Пичи эштос кунэз сюдоз

Удмурт Дунне
By Удмурт Дунне 23 октября, 2012 15:22

Пичи эштос кунэз сюдоз

Кивалтӥсь П. Петров

Кылем даурлэн пумаз, 90-тӥ аръёсы, Россиысь кивалтӥсьёс ивортӥзы: странаез сюдозы фермеръёс. Озьы кутскиз колхозъёсты но совхозъёсты быдтон, ваньбурзэс тус-тас карон, нимъёссэс вошъян, СПК-ос, ООО-ос, ЗАО-ос но крестьян-фермер хозяйствоос кылдытъян.

Удмуртия но та ужъёслэсь ӧз палэнскы. Кияса ёросын али 20 пала крестьян-фермер хозяйствоос. Соос пӧлысь тужгес зол азинскисез луэ Вуж Сальялась П. Петровлэн хозяйствоез. Пётр Григорьевич — быгатӥсь кивалтӥсь. Ёросысь одӥгезлы бадӟым «Рассвет» колхозлы, бӧрысь СПК-лы со 20 арлэсь кема куашканы ӧз сёты. Но пумен П. Петров фермер хозяйство кылдытӥз.

— Пётр Григорьевич, ку но кызьы кылдытӥды крестьян-фермер хозяйство?
— Ми егит хозяйство — 6 ар гинэ ужаськом ай. Вордским 2005-тӥ арын 13-тӥ декабре. Кутскыкумы музъеммы 7 гектар вал. Али одӥг сюрс гектарлэсь уно ни. Ӝыныяз тысё но пуртэсо юос будэтӥськом, кылемаз — одӥг но трос аръем турынъёс.

— Табере хозяйстводэс шоро-куспо эштос шуыны луоз ни.
— Син гинэ медаз усьы. Арысь аре удалтэм ю-нянь будэтӥськом. Кӧс гужеме но 18 центнерлэсь ятыр урожаймы вал, туэ 25 центнерез ортчим, яке ёросын сярысь одӥг но ӝыны поллы тросгес луиз.
Бадӟым саклык висъяськом таза сортовой кидыс уськытонлы. Ӧм куштӥське ӟег будэтонлэсь. Со чабеен умоятэмын, «Тритикале» сорт шуиське. Будэтӥськом на чабей, йыды, сезьы. Туэ ӟеч йыды но сезьы кидыс басьтӥм Грак ёросысь «Родина» эштосысь.

Музъемез умоятонлы вис карытэк саклык висъяськом. Муосмес кыедаськом. Туэ котькуд гектараз одӥг но ӝыны центнер минерал сылалъёс пазям. Ӟеч урожай басьтыны юрттэ шонер тупатэм севооборот.

Механизатор М. Баршев

— Нош пудо вордон удысты кызьы азинске?
— Пудотэк туэ коньдон уд потты. Сюро таза пудо 100 йырлэсь уно. Со пӧлысь 40-эз — скал. Пудо уллёмес ялан йылэтӥськом, туэ эшшо 50 ветыл басьтом на. Фермамес тупатъян но выль оборудование басьтон вылысь туэ Гурт удысъя но сиён-юонъя министерстволэн конкурсаз вормисе потӥм. Хозяйствомылы 5 миллион манет висъязы. Со коньдонэн ик пудо йырмес будэтом но йќл кыскон гумыос басьтом.

Миым котькуд скаллэсь 5 сюрс 800 килограмм йӧл люкам. Озьы фермамы ёросысь Данъян пул вылэ пыртэмын вал. Нош туэ та лыдпусэз 6 сюрсозь вуттом. Алигес дояркамес Раиса Ермаковаез пусйизы Гурт удысъя но сиён-юонъя министерстволэн Данъян грамотаеныз. Эшезлэсь адӟем карыса, озьы ик трос йӧл кыске Алевтина Степанова. Нош кунян сюдӥсьмылэн Екатерина Аляшевалэн пудоез нуналаз 1000-1100 грамм будэ.
Фермаез быгатыса но валаса нуэ Галина Черняева. Кузпалыз Николай хозяйствоын устоез механизатор луэ. Со сьӧры уйисько эшъёсыз Владимир Петухов, Сергей Алексеев но Михаил Барышев. Али милям 4 «Беларус» трактормы, со пӧлысь тужгес кужмоез МТЗ-1221. Таӵе техникаен тулыс бусы ужъёсмес дыраз но ӟеч быдэсъяськом. Таза кидыс ӟеч дасям муэ согиське.

— Нош мар тӥледды шугъяськытэ?
— Вань та вылӥ верам кысык ужъёсты бергатэ 25 адями. Соослы котьку тау карисько. Калыклы уж сётон вылысь нюлэс дасяськом, пилорама лэсьтӥм. Сарапул лесничество пыр тэль басьтӥськом но выж пул дасяськом, бугро ӵуписьком. Ми, фермеръёс, ялан возьмаськом шаерысьтымы кивалтӥсьёслэсь юрттэмзэс. Малы ке шуоно  ёросамы тыро-пыдо ужась фермеръёсмы чиньыен лыдъямон. Милям хозяйствоямы, ёросын шоро-куспо уждунэн ӵошатыса, одӥг но ӝыны поллы тросгес уксё усе.

Фермер В. Петухов но механизатор Н. Чернов

— Азьланезлы кыӵе малпанъёсты?
— Милям сяме пыремын ни калыклы юрттон: бакча гырон, пудо сиён сётон, лэсьтӥськыны юрттон но музон. Калык солы шумпотэ.

Азьланезлы малпанъёсмы бадӟымесь. Чакласьком агротуризмен вырыны. Со понна луонлыкъёсмы вань. Тымет лэсьтом. Тани Финляндиысь куноос дорамы вал ни. Асьме инкуазез, калыкмес котькытын мед тодозы. Та но музон ужъёсын мыным трос юрттэ Сергей пие. Ми соин одӥг пыжын уяськом.

Геннадий Романов

Удмурт Дунне
By Удмурт Дунне 23 октября, 2012 15:22