Малефик пӧра джук

Удмурт Дунне
By Удмурт Дунне 24 октября, 2012 17:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Малефик пӧра джук

Серёжа Малефик — «Калленом» фестивальлэн хэдлайнерез, Мускоысь ӧтем куно. Туала дунне крезьгурлы сћзем ӝыт «Пафос» театр-клубын ортчиз. Радъясез — «Лад-лад» промо-группа — котьку сямен ик сюлмаське удмурт дуннее выль сямъёсты пыӵатон пумысен.

Malefique — туннэ нуналлы ӟуч электрон сценаын тодмо ним. Со нырысь ик beats (битс) крезьгурчи, озьы ик туала стильёсын гожъяське, туэ популярной луэм juke (джук) но trap (трэп) амалъёсын ремиксъёс дася, хип-хоп кырӟасьёс куремъя фонограмма лэсьтэ. Син азям шуак сюриз. Паймоно кадь, кылем «Дартэз» редакциын дасян вакытэ йырын акылес гур берганы ӧдъяз — Дмитрий Маликовлэн «До завтра» кырӟанэзлы джук-ремикс. Интернетысь авторзэ утчано кариськи. Ӝог сюриз — огназ сыӵе вылэм. Кыл бӧрсьы кыл — тани Ижкаре но вуиз ни! Юромо удмуртъёс понна — выль крезьгуръёсын тодматыны.

Битс — туала электрон крезьгур ӧр. Тужгес но тодмо нимъёсыз: DZA, Mujuice, Pixelord, 813, Lapti. Ӟуч битс-феномен сярысь кемалась ик ӧвӧл пыр-поч гожтӥз Pitchfork вотэсбам.
Трэп — 808 Roland драм машина куараос вылэ пыкъяськыса гожтэм али модае пырем хип-хоп.
Джук — Чикагоысь вуэм ӝог электрон крезьгур но эктон амал.

— Серёжа, позыръяськонмес хайп крезьгур фестиваль нимамы бере, соку ик юаме потэ: мар со, тон сямен, хайп? Александр Юминов критик тышкаськиз уго, та кылэз юнме кутӥмы, пе. Буш, уксё котыр бергась макеосты озьы нимало, шуэ.
— Фу… Хайп — со туала, модной. Мед учкоз Urban dictionary кыллюкамысь.

Хайп  (англ.) — 1) маркетинг стратегия, адямиез алдан  2) тузӥ, туала, шулдыр

— Тон паймид-а, Удмуртиын но туала крезьгурез яратӥсьёс вань шуыса?
— Бен, ӧжытак абдрай, татын свэг но хайп темаосты ӝуто шуыса. Мон кылзӥськи удмурт крезьгурдэс: «Италмас» ансамблез, Надежда Уткинаез, Геннадий Ганьковез… Таизлы джук-ремикс но лэсьтӥ. «Тулыс сяськаос ӝужаку» гурзэ келяд вал. Но тужгес но мыным кельшиз Silent Woo Goore но солисткаезлэн куараез.

— Удмурт ремикслы мон воксё лӧптӥ. Тау тыныд, таӵеез ӧй на вал! Нуназе келям кырӟанъя ӝытсэ тон чылкак выль, ас понназ улӥсь гур пӧрмытӥд.
— Ремикс лэсьтон — со мон понна лач-лач уж. Крезьгур кылдытон бордын витетӥ арзэ ужасько ини. Басьтӥськид материал борды, эскерид сое, бырйид кулэ люкетсэ, вандылӥд — но выльысен ас сяменыд интыяд. Чебер крезьгурез кылӥсько ке, соку ик валасько ни, кыӵе интызэ конгырто. Сэмплировать карон, пичи куара куэтъёсты радъян — со сыӵе ик искусство. Котькудӥз музыкант ас сяменыз ужа. Соин ик веразы ке, та кырӟанэз эн иса, сое тон азьын дас адями вандылӥз ни шуыса, мон уг кылзы. Тодӥсько, ӵапак мон сое выль сямен чузъяськыто, ас сяменым вандыло. Кылсярысь, мон сэмплъёсты векчи-векчи люкетъёсын сӥсъяны яратӥсько. Хип-хоперъёс та амалме тодо, куддыр ӝожтӥсько но: кырӟаны секыт, укыр «сӧрем» ритмъёс сураськыто, пе. Но огшорыез — укыр капчи ук, шугез бордын ик тунсыкез.

— Кӧня трек-кырӟан гожтӥд ни? Кытысь кынар-кужым поттӥськод — котькуд нунал выль уженыд шумпоттӥськод?
— Али аслам гожтэм гуре но ремиксэ, выльдэм кырӟанэ тямыс сю пала люкаськиз ни. Унозэ отпускын дыръям гожъяй. Яратӥсько, шыпыт интые шутэтскыны мыныса, кӧня ке нунал ӵоже крезьгурен вырыны. Анай-атаелэн Подмосковьеын сад-бакчазы вань, отчы ӵемгес ветлыны тыршисько.

