Кылбурчи — национальность

Удмурт Дунне
By Удмурт Дунне 17 октября, 2012 10:48

Кылбурчи — национальность

Ар-Сергилэн выль книгаез

Удмуртиысь калык писательлэн Вячеслав Ар-Сергилэн туэ потэм «Вслушаться в себя…»  книгаяз пыремын философской кылбуръёс, веросъёс, киноповесть, пӧртэм аръёсы Россиысь но кунгож сьӧрысь газет-журналъёсы сётэм интервьюос.

Тужгес но тунсыко луэ интервью люкетэз, отын пыр-поч усьтӥське писательлэн дуннеез валамез но улон шоры учкемез.

Книга  лыдӟисьлы возьматэ писательлэсь дуннеысь бадӟым литературалэн паськыт ӧраз пыриськемзэ. Соин ик  Черногориысь Dusan Durisic-лэн но бигер шаерысь Роберт Миннуллинлэн удмурт писательлы сӥзем кылбуръёсыныз кутске. Роберт Миннуллин кылбураз шуэ, кылбурчиослэн ог-огзылы валамон кылзы вань, соос асьсэос одӥг бадӟым национальность кылдыто.

Трос кылъёсты тодон, мукет калыклэн улонэныз но лулчеберетэныз тунсыкъяськон  писательлы ассэ но калыксэ валаны юртто. Ассэ сак кылзӥськыса, улон сярысь люкам-валам зэмлыкез лыдӟисезлы пыр-поч усьтэ, алдаськытэк возьматыны тырше.

Книга гожтэмын ӟуч кылын, но быдэсакыз сӥземын удмурт кыллы, удмурт адямилы, солэн сямызлы. Ар-Серги ассэ писатель-билингв шуэ, ӟуч лыдӟисьлы гожъямъёссэ берыктӥсьтэк вуттэмез потэ. Туала арын тросэз удмуртъёс но, литературной кылэз дышетытэк кылеменызы сэрен удмурт книгаосты ӟуч кылын лыдӟо. Нош дуннелы Вячеслав Ар-Серги нырысь ик тунсыко удмурт луэменыз: со  удмурт сямен малпаське, малпаськон сямзэ ӟуч кылэ берыктэ — озьы писательлэн аспӧртэмлыко гожъяськон стилез кылдэ. Солэсь удмурт шӧмо гожъяськемзэ бадӟым быгатонлыкен лыдъяны кулэ. Туала арын егит гожъяськисьёс понна со секытэн сётӥське: ӟуч кылын вераськиськом, лыдӟиськиськом но телевидениез учкиськом бере, ӟуч сямен малпаськыса, гожъяськиськом но.

Россиысь но кунгож сьӧрысь журналъёслы сётэм интервьюосаз писатель пыр-поч маде шаерамы удмурт кылэз дышетонэн герӟаськем секыт югдур сярысь, удмурт литературалэн азинскемезлы огъя дунъет сётэ. В. Ар-Сергилэн малпамезъя, литературамылэн зарни вакытэз 1917-тӥ-1930-тӥ аръёсы вал. Вакчи дыр куспын удмурт литература вылӥе ӝутӥськиз, нош али дыре вылӥ ӟечлыкен гожтэм произведениос сокем трос ӧвӧл.

В. Ар-Сергилэн кылбуръёсыз мапаськыто: писатель улон сярысь тодон-валанзэ вакчияк гожтыса кельтыны тырше. Пушкын малпанэз ӟугырес азинске шуыса валаськод, кылбур чуръёсты лыдӟыса — выльысь но выльысь берытсконо  авторлэн малпан ӧраз пырон понна.

«Госпожа Марфутка» киноповесть Мултан ужлы сӥземын. Татын тунсыко усьтэмын В. Короленко писательлэн образэз. Со возьматэмын эрико малпаськисен, соин но кивалтӥсьёслэн политиказылы пумит кариське. Со озьы ик удмуртъёсты янгыше уськытыны турттӥсь эксэй судлы пумит султэ. Киноповестьын сое выль советской власть контрреволюционерен лыдъя.

Сыӵе писательлэн ужез: калыклы кышкатэк ас малпандэ верано, гожтоно. Та малпанэн ик пыӵамын Вячеслав Ар-Сергилэн книгаез но, быдэс творчествоез но.

Лариса Дмитриева

Удмурт Дунне
By Удмурт Дунне 17 октября, 2012 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<