«Сыӵе вал мынам Ермолаеве»

Удмурт Дунне
By Удмурт Дунне 17 октября, 2012 15:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Сыӵе вал мынам Ермолаеве»

А. Ермолаев

«Удмуртия» издательствоын туэ потӥз тодмо журналистлэн, кылысь кылэ берыктӥсьлэн, публицистлэн Нина Ермолаевалэн «Плачет душа» электрон книгаез.

Та книга — тодэ ваён. Кин лыдӟиз Нина Ермолаевалэсь куинь ар талэсь азьло потэм «Алексей Ермолаев известный и незнаемый» бичетсэ, валалоз: таиз со книгаез азьланьтэ.

Алексей Ермолаев — тодмо удмурт литературовед, дӥсьтӥсь критик, чылкыт сюлэмо адями, яратӥсь кузпал, ӟеч атай но оскымон эш. Тазьы котыр ласянь асьмелы сое усьтэ книгалэн авторез пӧртэм учыръёс но тодэ ваёнъёс пыр. Тани огез:
«1975-тӥ арын нырысьсэ потӥз удмурт литературая учебник. Авторъёсыз А. Ермолаев но П. Поздеев. 1970-тӥ арын ай та учебникез дасяны юнматӥзы Алексей Ермолаевез, солэсь вакчияк, узыр но со дыре ик пиналъёслы валамон кылын гожъяськемзэ тодыса. Алексей Ермолаев бордаз ӧтиз П. Поздеевез, сое картэ туж гажа вал. Мон пайми, Алексей Ермолаев Пётр Кирилловичлы А. Окилы, К. Митрейлы, К. Гердлы, Г. Медведевлы сӥзем темаосты сётӥз шуыса, уго ачиз соос сярысь уно тодэ, трос гожъяз ни вал. Малы озьы карид шуыса юамелы кузпалы валэктӥз: творчествоедлэсь емышъёссэ мукетъёсыныз люкыны быгатоно, соку шумпотонэз но кык полэс луэ. Тӥни сыӵе вал мынам Ермолаеве. Нош табере куд-огъёсыз кужмысь ӵушыны, вунэтыны выро солэсь нимтулзэ, удмурт литератураын тыршемзэ. Соин ик мон гожъясько аслэсьтым зэмлыкме.

Адями туж чебер вераськыны быгатэ ке но, куд-ог дыръя солэн вамышъёсыз кылъёсызлэсь тросгес верало. Та книгаез лыдӟыса, Алексей Ермолаевлы мон эшшо кӧня ке пол пайми. Больницаын луэм учыр уката ик йырам кылиз. Со сярысь Нина Ермолаева тазьы гожтэ:

«Мынам картэ больницаын кылле. Сюлэмыз висе шуыса, тодӥськом ни вал, табере шараяськиз на: пекляосаз изъёс вань. Врач кыџе ке ӟеч эмъюм шедьтыны куриз. Соин, пе, кузпалдылы капчи луоз. Мон, ваньзэ вунэтыса, Ижысь вань аптекаостӥ ортчисько, управлениязы вуылӥсько. Тодмоосы пыр шедьтӥсько со уколъёсты. Валасько: али киям шедем эмъюмлэсь дуноез мон понна номыр ӧвӧл, малы ке шуоно соос кузпалылэсь улонзэ кузёмытозы. Витетӥ нуналаз Алексейлэн мылкыдыз умойгес луиз. Азьло чидантэм вӧсь вал, табере капчигес ини. Соин ик кылем вить уколме палатаысь мукет висисьлы кузьмай, шуэ картэ. Мон пайми: кызьы кузьмад? Со пумитам пальпотыса: обход дыръя врач шуиз, бускельдылэн висёнэз сыӵе ик, но тӥледлы удалтӥз — кышноды та уколъёсты шедьтӥз. Мыным умойгес ни ук, соин ик сётӥ. Тӥни сыӵе вал мынам Ермолаеве. Ачиз сярысь малпаськытэк, мукетъёс понна сюлмаськылӥз. Мон уг вераськы ини, со уколъёс понна палатаысь бускелез уксё ӧз сёты шуыса, со тау но ӧз шуы. Инмар тазалык мед сётоз, та удмурт адями али пенсиын. 2009-тӥ арын сое урамысен пумитай. Монэ адӟиз но йырзэ берыктӥз, малы ке ӧз но ӟечъяськы, ог-огмес тодӥськом ке но».

