Нюлэс кушысь — городэ

Удмурт Дунне
By Удмурт Дунне 10 октября, 2012 15:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нюлэс кушысь — городэ

Удмурт культураез вуоно азинтӥсьёс Алексей Чайников, Влад Чиков, Данил Леконцев

Удмуртиысь Усточиослэн школа-интернатсылы — 25 ар

 

1970-тӥ-80-тӥ аръёсы Ижысь крезьгуръя училищеын дышетӥсьёслэн но коммунистъёслэн кенешонъёсазы трос пол ӝутӥськылӥз удмурт культуралы пинал специалистъёсты дасян сярысь ужпум.

Тужгес ик та пумысен вераськон мытылӥз Россилэн но Удмуртилэн дано адямиез Г. Корепанов-Камский. Бере ӧз кыльы сыӵе ӵектонъёслэсь Удмуртиысь культура удысысь дано ужась И. Главатских. Уг тодӥськы, кылӥзы-а мынэсьтым пинал векчи куараме та бадӟым адямиос ӵош кенешонъёсмы дыръя.

Малы сыӵе вераськонъёс ӝужазы удмурт интеллигенция пӧлын? Соку ваньмыз кадь ик крезьгурчиос, писательёс, суредасьёс потэмын вал гуртын улӥсьёс пӧлысь. Соин таос сюлмаськизы,  будӥсь нылпиос улон сюрессэс бырйыны но йыг-йыг пыд вылазы султыны мед быгатозы, валтӥсь специалистъёс дорын дышетскыса. Нош дышетӥсьёс — городын, удмурт нылпиос — гуртын. Вераськон муромиз но, школа-интернат усьтон сярысь ужпум ӝутскиз. Нош анай-атайёс дӥсьтозы-а, уз-а нылпиоссэс бордысьтызы ишкалтыны? Собере пиналъёсты Ижын ӵыж-выль улон юрт, сяськаос но садъёс уг возьмало на. Одӥг кылын вераса, ваньмыз та туж бадӟым ужез мытон вал. Пусъёно: мукет ӵыжы-выжы республикаосын сыӵе интернатъёс вал ини. Соин ик кивалтӥсьёс тодӥзы ни кутсконо ужлэсь зол но ляб палъёссэ, сюлмаськытӥз огез гинэ: анай-атайёслэн асваланзы.

Таӵе мур но бадӟым ужен туж зол выризы 2 министерствоос: Культурая (министр А. Сидорова) но Калыкез дышетонъя (министр А. Ерёменко). Озьы 1987-тӥ арын Удмуртиысь Министръёслэн Кенешсы усточиослы школа-интернат усьтон сярысь постановление кутӥз. Бадӟым шумпотон вал со!

Уж пӧзьыны кутскиз: со гужем ик Культурая министерствоысь специалист Г. Дресвянская гуртъёсы нылпиосты утчаны-бичаны ветлӥз. Та уж мукетъёслы но тырмиз на — тросгес потазы И. Главатских, О. Иванова но мон. Серемес учыръёс но тодэ лыкто. Вуиськод гуртэ:
— Быгатӥсь нылпиосты вань-а?
— Вань, — шуо, — милям кырӟась пимы, но туннэ со пастухе потэмын, нош кудпалан пастуха — созэ ум тодӥське. Ветлӥськом, ветлӥськом но шедьтӥськом: нюлэс кушын ик кырӟаны куриськом сое. Уд оске: скалъёсыз сиськемысь ик дугдо — сыӵе пастухез, вылды, адӟылэмзы ӧй вал на. Огполаз Глаз районэтӥ машинамес зор бере донгаса ветлӥмы. Мукетъят шур дурын чорыгаса но улӥмы. Пичи мурт тодмотэм апай-агайёслы кызьы отын ик кырӟалоз? Дышыны кулэ ук ог-огедлы! Отын ик синйылтыны луэ вал таӵезэ но: городлы матысь гуртъёсысь, посёлокъёсысь но райцентръёсысь нылпиос чаляк басьтӥсько тодмотэм мурт борды. Нош кыдёкысь гуртъёсын кемагес дышо, соос шунытгес, ненеггес потӥзы милемлы. Туннэ ке но бадӟым тау кареме потэ районысь культура удысысь кивалтӥсьёслы, школаосысь дышетӥсьёслы. Соос, ми вуытозь, люкало вал ни усточиоссэс.

Озьы тӥни 25 ар талэсь азьло 1-тӥ сентябре дас аресъем нылъёс но пиос Ижын визь-нод люканы ӧдъязы. 2-тӥ номеро школа-интернатын соос улӥзы но дышетскизы, крезьгуръя училищее арняяз кык пол вуылӥзы.
Нырысь-валысь быръемын вал калык но духовой инструментъёсын шудыны дышетон. Училищеын нылпиос тодматскизы специальность, сольфеджио предметъёсын.  Куинетӥ араз дышетскыны люказы хорын кырӟась нылпиосты. Соосын ужаны кутскизы Мария Васильевна но Владимир Николаевич Михайловъёс. Кӧня ке улыса, кырӟасьёсын ужаны кутскиз А. Щербаков, со ик мыным визь сётӥз, пиосты гинэ хоре бичаса, капелла кылдытыны. Одӥг вадес, калык но духовой инструментъёсын дышетскись нылпиосты люкаса, ужаз Г. Корепанов-Камский. Юасьёс-верасьёс вал ке но сыӵе предмет дышетон программаын ӧвӧл шуыса, мон соослы со Камскийлэн творческой лабораториез шуылӥ. Геннадий Михайлович туж трос кырӟанъёс гожтӥз, берло соос сборниказ пыртэмын вал, радиоэфир ӵем гинэ со кырӟанъёсын тырмылӥз. Удмурт газетъёс-журналъёс, радио но телевидение нылпиос, соослэн улэмзы-вылэмзы, крезьгуро сюрес вылэ потэмзы сярысь гожъяны кутскизы.

