Кырӟан мытӥз… гид йылысен

Удмурт Дунне
By Удмурт Дунне 30 октября, 2012 18:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кырӟан мытӥз… гид йылысен

Е. Антонова

Дэри черкогуртысь культура юртын кылем арняе котырес лыдпуссэ пусйиз «Вуюись» калык ансамбльын 25 ар ӵоже кырӟась мурт, «Россиысь дышетон удысысь дано ужась» нимен, Удмурт Республикаысь Правительстволэн данъян грамотаеныз пусъем удмурт нылкышно Евдокия Антонова.

Дуся, тазьы небыт вазисько Евдокия Анатольевналы сое тодӥсь муртъёс. Та удмурт кенак шоры учкыса, сюлэм гань-гань луэ, нош чебер кырӟамзэ кылыса, малпаськод: сётэм ук Инмар куаразэ!

— Кӧня аресысен кырӟаны кутскемме уг тодӥськы ни, нош Алнаш ёросысь Шадрасак Кибья гуртам куноос вуо ке, анае Анастасия Егоровна одно ик монэ кырӟаны косылӥз. Азьло ӵем коркась корка юмшаса ветлылӥзы. Анай калыкез сюдэ-секта, мон шулдыртӥсько. Солы туж кельше вал мынам кырӟанэ, тужгес но «Васькисько, васькисько» гур. Нош тодӥськоды-а, мар вал мыным сцена интые? Липет. Тубисько гид йылэ, ну, кырӟасько ук. Куара бадӟым, адямиос азбарын учко, чабо. Сыӵе «концертъёсы» понна куд-огез 10 копейка но сётэ вал, — тодаз вае Евдокия Анатольевна.
Е. Антоновалы сӥзем «Кырӟанэн улӥсько» ӝытэз радъязы культура юртын ужасьёс. Татчы ӧтизы кырӟасьлэсь ӵыжы-выжыоссэ, эшъёссэ. Усточиез ӟечкыланы быдэс зал люкаськиз. Нылкышнолэн сузэръёсыз тодазы вайизы пичи дырзэс. «Айкай» театрлэн кивалтӥсез Пётр Данилов вераз «Чипчирган» ансамбльлэн кивалтӥсезлэсь Розита Анкудиновалэсь кылъёссэ:

— Мон «Чипчирганэ» вуи 1981-тӥ арын, соку Розита Андриановна ялан шуылӥз: тӥлесьтыд азьло татын кырӟаз Дуся Макшакова, вот Дуся озьы каре вал, Дуся тазьы каре вал. «Чипчирган» дышетӥз милемыз удмурт кырӟанлэсь дунзэ валаны. Мон туннэ Евдокия Анатольевналы шуисько: арестэ эн лыдъя, мылкыдыд гинэ котьку егит мед луоз.
П. Данилов но мукет ӵош дышетскем эшъёсыз Дусялы тодазы вайытӥзы студент аръёссэс но «Чипчирганэн» Турцие гастрольёсы ветлэмзэс. Кырӟась муртлы мар кузьым сётод? Куноос трос сяська керттэтъёсын но шулдыр кырӟанъёсын лыктӥллям. Евдокия Анатольевнаез шулдыртӥзы «Айкайысь» кырӟасьёс. Нылкышно ачиз но пукыны ӧз чида — «Вуюись» ансамбленыз но куноосыныз кырӟаз-эктӥз.

Е. Антонова 20 ар Дэриысь нылпи садын тыршиз, берло 12 арзэ ужа татысь коррекционной школа-интернатын. Кышномуртлэн тыршеменыз пиналъёс тодон-валан люкало, удмурт сямен кырӟало-экто. Та пиналъёс «Тюрага» ансамбленызы шулдыртӥзы дышетӥсьсылы сӥзем ӝытэз.
Кыџе меда сыӵе кырӟась кышноен улыны? Та юанэн вазиськизы Дусялэн кузпалэзлы. Пиосмурт вакчияк валэктӥз: чидасько!

Бӧрысь пальпотыса шуиз ини: ми, пе, дорын ӵош кырӟаськом.
Ӝыт туж шуныт ортчиз. Ужрад йылпумъяськыку, кышномурт люкаськем калыклы тау кариз:
— Монэ, пичи адямиез, сыӵе вылӥе ӝутӥды, сокем сӥлы кариды!
Кунооссэ Дуся апай удмурт сямъя ӝӧк сьӧры ӧтиз. Кырӟан-веранъёс отын но азьланьтӥськизы.

Галина Семёнова

Туспуктӥз Владимир Беломорских

Удмурт Дунне
By Удмурт Дунне 30 октября, 2012 18:14