Ошмеслэн куараез

Удмурт Дунне
By Удмурт Дунне 11 октября, 2012 14:12

Ошмеслэн куараез

О. Поторочина

Ольга Поторочина Красногорск ёросысь «Победа» газетлэн валтӥсь редакторез.  Удмурт Республикаысь дано журналист «Удмурт кенеш» огазеяськонлэн ёрос ёзэзлэн правленияз быръемын, озьы ик кивалтэ Удмурт нылкышно кенешлэн ёрос ёзэныз. Та нуналъёсы Поторочина пусйиз зарни юбилейзэ.

— Ольга Вениаминовна,  капчиен-а вамыштӥды журналистысь валтӥсь редакторе?
— Корреспондент луыса кызь вить арзэ ужай ёрос газетамы. Вылӥгес тубатэ ӝутскон сярысь ӧй ик малпаськылы. Редакторез воштӥсьын но ноку ӧй вал. Соин ик 2011-тӥ арын депутатъёслэн ёрос кенешсылэн редакторе пуктон сярысь дэмламез шӧдтэк шорысь луиз. Газет поттон ужъёсын ноку вырымтэ, мар кароно?
Ӧй ыштӥськы. Коллективын куинь азьвыл редакторъёс ужало — Анатолий Гончаров, Анатолий Семёнов, Надежда Ашихмина.  Кыӵе ке валамтэос кылдо ке, соослы вазиськисько. Юртто. Та дырлы валанэ, быгатонлыкъёсы будӥзы, ас кылме но вераны быгатӥсько ни. Кыӵе ке валамтэ ужпумъёс кылдо ке, вазиськисько ёрос йырлы Владимир Корепановлы. Со котьку юрттыны дась.

— Газет поттон пӧлы выйыса, гожъяськонлэсь уд мӧзмиське-а?
— Корреспондентын ужатозям, нуи гурт удысэз. Котькуд механизатор, пудо утись аслам адямиосы кадь пото ни. Куддыр мӧзмыт но луэ. Но мон кабинет борды думемын ӧвӧл. Пӧртэм ужрадъёсы пыриськыса, кенешъёсын пукыса, калыке потаса, тодӥськод ёрослэсь маин улэмзэ, мар сюлмаськытэ адямиосты, кыӵе ужпумъёсты ӝутоно газетын. Та ласянь мон трослы узыргес луи. Гожъяськыны но дыр шеде.

Мынам туж бадӟым тау кареме потэ Николай картэлы. Со монэ вала, мылкыдме бурдъя, котыр ласянь юрттыны тырше. Доре беромыса вуиськод ке но, тодӥськод: ваньмыз умой луоз. Трос дыр быре удмуртлыкен герӟаськем ужрадъёслы. Та пумысен но картэ юалляське, визь-кенеш сётэ.

— Удмурт калык сярысь сюлмаськон вирады пыӵамын. Кытысь сыӵе мылкыд кылдӥз, ӟучомем ёросын улыса?
— Анай кылме гажан но яратон мылкыд пыӵатӥз удмурт кылъя но литературая дышетӥсе, классэн кивалтӥсе Римма Васильева.  Со дышетскем Даниил Яшинэн ӵош, пумиськылэм мукет тодмо удмурт писательёсын. Урокъёссэ книгаын гожтэмъя гинэ ӧз нуылы, пумиськылэмъёсыз сярысь вералляз. 7-тӥ-8-тӥ классысен малпай:  та дышетӥсе сямен ик, удмурт филологияя факультетэз йылпумъяло.

«Дась лу!» газетэн эшъяськеме но мылкыдме бугыртӥз. 4-тӥ классын дышетскыкум, Красногорск ёросысь Дёбы школаямы вуылӥз нылпи газетысь корреспондент Леонид Фёдоров. Римма Николаевналэсь юам: кин, пе, умой гожъяськыны быгатэ.  Классэн кивалтӥсе  нимме верам. Леонид Павлович дорам лыктӥз но шуэ: урод сямо, кылзӥськисьтэм пинал сярысь гожтоно вал, пе.