— Тон «Флаконын» ужаськод, та туж тодмо дизайн-завод, озьы-а?
— Бен, «Флаконын» ми пӧртэм ужрадъёс, адӟытонъёс радъяськом. Тужгес но тунсыко крезьгурчиос но художникъёс татчы люкасько. Аслам уже пӧртэм кагазъёсын герӟаськемын, шуом, китаецъёсын-кореецъёсын вераськоно луэ. Лингвист луэме юрттэ, дышетскемея мон кылчи, англи но француз кылын вераськисько. Дизайнэн уг выриськы ке но, крезьгур сяна, трос хоббие вань — кружкаос вылын суредаськыны яратӥсько, асме чыры-пыры киужен шумпоттӥсько. Плёнкае туспуктылӥсько, ӵапак Подмосковьеысь нюлэсъёсын трос фото лэсьтӥ ни. Туж яратӥсько дуско (скейтборд) вылын ворттылыны. Озьы, скейтэн ворттылыкум, мон огеныз туганэным тодматски. Инна Мороча туннэ нуналлы Берлинын улэ, крезьгур поттон индустриын, тодмо лэйблын ужа. Нош соку солы 15 арес вал. Мон ӧй но тоды, со школаын дышетске ай шуыса…

— Шӧдӥське, улонэд тунсыко!.. Тон еврей, оло, таин ваньзэ валэктыны луэ?
— Мон ӝыныё еврей. 9 аресозь Ариельын, Израильын, улӥм. Анае еврейка, нош атае Пермь палась. Соин ик мон пичияк тӥ кадь, шуыны луоз. Анай-атае Муско дорын уло, ачим али Ореховоын, аслам квартираям улӥсько-ужасько. Орехово — Мускоысь туж тунсыко ёрос. Тросэз азьвыл сямен ик возиське — трос «сьӧдъёс», криминал. Но кылдэ ни инфраструктура, бадӟым супермаркет пуктӥзы. Нялтас вераса, кемалась ик ӧвӧл отчы участковоймы пыраз но калыкез ыбылӥз. Кышноеныз керетэм, пе…

— Верад вал, ёросады туж трос таланто адями улэ. Улон инты пытьызэ кельтэ?
— Малпасько, озьы. Ӝоген улыны центре выжыны малпасько ке но (мукет музыкантъёсын студия басьтомы), та интыез гажамысь уг дугды. Татын ик улэ 813, RAD нимо тодмо крезьгур тусовкаысь артист. Данъяськисько, со мынам эше но бускеле шуыса. Винтажнайк (Vtgnike) но Лапти (Lapti) мыным сокем уг кельшо, Саша кадь. Зэмзэ вераса, со тылпу кысћсь. Огпол ми соин сур юыны пуксим но ӵошен трек гожтӥм. Мон шӧдӥ, солэн талантэз но, кужымез но трослы уногес. Со ньыль ар талэсь азьло ик future bass гожъяз ни — Россиын та сярысь нокин ӧз на кылылы. Hudson Mohawke кунгож сьӧрын кутске гинэ вал ай… Собере, асьме ёросамы туж крутой байкеръёслэн огазеяськонзы вань. Паша Вишнёвый — Black Market Bikes ёзчи. «Nike» компания соослы миллионъёс сётыны дась, компанизылэн «ымнырзы» гинэ мед луозы. Паша улэпкын великеныз сыӵезэ карыны быгатэ, мае тросэз компьютер шудонын уз пӧрмытэ.

— Спортэз яратӥськод, лэся. Котьку малпасько вал, гуманитарийёс спортэн но, техникаен но уг эшъясько…
— Мынам котьку потэ вал инженерлы дышетскеме, куаралэсь физиказэ эскерысал. Крезьгур тулкымъёс, кытысь потэ куара… Крезьгурчи понна та инъет луэ. Ачим лингвист ке но, валасько, математика но физика — со валтӥсь тодосъёс. Юнме гинэ уг яратӥськы научной фантастикаез. Сое тросэз уг лыдӟо. Фантастика — со пичи пиналъёс понна ӧвӧл. Со пыр мон улонэз валаны но дышетски, тросэз гуре но книгаосысь басьтэм нимъёсын нимамын. Кызьы вера Америкаысь яратоно авторе Роберт Шекли, фантастика гожъяськисьлы тужгес но трос эрик сётэ. Йыр берытске. Нылкышноез синмаськытыны но секыт ӧвӧл, Шеклилэсь «Модель для сборки» аудио-вероссэ гинэ кылзыны сёт. Мон воксё но уг яратӥськы мае ке огдышемзэ, мӧзмытсэ. Ваньмаз пыртӥсько кӧня ке экстрим, яратон кусыпъёсы но. Мукетыз гажано писателе — Вальтер Скотт. Со синмаськымон мадиськись. Куд-огез гожъяськисьёс кӧсыт мадё, мар бӧрсьы мар ортчиз, куд-огъёсыз нош мадемзэс син азе пуктыто. Кельшо на Джон Фаулз, Харуки Мураками, Джон Пристли. Мон яратӥсько дуннеез котыръяны. Кӧня ке ар талэсь азьло Dowdy эшеным быдэс Европаез котыртӥм — городысь городэ кӧчылыса, концертъёс сётъям. Выль арлы Чилие мыныны малпасько, отын эше улэ. Эшшо огез эше Индиын улэ, туж гажано муртлэн пиез. Ачим кадь ик путешественник, уйпал штатъёсысь Дарали ёросэ но ветлӥз ни, луоз (серекъя).

