧй вал. Ведь туннэ нокин но уг шуы Исаак Левитан — еврей суредась, Исаак Дунаевский — еврей крезьгурчи. Левитан — ӟуч художник, Дунаевский — советской композитор. Нош соос но Амадео Модильяни но трос мукетъёсыз вордскемын еврей семьяосын. Али тросэз Совето Союзын вордӥськем художникъёс уло Израиль музъем вылын. Кылсярысь, Аркадий Лившиц — Киевын вордскемын, узыр творчествоеныз паймытъя быдэс Европаез. Маргарита Левин — Москваысь художник, 1990-тӥ арысен улэ Израильын. Та выллем усточиосты одно ик тодоно, — шуиз Марк Гольдман.

Галина Семёнова

Удмурт Дунне
By Удмурт Дунне 18 октября, 2012 17:03