Римма Николаевнаен кенешыса, классысьтымы тамак кыскись пияш сярысь гожтӥ.  Котькуд уроке вить-дас минутлы бере кыльылӥз. Мон классамы азьветлӥсьын вал. Кызьы гинэ ӧм нюръяське соин, номыр ӧз юртты. Заметкае газетэ потэм бере но бен пияшмы ӧз тупатскы, но со луиз гожъяськон борды басьтӥськеме.
Удмурт кун университетын куинетӥ курсын дышетскыкум, Александр Шкляев гожъяськыны мылкыд карисьёслы ӵектӥз журналистикая специализацие мыныныны. Диплом гожтон азьын практика ортчоно вал. Ми ньыль кузя «Дась лу!» газетэ шедимы. Со самой шудо дыръёс вал.

Университет бере кык арзэ ужай «Дась лу!» газетын. Быземе бере ас ёросам ик вуи, ужаны интыяськи редакцие, ӵектӥзы гурт удыс сярысь гожъяны.  Анай-атае вань улытозязы ужамын пудо вордонын, та ужпумъёс мыным пиналысен тодмо. Но таин валче кӧня ке аръёслы палэнэ кылизы «Дась лу!» газетын ужаса басьтэм тодон-валанъёсы, удмуртлык борды кыстӥськонэ. Мылкыдме выльысь вырӟытӥз географиен дышетӥсе Николай Волков.

1991-тӥ аръёсы Николай Кузьмич ёросысьтымы удмурт движениез азинтон борды басьтӥськиз. Редакцие лыктыса, шуиз: тырмоз ни, пе, тыныд пукыны, уж борды кутсконо. Жаляса верано, Николай Кузьмич улэп ӧвӧл ни. Но удмурт калык понна сюлмаськемез ӟеч пушъет сётӥз. Дас куатетӥ арзэ «Удмурт кенеш» огазеяськонлэн ёросысь «Ошмес» ёзэныз Василий Спиридонов кивалтэ.

— Ольга Вениаминовна, тӥ асьтэос кивалтӥськоды Удмурт нылкышно кенешлэн ёросысь ёзэныз. Кыӵе вормонъёсты сярысь вераны быгатӥськоды?
— Ужмес син шораз воземез, визь-кенеш сётэмез понна Удмурт нылкышно кенеш огазеяськонлэн кивалтӥсезлы Надежда Степановалы бадӟым тау карем потэ. Черкогуртамы нылкышно клуб но кылдытӥм. Удмурт кылэз дышетӥсь нылпиосты сцена вылэ поттыны турттӥськомы, конкурсъёс радъяськомы.
Красногорскысь нылпи садъёсын одӥгаз но удмурт кылэз уг дышето вал. Куинь номеро нылпи садысь кивалтӥсен Людмила Ворончихинаен вераськыса, огъя кыл шедьтӥмы вал. Покчиос понна татын усьтӥськиз удмурт кылъя кружок, нуиз сое Красногорск шор ёзо школаысь дышетӥсь Надежда Ворончихина. Нылпиос асьсэлэсь быгатонлыкъёсэс возьматӥзы «Пичи чеберай» ӵошатсконын. Людмила Германовнаез мукет удысэ ужаны басьтэмен, удмурт кружок чалмиз.

Семьяосын, пиналъёсын ужаны пӧртэм амалъёс утчаськомы. Ёросамы удмуртъёс 30 процент пала. Тыршиськомы ӟучъёсты но ужрадъёсамы кыскыны, ужъёсынымы тодматыны. Дёбы черкогуртысь библиотекаын ужась Фаина Ворончихина кичӧлтэмъя ёросысьтымы нылпиос пӧлын ньыль-вить аръёс талэсь азьло ялӥмы Лӧпшо Педуньлы сӥзем конкурс. Кыӵеен адӟо пиналъёс удмурт выжыкылъёсысь та героез, кин со?