— Крезьгурчи луон — со быдэс лайфстайл, улон амал. Но Мускоын но, крезьгур гожъяса гинэ, толъёсты пырпотыны уг луы, дыр?
— Мынам эшъёсы ваньзы кытын ке ужало на. Крезьгур гожъян кылемез борды итӥське. Ачим кӧня ке ар талэсь азьло ужрадъёсты, позыръяськонъёсты радъянэн выри, Technoid Сonnection промо-огинын ужай. Соку драм-энд-бэйс сцена кужмо вал ай, «Пират станция» шулдыръяськонъёс сюрсъёсын-сюрсъёсын егитъёсты люкаллязы. Трос drum&bass крезьгурчиосты но диджейёсты вайылӥм, шуом, Швециысь Future Prophecies (соос Ижын но вал — Дарали) вуылӥз. Солы ньыльдон арес, нош али ке но дуско вылын ворттылэ! Аэропортэ келякумы (соку ми сое сектам, туж шулдыр вал), со мыным трос пайдаёзэ мадиз. Озьы куноослэсь, Западысь продюсеръёслэсь дышетски. Соку мон крезьгур гожъяны кутски гинэ вал, драм-энд-бэйс борды басьтӥськи. Номыре ӧй на быгаты, аслым осконэ ӧй вал. Мукетыз тодмо крезьгурчи Тони Колман, London Elektricity, туж кулэ луись кылъёсты вераз: «Пияш, быгатонлыкед вить процент но луыны быгатэ, кылемез — берпал вылын пукон! Пукод, пукод но — озьы ик пузалод». Тае пыраклы тодам возё.

Хип-хоп продюсерлэн валтӥсь ужпумез — дась макеысь аслэсьтыдзэ поттыны. Кема пукид ке, одно «хит» пӧралод. Вань сыӵе принципъёс, кудъёсыз улэмъя-вылэмъя люкаськизы ни. Таиз — одӥгез кужмоез.

— Кыӵе эшшо принципъёсыд вань?
— Ну, шуом… Котьку котькинэ «пузтӥз кырмыса» возёно. Матысь эштэ но. Котькыӵе муртлэсь ляб палъёссэ тодоно, та юрттэ — адями котьку «тонусын» луоз, тон со сярысь мае ке ватэмзэ тодӥськод шуыса, йыраз возёз. Монэ туж интеллигент семьяын будэтӥзы,  огкыл уродзэ но вераны, адямиос азьын вогдэ поттылыны ӧз лэзе. Одӥг пол, будэме бере ни, валай: адямиосъя тупатскыны уг яра — чырты сьӧрад пуксёзы. Возьматоно, кин тон, кӧня сылӥськод. Дун сярысь верано ке, мон ас ужме но озьы ик дунъясько: дунтэк но шудыны дась, дыры понна гинэ дун курисько. Мынам дыры — со мынам сюдӥсе. Дырме быдтӥськоды ке, тыре — угось та вакытэ мон мукет ужен вырыны быгатысал. Мыным али но ваньмыз тырме, дыр сяна.

— Учкисько ке, тон сыӵе гурман, чебер дӥсез яратӥськод, зэмос шоркарын улӥсь мурт.
— «Шоркар замашкаосы» вань шуыса верало ке, воже потэ. Мон ӧвӧл кыӵе ке сноб, дунне шоры учконме валэктӥ. Мыным ӧвӧл 15 арес, валаськод, дыр, малпан радме. Дӥсь сярысь верано ке, мыным кельшо куд-ог дышем маркаос, соосты ялан октӥсько. Алигес «Тwothirds» лэйбл сюриз, кофтаоссы сыӵе зарезь буёло, пож-лызэсь, вожалэсэсь — мар мыным кельше. Кэжуал стилез, огшоры, посӥськемгес дӥсез гажасько. Малпасько, дэремъёсты сэконд-хэндысь но октыны луоз. Но чыры-пырыос лэсьто образэз. Чыры-пырылы мон уксёме уг жаля. Ноские, кылсярысь, 1500 манет сылэ. Озьы ик сиёнэн но, сиён — со улонлэн туж бадӟым люкетэз. Яратӥсько ачим пӧраськыны, пӧраськон куспын шутэтскисько, выль кужым люкасько.

— Удмурт перепечез веръяд, «Перепечкин» кафее тонэ нуллӥм. Кельшиз-а?
— Мон шуысал, перепеченыды туж кӧт тыре. Удмурт бальзам борды со ӟеч куртчон. Тӥ понна шудэме но быдэсыз Иже ветлэме туж кӧттырымон пӧрмизы!

Малефик «Вконтакте» но Soundcloud бамъёсын: vk.com/public24000831, soundcloud.com/malefique
Lad-lad промо: vk.com/udmladlad

Дарали Лели

 

Удмурт Дунне
By Удмурт Дунне 24 октября, 2012 17:08