Ӧз вунэты Министръёслэн Кенешсы нимысьтыз интернат сярысь. Искусство удысысь тодмо адямиосты люкаса, нимысьтыз кенешон ортчытэмын вал. Люкаськем калык но СМИ ваньмыз одӥг малпанэ вуизы: нылпиослы кулэ асьсэлы юрт. Та югдурез нырысь нуналъёсысен ик тодыса, туннэ вераны быгатӥсько: капчи ӧз сётӥськы нылпиослы интернатын улон — анай-атайтэк, мурт интыын, мурт адямиосын. Тодэ лыкто на мӧзмисьёс, бӧрдӥсьёс. Шаплыяськись нылпиослы но эрик мултэс ӧз сётӥськы — таосыз туртто вал гуртысь лыктэмъёсты донгыны, ӵыжыны, шымыртыны. Интернат пушкын шонер визьман-дышетон уж радъямын вал: классъёссы но улон интызы нимаз.  Туннэ ӟеч кылъёсын тодэ ваем потэ 2-тӥ школа-интернатлэсь директорзэ Г. Жолобовез, воспитательёсты. Табере вераны луэ ини, нимаз улӥсь нылпиосмылэн асьсэлэн юртсы, зэмос творческой интызы  вань шуыса, матын — филармония, Удмурт но Операя театръёс, крезьгуръя колледж.
Тодэ лыктэ на нырысетӥ выпуск — сое ортчытӥмы 2 министерствоосын, удмурт интеллигенциен но спонсоръёсын ӵош. Милям нылпиосмы быдэс дуннеын тужгес чеберъёсыз, тужгес устоосыз вал.
Табере вераны луэ ини, усточиослы школа-интернат — зэмос улонэ выжем выжыкыл, чебер малпанъёслэн пасьтана бурдъёссы но ваньмылэн кыдёке адӟиськись ӵуказе нуналмы.

Анатолий Добряков, «Мынам Удмуртие» телеканалысь режиссёр, эфирез нуись:
— Школа-интернатэ вуи, 4-тӥ классэз йылпумъяса. Гуртысьтымы 5 пиез басьтӥзы вал, нош дышетсконмес йылпумъямы кык кузя. Баянэн шудыны малпаса лыктӥм но, мылкыдмес куашкатӥзы — хорын, пе, кырӟалоды. Озьы ке но дышетсконмы туж тунсыко вал: школаын но визьмаським, крезьгуръя школае но ветлӥм, спорт ужрадъёсын но кыдамы. Секыт-а, вормиськом-а табыдӟа ныпъетэз — валаса но ӧм вуттэ, ваньмыз туж кельшылћз. Но мӧзмон вакытъёстэк ӧз луы.  Мон вужаз интернатын дышетски ай. Отын 28 кузя улӥмы — казармаын кадь. Кӧлыны выдӥськом, тыл кысэ — ваньзы шобрет улын быз бӧрдо. Но милемлы, пиослы, зэмос атай кадь луиз дышетӥсьмы Валерий Яковлевич Митрофанов. Солы али но тау карем потэ визьмамез, котьку юрттэмез понна.
Интернатлэн удмурт шӧмыз ышиз перестройка вакытэ. Тани милесьтым куинь арлы вазьгес дышетскемъёс куспазы удмурт кылын верасько вал. Нош милемыз 2-тӥ интернатысь мукет нылпиос исаны, отӥгес карыны выризы. Со дырысен городэ вуэм удмурт нылпиос амалтэк ӟучъяськизы. Отын номыр ӟечез ӧй вал. Табере ӵош дышетскем удмурт эшъёсыным, кылсярысь, Анатолий Эркишевен ик пумиськиськом ке, куспамы ӟуч кылэ выжиськом. Таиз сюлмаськон школа-интернатын туннэ но вань, соин солы бадӟымгес саклык мед висъясалзы.

Алексей Фомин, Удмурт кун филармонилэн кивалтӥсез:
— Усточиос пӧлы шедьыса, туж удалтӥз мыным. Татын визь-нод но люкай, улонлэсь бергамзэ но валай. Интернат мыным кыкетӥ коркае кадь потэ. Дышетскон капчи ӧй вал — астэ жалятэк, уже кыткиськиськод ке. Мон ӵукнаысен ӝытозь тэк улонэз ӧй тодылы. Городын астэ возьматыны амалъёс трос тупаллязы: конкурсъёс, ужрадъёс. Ми театръёсы, концертъёсы ветлыса будӥмы. Усточиос пӧлын дышетскон нылпиослэсь сюрессэс паськыт каре.
Школа-интернатлы сӥ-зьысал ӵош ужаны Кузебай Герд нимо гимназиен. Малы ке шуоно удмурт интеллигенция огазьын мед будоз. Нош усточиос пӧлын —  крезьгурчиос но суредасьёс, соос мукет удмурт пиналъёслэсь висъяськысагес кылё. Азьланяз таӵе тодматсконъёс пиналъёслы эшъяськонэн, ӵош ужан-азинсконэн, оглом пайдаен берытскысалзы. Нош вань дышетӥсьёслы — бадӟым тазалык но выль вормонъёс.

Елена Скворцова

Удмурт Дунне
By Удмурт Дунне 10 октября, 2012 15:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<