Конкурсэ пыриськизы ӟучъёс но, удмуртъёс но. Нылпиос трос гинэ бугыръяськизы библиотекаосын. Тросэз Педуньлы вазиськиллям, анай-атайзэс юонлэсь утьыны курыса. Кин ке курем соослы ӟеч уждун. Колхозъёсын комбайнъёс, тракторъёс тырмымтэлы ӝожтӥськисьёс но вал. Та ужъёсъя но валаськод, мар туннэ нуналэ сюлмаськытэ семьяосты.

Шумпотӥсько, УАССР-ысь дано артисткалэсь, улосчимылэсь Дарья Поторочиналэсь нимзэ пыраклы буре ваён сярысь малпанмы быдэсмиз. Национальной премия пумысен положениез улонэ пыӵатыны юрттэмез понна туж бадӟым тау карем потэ ёросымылэн йырызлы Владимир Корепановлы. Со кичӧлтонмес умоен лыдъяз.
2007-тӥ арын  ёросысьтымы депутатъёслэн кенешсылэн сессияз та пумысен ужпум юнматэмын вал. Котькуд ар ёрос бюджетысь премилы 1 сюрс манет висъяське. Кинэ пусъён пумысен «Ошмес» огазеяськонмылэн правлениез сессия азе ӵектонэн потэ. Депутатъёс со понна куаразэс сёто.
Удмуртлыкез азинтон бордын ӟеч ужасьёсты данъяськомы Дарья Ивановналэн вордӥськем нуналаз, 28-тӥ феврале. Одӥг араз нимаз адямилы премия сётӥське, мукет араз — ужась коллективлы. Нырысетӥез лауреат луиз Дарья Поторочиналэн сузэрез, Дёбы черкогуртысь пудо утись Валентина Чупина. Со туж мыло-кыдо пыриське Дёбы черкогуртысь «Тюрагай» ансамбле.

— Секыт-а удмуртъёсты ас кылзы, культуразы пала берыктыны?
— Азьло аръёсы бульдозер сямен огнамы туртскиськом вал пӧртэм ужпумъёсты вырӟытыны. Ёросмылэн йырыз воштӥськемен, югдур умояз. Владимир Корепанов ваньмес огъяз: культурая отдел, дышетонъя управление, «Ошмес» огазеяськонмы али одӥг командаын тыршо. Арлы ужан планъёс но ӵошен чакласькомы. Уж вырӟиз, шуыны луоз.

Удмурт огазеяськон кылдэм дырысен  ёросысьтымы гуртъёсын сизьым фольклор ансамбль кылдӥз: Красногорскын, Дёбыын, Архангельскын, Артыкын, Малягуртын. Нош Бараны гуртын удмурт, ӟуч, бигер культураосъя «Венок» юрт усьтӥськиз. Котькудӥзлэн аслаз ансамблез вань.
Ум вунэтӥське гурт удысын ужасьёсты но. Спонсоръёс шедьтыса, огазеяськонмылэн нимыныз удмуртъёс пӧлысь азьмынӥсь механизаторъёсты, пудо утисьёсты синпель кузьымъёсын пусйылӥм, нимаз коллективъёсты тортэн данъяллямы. Выль удысэ выжеменым, та уж палэнэгес кылиз вал, но азьланяз кутсконмес выльысь радъяломы, малпасько.

Ёросысь калыкез удмуртлыкен герӟаськем ужрадъёсын тодматӥськом газет пыр. Дас куатетӥ арзэ кык толэзьлы одӥг пол поттӥськом «Ошмес» бам. Куд-ог материалъёсты удмурт кылын дасяськом. Ёросамы пӧртэм калыкъёс уло, ваньмыныз тупаса, огкылысь улыны тыршиськомы.

Лия Малых

 

Удмурт Дунне
By Удмурт Дунне 11 октября, 2012 14:12