Трокай нош ик вӧзамы!

Удмурт Дунне
By Удмурт Дунне Октябрь 10, 2012 15:23

Трокай нош ик вӧзамы!

Трокайлэн агаезлэн нылыз Екатерина Чернова

Трокайлы синпелет пуктыны чакламын вал, солы 120 ар тырмонлы сӥзьыса, кылем арын. Но пӧртэм мугъёсъя синпелетэз усьтон туэлы кылиз. Со понна кылем арын «Удмурт кенеш» огазеяськонлэн сюлмаськемезъя Трокайлэсь нимзэ калыклы берыктон понна туж трос лэсьтэмын вал: югдытӥсьлы сӥзем книга поттон, школаосын нимысьтыз занятиос радъян, сочинениос гожъян, «Трокай» фестивалез ортчытон, туала удмурт азьветлӥсьёсты, югдытӥсьёсты «Трокай Борисов» медален пусъён, нимысьтыз конференция радъян но трос мукетыз. Валамон ини: синпелетэз усьтон ваньзэ тае огазеясь бадӟым уж выллем луыны кулэ вал. Трокайлы сӥзем памятник пуктонэз аслаз кивалтэм улсаз басьтӥз «Удмурт кенешлэн» президентэз Николай Мусалимов. Трос сюлмаськоно, бызьылоно луиз вылӥ кивалтӥсьёс дортӥ.

Синпелет бордын арлэсь кема ужазы скульпторъёс Виктор Овчинников но Геннадий Кутлыбаев. Зэм, вал оскисьтэмъёс: номыр уз пӧрмы, памятник вераськонъёсын гинэ кылёз. Озьы ке но уж огдырлы но ӧз дугдылы!
Аслэсьтыз историзэ, геройёссэ тодӥсьтэм калыклэн ӵуказе нуналыз ӧвӧл, шуо. Озьы уно аръёс ӵоже Т. Борисовлэн нимыз калыклэн йырсазьысьтыз быдэсак ӵушемын вал. Берло аръёсы гинэ югдытӥсь сярысь пыр-поч вераськыны ӧдъязы.

Трофим Кузьмич Борисов — нырысетӥ удмурт врач, политик, журналист, «Гудыри» газетлэн нырысетӥ редакторез, Можга педколледжлэн нырысетӥ директорез, тодосчи, удмурт автономиез кылдытонэ лул-сюлэмзэ сётэм, уно визьмо удмурт егитъёсты ӝутэм адями. Кылем даурлэн кутсконаз, солы сӥзьыса, гожъязы кылбуръёс, гажаса Трокай агаймы шуылӥзы. Но сталин репрессиос йӧно азьветлӥсьмес тӥяса-лёгаса быдтӥзы. Кыӵе но курадӟонъёс, ултӥянъёс пыр потоно ӧз луы Трокайлы! Сюлмыз ӧз чида, 1943-тӥ арын сталин лагерьёсын ик удмурт азьветлӥсь улонысь кошкиз. Но вань али зэмлык дунне вылын!

Ижкарын Трокайлы синпелетэз усьтыку, трос ӟырдыт кылъёс чузъяськизы. Николай Мусалимов тау кариз югдытӥсьлэсь нимзэ улӟытыны юрттэм тодосчиослы, писательёслы, ӵыжы-выжыосызлы, синпелетэз пуктон вылысь асьсэ коньдонзэс сётэм огазеяськонъёслы но нимаз адямиослы. Дано нуналэн калыкез ӟечкыласа, вазиськиз Кун Кенешлэн Тӧроез Александр Соловьёв, мукет кивалтӥсьёс, Трокайлэн агаезлэн нылыз Екатерина Чернова. Ӟырдыт чуръёссэ лыдӟиз егит кылбурчи Богдан Анфиногенов.

Синпелетэз усьтонэ трос калык люкаськылӥз. Куазь тулкымъяськиз, зориз ке но, мраморлэсь лэсьтэм 5 тоннаем Трокай котырын шуныт вал. Сӥё-дано ужрад бере но адямиос кошкыны ӧз дыртэ: кин ке туспуктыны выриз, кин ке удмурт кырӟан мытӥз… Нош синпелетлэн пыд азяз ялан выдылӥзы яркыт герберъёс. Соос калыклэсь пыдлось малпанзэ ваньзылы кылымон шараязы кадь: тау тыныд, Трокай агай, дунне вылын удмуртъёслэн дорзы — Удмурт шаер — вань шуыса. Табере тон нош ик вӧзамы, калыкмылэн, элькунмылэн азинлыкез понна!

Елена Миннигараева

Туспуктӥз Владимир Беломорских

Удмурт Дунне
By Удмурт Дунне Октябрь 10, 2012 15:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<