Со ӝуатӥз сюсьтыл

Удмурт Дунне
By Удмурт Дунне 31 октября, 2012 06:09

Со ӝуатӥз сюсьтыл

Н. Витрук

4-тӥ ноябре 75 арес тырмысал правоя тодосчилы, юридической наукаосъя  докторлы, профессорлы, Удмуртиысь культура удысысь дано ужасьлы, Россиысь наукая дано ужасьлы, меценатлы Николай Васильевич Витруклы.

Жаляса верано, кылем гужем со улонысь кошкиз, но Чебер Адямилэсь вордскем нуналзэ, буре вайыса, пусъё солэн эшъёсыз.

Томскын вордскем ӟуч адями Удмуртилэсь культуразэ азинтон понна трос кужымзэ сётӥз. Та адями умой шӧдэ вал дырез, улонлэсь куронъёссэ. Калык азьлань мыныны кулэ культура пыр, лыдъяз со.
Тодам лыктэ та дано адямиен нырысетӥ пумиськеммы. Со уно аръёс талэсь азьло вал. Мастерскоям вуиз Николай Витрук. Странаысьтымы Конституционной Судлэн судьяез, нокыӵе охранатэк ветлӥз тодмотэм городэтӥ, калыкен вераськыса. Николай Васильевич вылтӥяськисьтэм, мукетъёслэсь малпанъёссэс лыдэ басьтӥсь но усточиослы юрттыны дась луись вал. Соин но, дыр, яратоно писателез вал Владимир Короленко. Нош кыӵе со шумпотылӥз, асьме художникъёслэсь тунсыко ужъёссэс адӟыса.

Н. Витрук Удмуртия понна ӧжыт ӧз лэсьты. Солэн кичӧлтэмезъя Эгралан кылдӥз чеберлыкъя галерея, отчы со кузьмаз аслэсьтыз библиотеказэ, тодмо художникъёслэсь суредъёссэс. Калыкез А. Пушкинлэн, М. Лермонтовлэн, Н. Некрасовлэн, С. Есенинлэн, А. Кольцовлэн, В. Короленколэн удмурт кылэ берыктэм произведениосынызы тодматыса, анай кылмылэсь данзэ ӝутӥз. Культура удысын сюлмысь тыршемез понна солы сётэмын «Удмуртиысь культура удысысь дано ужась» ним но Трокай Борисов нимо премия. Ваньмыз пӧлысь ӵапак та дунъетъёс солы тужгес дуноосыз вал. Туж шумпотӥз Удмуртиысь но Россиысь Писательёслэн огазеяськонзылэн ёзчизы луэмез бере.

Н. Витрук мур малпаськись, кыллы усто, ужез гажась, зэмос интеллигент вал. Со ялан тыршиз адямиослы валэктыны: литература но искусство калыклэсь палэнын луыны кулэ ӧвӧл, асьмеос соосты ялан азинтыны кулэ.
Николай Васильевичлэн югыт дуннеен люкиськемез мон понна бадњым кайгу. Н. Витрук ӧз каргалля пеймытэз. Со ӝуатӥз сюсьтыл, кудӥз кема аръёс ӵоже пиштоз на.

Пётр Ёлкин

Удмурт Дунне
By Удмурт Дунне 31 октября, 2012 06:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<