Котькуд книгаез кие кутыку, нырысь ик син шоры йӧтэ нимыз. «Плачет душа», малы озьы шуэм автор та ужзэ?
— Улонам трос югытэз вал, луылӥзы пеймыт дыръёсыз но. Но вӧзам ялан вал Алексей Афанасьевич. Котьмар мед луоз, ваньзэ вормылӥ, ӧй бӧрды, ми ӵош вал ук. Лулы бӧрдыны кутскиз со та дуннеысь кошкем бере. Собере монэ ӝожомытэ на эшшо огез. Алексей Ермолаев трос лэсьтӥз удмурт литератураез но критикаез азинтонлы. Потэ вылэм, Удмурт Республикалэсь Кун премизэ солы мед сётозы шуыса, кызьы кулэмзы бере сётӥзы Михаил Покчи-Петровлы, Флор Васильевлы, Роман Валишинлы, Владимир Романовлы но мукетъёсызлы дано удмурт пиослы. 2006-тӥ арын ай Удмуртиысь Писательёслэн союззы сыӵе ӵектонэн потӥз вал, но малы ке та дырозь югдур воштӥськемын ӧвӧл. Но, малпасько, дыр вуоз, Ермолаевлэн гожъямъёсыз нош ик тунсыко луозы. Мон соосты ваньзэ люкай, удмурт кылын 2 томен но ӟуч кылын 1 томен печатламон пӧрмизы. Кин тодэ, оло, бӧрысь куке выльысь печатласькозы на. Юнме уг шуо ук: рукописьёс уг ӝуало, нош зэмос пиоссэ калык уз вунэты, — мылкыдзэ усьтэ Нина Ермолаева.

Лыдӟисьёслэн малпанзы медаз кылды, та книга ӝож мылкыд кельтэ шуыса. Уг, со туж сайкыт, югыт но шуныт. Нина Георгиевна пичи дырыз, студент но ужан аръёсыз пыр возьматыны но герӟаны быгатэм ассэ но удмурт шаерез. Татын ик печатламын нылпиослы веросъёсыз, кудъёсыз та дырозь потамын ӧй вал на. Бадӟым люкетэз сӥземын А. Ермолаевлы но солэн ӵыжы-выжыосызлы, эшъёсызлы. Туж трос тунсыко туспуктэмъёс.
2009-тӥ арын Нина Георгиевналэн потэм «Алексей Ермолаев известный и незнаемый» книгаез пумысен трос малпанъёс вал. Кылсярысь, филология наукаосъя доктор Анна Зуева пусйиз: та книга дышетэ, кызьы тыршоно калык понна. Литературовед Виктор Шибанов студентъёслы шуиз: тӥ зэмос дышетӥсьёс уд луэ, та книгаез ӧд ке лыдӟе. Нина Ермолаевалэн выль уженыз но мон дэмласал ваньмызлы тодматскыны, уката ик егитъёслы, соос улонэз валаны, зэмос эшъяськонэз но яратонэз дунъяны мед дышетскозы шуыса.

Писательлэн пиез Андрей Ермолаев шуиз: бичет тунсыко луоз котькыӵе лыдӟисьлы, кин тодэ на анаелэсь Удмуртиысь кибашлыос, гурт удысын ужасьёс сярысь тунсыко очеркъёссэ но атаелэсь лэчыт материалъёссэ, рецензиоссэ. Та книгае пыӵамын анаелэн атайме яратэмез, со шӧдӥське нырысетӥ бамысен берпуметӥозяз.

Галина Семёнова

 

Удмурт Дунне
By Удмурт Дунне 17 октября, 2012 15:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<