Пьесаос улӟытэк ик куло

Удмурт Дунне
By Удмурт Дунне 17 октября, 2012 15:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пьесаос улӟытэк ик куло

У. Бадретдинов

Кин сюлмаськыны кулэ егит драматургъёсты будэтон сярысь?


Удмурт театрмы ӟеч пьесаослы ёрме. Удмурт пьесаос ӧвӧл, та кылъёсты ӵемысь кылод. Нош кызьы югдурез воштоно? Писательёсты драматургия удысэ кыӵе амалэн кысконо?

Кылем арын элькунысьтымы Культурая, печатья но иворъёсъя министерство, Удмурт театр анай кылын гожтэм пьесаослы конкурс ялӥзы. Отчы тодмо писательёслы но, егит авторъёслы но пыриськыны луонлык сётэмын вал. Конкурс сярысь газетъёсын но, театрлэн сайтэз пыр но ивортӥзы. Со аспӧртэм ӵошатсконлы дыр но тупатӥзы. Тани «спортсменъёс»-драматургъёс финише вуизы ни, соос вормисьёслэсь нимъёссэс ялэмзэс витё. Но нокыӵе ивортон ӧвӧл. Театрлэн сайтэз но чалмыт улэ. Собере нюлэскысь куара-ланга шуккиськем выллем ивор вуиз: конкурс, пе, азьланьтӥське на. Зэм-а со, ӧвӧл-а, валаны шуг. Берло тодмо луиз ни: Егор Загребинэн Анатолий Григорьев «стартэ» берлогес потӥллям. Озьы ке но соос конкурсын вормисьёс луизы. Эшшо одӥгез паймытӥз на: удмурт пьесаослы ялэм ӵошатсконын кыкетӥ инты басьтӥз ӟуч кылын гожтэм произведение. Вераськон мынэ Глеб Павлоидлэн ужез сярысь.

Конкурсэ вуэм пьесаосты нимысьтыз жюри эскериз. Солэн ёзчиосыз пӧлысь одӥгез, Вера Пантелеева, «Удмурт дунне» газет пыр пьесаос сярысь ас малпанъёссэ вакчияк мадиз. Статьяез кӧсытгес пӧрмем, автор огъя кылъёсын, нокинэ вӧсь карытэк гинэ, вера выль произведениос сярысь. Нош конкурсэ пыриськисьёс ӵошатсконлы шара йылпумъян лэсьтэмез витё вал. Жюрилэн ёзчиосыз пьесаос сярысь ас малпанъёссэс мед верасалзы. Кинэ ке эксперт карыса но ӧтьыны луысал. Соку конкурслэн пайдаез ӟечгес шӧдӥськысал. Умой малпам ужрад али палдуресгес пӧрмиз.
* * *
Глеб Павлоид сярысь кылпум поттылӥ ни. Павел Зоринлэн со кушем нимыз. Ижевскысь егит пи архитектор луыса ужа, театр студиен кивалтэ, пьесаос гожъя. Мон соин тодматски Россиысь фин-угор драматургъёслэн семинар-конкурсазы.

Кызьы ми, асьмеды драматургъёслэн радазы пыртыны вырись адямиос, семинар-конкурсэ сюрим? Туэ гужем Коми Элькунысь йӧскалык музыкально-драматической театр фин-угор драматургъёс пӧлын усто пьесалы конкурс ялӥз. Номыр шоры учкытэк, «Кый сюр» пьесаме ӟуч кылэ берыктӥ но Сыктывкаре лэзи. Павел Зорин но пьесазэ отчы ыстэм. Собере милемыз семинаре, конкурслы йылпумъян лэсьтонэ ӧтизы.

Гожтэм пьесаосты эскерыны Москваысь театральной критикез, искусствоведениея кандидатэз Павел Рудневез ӧтиллям. Со доцент, ГИТИС-ын дышетэ, Чехов нимо МХТ-лэн чеберлыкъя кивалтӥсезлэн юрттӥсез, «Современная драматургия» журналлэн редколлегиезлэн ёзчиез луэ. Конкурсэ вуэм ужъёсты сэрттонэ-пертчонэ семинаре лыктэмъёс но пыриськизы. Угось пьесаосын тодматскыны Интернет пыр луэ вал.
Павел Зоринлэсь «Художник и Надежда» пьесазэ театрысь артистъёс рольёсъя лыдӟизы. Соин ик та произведениея вераськон но тунсыко ортчиз. Пьесаысь усто интыоссэ но, шекъёссэ но пусйизы. Авторлы юанъёс но сётъязы. Егит драматурглэн пьесаяз ӝутэм ужпум выль ӧвӧл, но лэчыт. Водохранилищеысь вуэз мургес карыны туртто, соин валче одӥгез гурт кылёз ву улэ. Действие ӵапак со гуртын ортче. Удмурт театр сое возьматыны дасяське, нырысь ӟуч кылын, собере удмуртэн.

