Ӵужкушман — сю кечлы!

Удмурт Дунне
By Удмурт Дунне Октябрь 24, 2012 03:55

Ӵужкушман — сю кечлы!

Лудӟазегъёсты ыбылон понна нимысьтыз маскировка кулэ

Пӧйшуран дунне — паймымон но кышкыт. Одӥг пол отчы зымид ке, ноку но, номырин но уд вошты ни та аспӧртэмлыко удысэз. Пӧйшурасьёслэн али пӧсь дырзы. Кызьы ортче пӧйшуран шаркан палъёсын? Вера Охотобществолэн кивалтӥсез Евгений Наговицын:

— Ёросысьтымы пӧй-шурасьёслэн огазеяськоназы ог 450 адями лыдъяське. Туэ ми доры пыриз на эшшо 19 мурт. Пӧлысьтызы 16-езлы 23 арес но ӧвӧл на. Трос арлыдоосмы но. Туэ ёросамы ыбыны лэземын 1 гондырез, 32 койыкез, 34 кырпарсез. Вучайыез, сёрез, турез, дукъяез но мукет тылобурдоосты ыбылон понна басьтоно разрешение. Дуныз 400 манет. Балянэз ыбылыны уг яра, лыдзы туж ичи.

Малы егит пиос пӧйшураны кыстӥсько? Шаркан ёросысь Урдогуртысь Владимир Вахрушев вера:
— Дядяе пӧйшурась, соин но, дыр, пичиысен яратӥ нюлэсэз. Дядяе бордысь ӧй ик кыльылы. Ӵӧжъёсты ӵемысь ыбылӥмы, вучайыослы капканъёс пуктылӥмы. Туэ пӧйшураны лэзись билет басьтӥ!

Зэм, пӧйшуран — дуно шутэтскон. Пӧйшурась арлы быдэ 400 манет выт тыре. Со сяна,  басьтоно на лицензия. Кылсярысь, гондырез ыбон понна тыроно 50 сюрс, мӧйы кырпарсез — 15 сюрс, егитсэгес — 7 но ӝыны сюрс, койык — 30 сюрс. Тылобурдоос пӧлысь, дун тырыса, кутыны лэземын дукъяез но турез.

Пӧйшуран вакыт люкиське арлэн дырызъя. Сӥзьыл пӧйшуран кыстӥське 1-тӥ августысен 31-тӥ октябрёзь. Ыбыны яра лудӵӧжез, лудӟазегез, гондырез, койыкез, кырпарсез. Тол пӧйшуран кутске лымы усем бере но йылпумъяське 29-тӥ феврале. Кутыны лэземын лудкечез, ӟичыез, коньыез. Тулыс пӧйшуран усьтӥське апрель пумын — май кутсконын — 10 нуналлы. Ыбыны луэ дукъяез, турез, ӵӧжез но куасиез. Гужем кутыны луэ кырпарсез, кыстӥське 2 толэзь — июнь-июль.

Пыӵал сяна, пӧйшурасьлэн зэмос юрттӥсез — пуны. Огшоры со ӧвӧл:  пӧйшуръёсты утэменыз уг курдаты, нырыз вань зынъёсты шӧдэ. Таӵе пуны дуно сылэ. Котькудӥзлэн аслаз паспортэз вань. Туала вакытэ дунне вылын 400 пала пуны выжыос лыдъясько. Соос пӧлысь 100-эз гинэ пӧйшураны быгатэ. Асьме палъёсын тужгес вӧлмемын лайкаос.

— Таос, кышканэз валатэк, гондыр вылэ но мынозы, лудӵӧж понна вуэ но зымозы, — вера Шаркан ёросысь Урдогуртысь мӧйы пӧйшурась Юрий Вахрушев. — Зэм, сое будэтыны секытгес. Сизьым ар талэсь азьло пуные вал — Туман. Кӧня пол со монэ гондырлэсь утьылӥз — шуг вераны. Огпол гужем кӧс писпуосты эскеронъям вылам гондыр урдскиз. Туман ӧз пегӟы — нюлэс кузё вылэ омырскиз. Одӥг палтӥз тэтче, мукет палтӥз, утэ… Мон ӝогак кыз йылэ туби. Гондыр, котыр эскериськыса, кошкиз. Писпуысь васькыса, валай: воксё вайёстэм кызэ тубиськем…

Вашкала вакытъёсы удмурт воргоронъёс лыдъяськылӥзы тужгес но усто пӧйшурасьёсын. Огшоры пукыӵен поталлязы кӧттырон утчаны. Коньылэн куэз медаз уродмы шуыса, синмаз йӧттыны вырылӥзы. Нош гондыр вылэ пото вылэм толалтэ, изьвер кӧлыку.

Азьло дауръёсы но, али но пӧйшурасьёслэн трос гинэ осконъёссы вань:
3 нырысетӥ лымы усиз — лудкечез кутон дыр вуиз. Кузьпелез ыбыны мынон азьын писпу вай вылэ ошоно ӵужкушман, сипыртоно: «Сю кечлы!»;
3 басьтӥд выль пыӵал — нырысь пӧйшуранэ потоно выль патронъёсын. Со нуналэ пӧйшуртэк доре берытсконо ӧвӧл — азьланяз уз удалты. Пыӵалэз мукет киослы сётъяны уг яра. Умой, пыӵал атай киысь пилы кыле ке;
3 тылскемез вуэн кысоно ӧвӧл. Тэльын сиськыны пуксён азьын тыл пушкы пичи нянь юдэс куштоно;
3 сюрес вылын пумиськид кышномуртэн — берыктӥськы дорад;
3 куакалэсь, кучыранлэсь яке ыгылэсь кеськемзэ кылӥд — пӧйшуран уз удалты.

Елена Васютова

Удмурт Дунне
By Удмурт Дунне Октябрь 24, 2012 03:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<