Мынам пьесая но вераськон кема гинэ кыстӥськиз. П. Рудневен ӵош сое эскеронэ пыриськизы Пенза улосысь режиссёр Михаил Гаврилов, Комиысь музыкально-драматической театрлэн чеберлыкъя кивалтӥсез Светлана Горчакова но Павел Зорин. «Кый сюр» пьесаме лыдӟыны удмурт артистъёслы, драматургъёслы куке но сётъяй вал ни. Огез но ас малпанъёссэ рос-прос ӧз вера, шуыны луэ. Драматург Пётр Захаров гинэ сое пыр-поч эскериз, трос визь-кенеш сётӥз. Куд-ог ӵектонъёссэ лыдэ басьтыса, мон со пьесаме выльдӥ, тупатъяй. Сыктывкарын вераськон бере пьесае шоры выль сямен учкыны кутски, со бордын эшшо ужано луоз на.
Сыктывкаре конкурсэ пыриськем авторъёс пӧлысь витез лыктыны быгатӥллямтэ. Поръёс, мордваос, карелъёс, коми-пермякъёс ӧй вал. Озьы ке Карелиысь драматург Сергей Пронин но Тюменьысь манси режиссёр Виктор Крекер компьютер пыр скайп программая Сыктывкарен герӟаськизы но котырес ӝӧк сьӧры люкаськемъёсын вераськизы, пьесаоссэс эскеронэ пыриськизы.

Конкурсэ вуэм кызь пьесаос пӧлысь дас одӥгез Комиысь писательёслэн вал. Коми драматург Александр Суворов «Сексот» пьесазэ ӟуч кылын гожтэм. Сое коми кылэ берыктӥллям. Музыкально-драматической театрысь артистъёс выль пьесая спектакль возьматӥзы. Сое учкыны ми Визинга черкогуртэ (Сыктывкарлэсь ог 80 иськемын) ветлӥм. Артистъёслэн шудэмзы кельшиз. Нош бадӟым клубын учкисьёс ог витьтон сяна ӧй вал. Александр Суворовлэн пьесаез конкурсын куинетӥ инты басьтӥз. Кыкетӥ интыын — Павел Зоринлэн ужез. Нош Карелиысь драматург но режиссёр Сергей Пронин «Эхо» пьесаеныз вормисен лыдъямын.

Пусйыны кулэ: вормисе потӥзы ӟуч кылын гожтэм пьесаос. Фин-угор кылъёсын быдэстэм но авторъёслэн асьсэ кужыменызы ӟуч кылэ берыктэм произведениос бездытгес адӟиськизы соос азьын. Со валамон, пьесаез чеберлыко берыктон бордын зэмос специалистъёс ужаны кулэ. Нош сыӵеос воксё ӧвӧл, шуыны луэ.
* * *
Семинар-конкурс возьматӥз: Россиысь фин-угор элькунъёсын драма гожъясь писательёс ӧжыт. Егит драматургъёсты будэтон ласянь уж рос-прос уг нуиськы. Котькудаз ик элькунын вань азьветлӥсь, данэ потэм одӥг-кык драматургъёс. Театръёс соос чотын ик уло. Мукет авторъёслэн пьесаоссы дырын-дырын вордӥськыло ке но, сцена вылэ уг вуо. Тросаз театръёсын кужмо но визьмо режиссёръёс ӧвӧл. Тӥни со ик театръёслэн сюлэмшугъяськонзы луэ. Усто режиссёр утчаськись адями, драматургъёсты шедьтон сярысь сюлмаське, соосын ӵош ужаса, пьесаосты сцена вылын улӟытэ. Удмурт театрамы сыӵе сюлмаськись режиссёр ӧвӧл. Куке но отын ужаз режиссёр Василий Ушаков. Мынам малпамея, Василий Серафимовичтэк Пётр Захаров но, Вячеслав Ар-Серги но, Татьяна Чернова но драматургъёс ӧй луысалзы, пьесаоссэс театрын ӧй возматысалзы. Та авторъёслэн али гожтэм пьесаоссы ӧвӧл шуыса верады ке, мон уг оскы. Вань. Владимир Котковлэн но, Елена Миннигараевалэн но, Галина Романовалэн но, мукетъёсызлэн но драмая произведениоссы кыллё. Театрмы соосты кулэ уг кары. «Соос лябесь» шуыны капчи. Нош та авторъёслы пьесаоссэс сцена вылын пуктымон карыны кин ке но юрттӥз меда?

Пьесаосты лыдӟыны тросэз уг ярато. Соосты учкыны кулэ, шуо соос. Бен, пьесаосты сцена вылын возьматыны, рольёсъя лыдӟыны гожъяло. Удмурт литературая учебникъёсты учконо ке, отын драмая призведениос туж ӧжыт пыртэмын. Пьесаосты пичиысен ик валаны уг дышето ке, драматургъёсмы кытысь потозы? Пичи сценка гожтон бордысен кутскыса, бадӟым пьеса кылдытонозь зэмзэ но кузь сюресэз ортчоно. Юрттӥсьёстэк со сюресэз вормыны уд быгаты. Соин ик кулэ усто редакторъёс, режиссёръёс, чеберлыкъя кивалтӥсьёс, театр искусствоез азинтыны сюлмаськисьёс…

Ульфат Бадретдинов

Россиысь Писательёслэн огазеяськонзылэн ёзчизы 

 

Удмурт Дунне
By Удмурт Дунне 17 октября, 2012 15:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<